ރޯދަމަހާއި ދިމާކޮށް އަމިއްލަ ބޭނުމަށް، ގަވާއިދާއި ޚިލާފަށް ވެލި ނަގާނަމަ ފިޔަވަޅު އަޅާނަން: އީޕީއޭ
31 މާރިޗު 2022 | ބުރާސްފަތި 04:54ވެލި ނަގަން ހުއްދަ ސަރަހައްދުތަކެއް އީޕީއޭއިން ވަނީ ކަނޑައަޅާފައި
ގޮނޑުދޮށުން ވެލިނެގުން
ރަމަޟާން މަހާއި ދިމާކޮށް އާންމުންގެ ޒަރޫރީ ބޭނުންތަކަށް ތަންތަނުން ވެލި ނަގަމުންދާނަމަ ގާނޫނުގެ ދަށުން ފިޔަވަޅު އަޅާނެ ކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.
އީޕީއޭއިން ބުނީ މިހާރަކަށް އައިސް މީހުން ދިރިއުޅޭ ރަށްރަށުންނާއި، ވަރުވާއަށް ދޫކޮށްފައިވާ ރަށްރަށުންނާއި، ފަޅުރަށްރަށުންނާއި އަދި ހިކިފަ ހުންނަ ތުނޑިތަކާއި ފިނޮޅު ފަދަ ތަންތަނުން ގިނަ އަދަދަކަށް ވެލި ނަގަމުންދާކަމުގެ ޝަކުވާ އެ އޭޖެންސީއަށް ލިބެމުންދާ ކަމަށެވެ. އަދި ކޮންމެ އަހަރެއްގެވެސް ރަމަޟާން މަހާއި ދިމާކޮށް އާއްމު ރައްޔިތުންގެ ގެދޮރު ޒީނަތްތެރި ކުރުމަށް ހުއްދަ ދީފައިނުވާ ތަންތަނުން ގިނަ އަދަދަކަށް ވެލި ނަގަމުންދާކަން ވެސް ފާހަގަކުރެވިފައިވާކަމަށް ބުނެފައިވެއެވެ.
އީޕީއޭއިން ބުނީ މިފަދައިން ވެލިނެގުމުގެ ސަބަބުން ރަށުގެ ގޮނޑުދޮށް ހަލާކުވެ ރަށް ގިރުމުގެ މައްސަލަ އިތުރަށް ގޯސްވެ، ތިމާވެށީގެ އެކިއެކި މައްސަލަތަކާއި ކުރިމަތިވަމުންދާ ކަމަށެވެ. ރަށް ގިރުމުގެ މައްސަލަތައް ހައްލު ކުރުމަކީ ޚަރަދު ބޮޑު އުނދަގޫ ކަމެއް ކަމަށް އެ އެޖެންސީން ބުނެފައިވެއެވެ.
ވެލި ފަދައިން ގަލާއި ވެއްޔާއި އަކިރި ނަގަންވާނީ އަތޮޅުތެރޭގެ މީހުން އުޅޭ ރަށްރަށުން ގަލާއި، ވެއްޔާއި، އަކިރި ނެގުމާބެހޭ ގާނޫނާއި، ގަލާއި ވެއްޔާއި އަކިރި ނެގުމާއި ބޭނުން ކުރުމާބެހޭ ގަވާއިދުގެ އިތުރުން ރާއްޖޭގެ ރަށްރަށާއި ފަޅުގެ ސަރަޙައްދު ހިއްކުމާއި ފުންކުރުމުގެ ގަވައިދުގައި ބަޔާންކޮށްފައިވާ ތަންތަނުން އެކަނި ކަމުގައި އީޕީއޭއިން ބުނެފައިވެއެވެ.
އެހެންނަމަވެސް ހުއްދަ ދީފައިވާ ތަންތަން ނޫން އެހެން ތަންތަނުންވެސް ވެއްޔާއި އަކިރި ނަގަމުންދާކަން ފާހަގަކުރެވިފައިވާކަމަށް އީޕީއޭއިން ބުނެއެވެ. މިގޮތަށް އާއްމުންގެ ޒަރޫރީ ބޭނުންތަކަށް ބޭނުންކުރުމަށްޓަކައި ވެލި ނަގަން ޚާއްސަ ކުރެވިފައިވާ ވަކި ސަރަހައްދުތަކާއި ވަކި އުސޫލުތަކެއް އެޖެންސީއިން ކަނޑައަޅާފައިވާކަމަށާއި، އަދި އެ މައުލޫމާތުތައް ކައުންސިލްތަކާއި ހިއްސާކޮށްފައިވާކަމަށް އީޕީއޭއިން ބުނެފައިވެއެވެ.
އެހެންކަމުން އާއްމު ރައްޔިތުންގެ ޒަރޫރީ ބޭނުންތަކަށް ވެލި ނެގުމުގައި، އީޕީއޭއިން ކަނޑައަޅާފައިވާ ސަރަހައްދުތަކުން އެ އުސޫލުތަކުގެ މަތިން، ކައުންސިލްގެ ބެލުމުގެ ދަށުން ވެލި ނެގުމަށް އިލްތިމާސް ކޮށްފައިވެއެވެ. އަދި ގަވާއިދާއި ޚިލާފަށް ވެލިނަގާ ފަރާތްތަކާއިމެދު ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވައިދުގެ ދަށުން ފިޔަވަޅު އަޅާނެކަމަށް އީޕީއޭއިން އަންގާފައިވެއެވެ. މި ގަވާއިދުގެ ދަށުން ބޮޑެތި އަދަދުތަކުން ޖޫރިމަނާ ކުރެވޭނެ ކަންވެސް އީޕީއޭއިން ވަނީ ފާހަގަކޮށްފައެވެ.
