ޕާކިސްތާނު ސަރުކާރުގެ ކޯލިޝަން ބައިވެރިއަކު އަނެއްކާވެސް ކޯލިޝަނުން ބޭރުވެއްޖެ

ޕާކިސްތާނުގެ ބޮޑުވަޒީރު އިމްރާން ޚާން އަށް ވާގިވެރިވާ ކޯލިޝަންގެ ބައިވެރިއަކު އަނެއްކާވެސް ކޯލިޝަނުން ބޭރުވެއްޖެއެވެ.

ރޮއިޓަރސްގައި ރިޕޯޓުކޮށްފައިވާ ގޮތުން ބުދަ ދުވަހު، ޕާކިސްތާން ސަރުކާރުގެ މައި ކޯލިޝަންގެ ބައިވެރިއަކު ވަނީ ކޯލިޝަނުން ވަކިވެ އިދިކޮޅާއި ގުޅިފައެވެ. މިއާއެކު އިމްރާން ޚާން އަށް މަޖިލީހުގެ މެޖޯރިޓީ ގެއްލިފައިވާއިރު، އޭނާގެ އިތުބާރު ނެތްކަމުގެ ވޯޓެއް ނަގަންވެސް މަޖިލީހުން ދަނީ ތައްޔާރުވަމުންނެވެ.

މަޖިލީހުގައި އިމްރާން ޚާންގެ ސަރުކާރަށް އެންމެ ބޮޑަށް ވާގިވެރިވަމުންދިޔަ މުއްތަހީދާ ގައުމީ މޫވްމެންޓް (އެމްކިއުއެމް) އިން ބުދަ ދުވަހު ނެރުނު ބަޔާނެއްގައި ބުނެފައި އެޕާޓީންވެސް ބަދަލު ގެންނަން ބޭނުންވާ ކަމަށާއި އެބަދަލު ގެނައުމަށް އެހީތެރިވާނެ ކަމަށެވެ. އަދި މިހާރު ކެބިނެޓްގައި ތިބި އެޕާޓީގެ މެމްބަރުން މަގާމުން އިސްތިއުފާ ދިނުމަށް ނިންމާ، ސިޓީ ހަވާލުކޮށްފައިވާ ކަމަށްވެސް ރިޕޯޓުތައް ބުނެއެވެ.

އިމްރާން ޚާން ނިސްބަތްވެ ވަޑައިގަންނަވާ ޕާޓީއަށް ކޯލިޝަނަކާއި ނުލައި މަޖިލީހުގެ މެޖޯރިޓީއެއް ނުލިބެއެވެ.

އިމްރާން ޚާން އަށް އިދިކޮޅު ޕާޓީތަކާއި އާންމު ރައްޔިތުންގެ ތެރެއިން ގިނަ ބައެއްގެ ފާޑުކިޔުން އަމާޒުވެފައިވާއިރު، އިދިކޮޅުން ދަނީ ބޮޑުވަޒީރު ކަމުގެ މަގާމުން އޭނާ ދުރުކުރުމަށް މަސައްކަތްކުރަމުންނެވެ. އެގޮތުން މަޖިލީހުން ނަގާ އިތުބާރު ނެތްކަމުގެ ވޯޓު، ބުރާސްފަތި ދުވަހާއި ހޯމަ ދުވަހާއި ދެމެދުގެ ނަގާނެ ކަމަށް ރިޕޯޓުތައް ބުނެއެވެ.

އިތުބާރު ނެތްކަމުގެ ވޯޓު ނަގައި އިމްރާން ޚާން މަގާމުން ވަކިކޮށްފިނަމަ، ހަލަބޮލި ވެފައިވާ ޕާކިސްތާނުގެ ސިޔާސީ މަސްރަހު އިތުރަށް ހަލަބޮލިވެގެންދާނެއެވެ. އަދި މީގެ ކުރިންވެސް އެކި ފަހަރުމަތިން އެގައުމުގެ އަސްކަރިއްޔާއަށް ސިޔާސީ މަސްރަހުގެ ތެރެއަށް ވަންނަން ޖެހިފައިވާއިރު، އެގައުމުގެ ތާރީހުގައިވެސް މަގާމަށް އައްޔަނުކުރެވުނު އެއްވެސް ބޮޑުވަޒީރަކަށް ދައުރު ފުރިހަމަކުރެއްވިފައެއް ނުވެއެވެ.