ތ.ފޮނައްޑޫ އޮޕަރޭޝަނަށް ގެނައުމަށް ކުރަން ޖެހޭ މަސައްކަތްތައް މިފްކޯއިން ފަށައިފި
30 މާރިޗު 2022 | ބުދަ 07:30މިފްކޯއާއި ބޭންކް އޮފް މޯލްޑިވްސްއާއި ދެމެދު ވެވުނު އެއްބަސްވުމުގެ ދަށުން ކާރުޚާނާއާއި، އެތަނަށް މަސްގަނެ ޕްރޮސެސްކޮށް ވިއްކުމާއި ގުޅޭ އެންމެހައި ހައްގުތައް 6 މާޗް 2022ގައި މިފްކޯއިން ވަނީ ގަނެފައި
އިސްމާއިލް ފައުޒީ - މިފްކޯގެ ސީއީއޯ
ފޮނައްޑޫ އޮޕަރޭޝަނަށް ގެންނައުމަށް ކުރަން ޖެހޭ މަސައްކަތްތައް މިފްކޯއިން ފަށައިފިއެވެ.
މިފްކޯގެ ސީއީއޯ އިސްމާއިލް ފައުޒީ ރާއްޖެއެމްވީއަށް ވިދާޅުވީ، ފޮނައްޑޫ، ސަރުކާރުގެ ބެލުމުގެ ދަށަށް ގެނައުމަށް ބޭންކަށް ދައްކަން ޖެހޭ ފައިސާ މާޗް މަހުގެ 6 ވަނަ ދުވަހު ސަރުކާރުން ބޭންކަށް ދެއްކުމަށްފަހު އެރަށް މިފްކޯއާއި މިހާރު ހަވާލުކޮށްފައިވާ ކަމަށެވެ. އަދި އެތަން އޮޕރޭޝަނަށް ގެނައުމަށް ހަދަންޖެހޭ އެސެސްމެންޓްތައް ހެދުމަށް މިފްކޯގެ ޓީމެއް މިހާރު އެރަށުގައި ހަރަކާތްތެރިވަމުން އަންނަ ކަމަށެވެ.
ފޮނައްޑޫގައި ހުރި ކާރުޚާނާ ހުރީ ވަރަށް ބޮޑަށް ހަލާކުވެފައި ކަމަށާއި، މެޝިންތައްވެސް ހަލާކުވެފައިވާ ކަމަށް ފައުޒީ ވިދާޅުވިއެވެ. އަދި އެތަން އަލުން އޮޕަރޭޝަނަށް ގެނައުމަށް ވަގުތު ނަގާނެ ކަމަށާއި، އެކަމަށް ޚަރަދުތަކެއް ހިނގާނެކަންވެސް އޭނާ ފާހަގަކުރެއްވިއެވެ. އެހެންނަމަވެސް އެކަމުގެ ތަފްސީލް ހިއްސާކުރަން އަދި އަވަސް ކަމަށް ފައުޒީ ވިދާޅުވިއެވެ.
މިފްކޯއިން މަސައްކަތް ކުރާނީ، ވީހާވެސް ޚަރަދު ކުޑަގޮތަކަށް އެތަން ތަރައްގީކޮށް ނަފާލިބޭނެ ތަނަކަށް ހެދުމަށް ކަމަށް ފައުޒީ ވިދާޅުވިއެވެ.
ފޮނައްޑޫ ކުރިން ހަވާލުކޮށްފައި އޮތީ އަމިއްލަ ކުންފުންޏެއް ކަމަށްވާ އައިއޯއެސް ކޯޕަރޭޝަނާއެވެ. އެކުންފުންޏަށް އެތަން ނުހިންގި ބޭންކުން އެތަން ބީލަމުގައި ވިއްކާލުމަށް ތައްޔާރުވެފައިވަނިކޮށް، ތ އަތޮޅަށް ރައީސުލްޖުމްހޫރިއްޔާ ކުރެއްވި ދަތުރުފުޅުގެ ތެރެއިން މަސްވެރިންނާއި ބައްދަލުކުރައްވާ ރައީސް ވަނީ ފޮނައްޑޫ އަލުން އޮޕަރޭޝަނަށް ގެނައުމަށް މަސައްކަތް ކުރައްވާނެ ކަމަށް ވިދާޅުވެފައެވެ.
ރައްޔިތުންގެ މަޖިލީހުގައި މެމްބަރަކު ކުރެއްވި ސުވާލަށް ލިޔުމުން ފޮނުއްވި ޖަވާބުގައި ފިޝަރީޒް މިނިސްޓަރު ޑރ.ހުސައިން ރަޝީދު ހަސަން ވިދާޅުވީ، ފޮނައްޑޫގައި މަސް ބަންދުކުރުމަށް ހަދާފައިވާ ކާރުޚާނާ ބަންދުކޮށްފައިވާތާ ގިނަ ދުވަސް ވެފައިވާ ކަމަށާއި، އެތަނަށް މަސްގަނެ މަސްބަންދު ކުރުމުގެ މަސައްކަތް އަލުން ފެށޭނެ އިންތިޒާމު ހަމަޖައްސައިދިނުމަށް ތ އަތޮޅުގެ މަސްވެރިން ރައީސް އަރިހުގައި އެދިފައިވާ ކަމަށެވެ.
އެއާއެކު ސަރުކާރުން ނިންމީ ފޮނައްޑޫ ކާރުޚާނާ މިފްކޯއަށް ގަތުމަށް ކަމަށާއި، މިގޮތަށް ސަރުކާރުން ނިންމުމާއި ގުޅިގެން މިފްކޯއާއި ބޭންކް އޮފް މޯލްޑިވްސްއާއި ދެމެދު ކުރެވުނު އެއްބަސްވުމުގެ ދަށުން ކާރުޚާނާއާއި، އެތަނަށް މަސްގަނެ ޕްރޮސެސްކޮށް ވިއްކުމާއި ގުޅޭ އެންމެހައި ހައްގުތައް 6 މާޗް 2022ގައި މިފްކޯއަށް ގަނެފައިވާ ކަމަށެވެ.
އެރަށުގައި ހުރި ކާރުޚާނާ އިތުރަށް ތަރައްގީކޮށް، އެރަށުގެ ބަނދަރުވެސް އިތުރަށް ތަރައްގީކޮށް، އެކާރުޚާނާއަކީ، ނަފާވާ ތަނަކަށް ހެދުމަކީ، ސަރުކާރުގެ ވިސްނުންކަމުގައި ފިޝަރީޒް މިނިސްޓަރު ވަނީ ވިދާޅުވެފައެވެ.
