ރިޔާސީ އިންތިޚާބުގައި ރައީސް މުއިއްޒު ވީ ވައުދާ އެއްގޮތައް މަސްކިލޯ އެއް ގަންނަ އަގު 20ރ. އަށް ބޮޑުކުރާނެ ތާރީޚަކާއި ގުޅޭ މަޢުލޫމާތު ހޯދަން ކެއުޅުން މުއިއްޒު އާ ބައްދަލު ކޮށްފި އެވެ.

ރައީސް އޮފީހުން ނެރެފައިވާ ބަޔާނެއްގައި ބުނެފައިވާ ގޮތުގައި މިއީ ރައީސް މުއިއްޒު ކެއުޅުންނާ ބައްދަލުކުރެއްވި ތިން ވަނަ ފަހަރެވެ.

ހޯމަ ދުވަހު ހެނދުނު ރައީސް އޮފީހުގައި ބޭއްވުނު ބައްދަލުވުމުގައި، ކެއުޅުން ވަނީ މަސްވެރިކަމުގެ ސިނާއަތުގައި ރަނގަޅުކުރަން ބޭނުންވާ ކަންކަން މުއިއްޒު އާ ހިއްސާކޮށްފައެވެ. އެގޮތުން އެންމެ އިސްކަމެއްގެ ގޮތުގައި ފާހަގަ ކުރެވުނީ މަސްކިލޯއެއްގެ އަގު 20ރ. އަށް ބޮޑު ކުރާނެ ތާރީޚެއް ސާފު ކުރުމެވެ.

މަސްވެރިންނާ މުއިއްޒު އެންމެ ފުރަތަމަ ބައްދަލު ކުރެއްވީ ޑިސެމްބަރު 9، 2023 ގަ އެވެ. އެ ބައްދަލުވުމުގައި ވެސް މަސްވެރިން އެދުނީ މަސް ގަންނަ އަގު 20ރ. އަށްވުރެ ކުޑަ ނުކުރުމަށެވެ. އޭރު މިފްކޯ އަށް މަސް ގަންނަމުން ދިޔައީ ކިލޯ އެއް 25ރ. ގެ މަގުންނެވެ.

އޭގެފަހުން ޑިސެމްބަރު 4، 2024 ގައި މަސްވެރިންނާ މުއިއްޒު ބައްދަލު ކުރެއްވުމުން ވެސް މަސްވެރިންގެ އެންމެ ބޮޑު ކަންބޮޑުވުމަކަށް ފާހަގަ ކުރީ މަސް ގަންނަ އަގު ކުޑަވުމެވެ. އެއާ އެކު މަސް ގަންނަ އަގު 20ރ. އަށް ވުރެ ބޮޑު ކުރުމުގެ ކަންކަން ބައްލަވައި އެކަމަށް ހައްލު ހޯދުމަށްޓަކައި ވަރަށް އަވަސް ފިޔަވަޅުތަކެެއް އަޅުއްވާނެ ކަމަށް މުއިއްޒު ވަނީ ވިދާޅުވެފައެވެ.

ހޯމަ ދުވަހުގެ ބައްދަލުވުމުގައި ކެއުޅުން ފާހަގަކުރި އެހެނިހެން މައްސަލަތަކުގެ ތެރޭގައި، ރާއްޖޭގެ އެންވެރިކަން ދަށްވެފައިވާ މައްސަލައާއި، ބޭންކް އޮފް މޯލްޑިވްސް އިން ލޯނު ނެގުމުގައި ދިމާވާ ދަތިތަކާއި، މަސްވެރިކަމުގެ ލައިސަންސް ހޯދުމުގައި ހުރި ގޮންޖެހުންތައް ހިމެނެއެވެ. އަދި މިފްކޯގެ މަސްކިރާ ކައްޓާތައް ޑިޖިޓަލް ކައްޓާއަށް ބަދަލުކުރުމަށް ވެސް ކެއުޅުން އެދިފައިވެއެވެ.

ރައީސް މުއިއްޒު ވިދާޅުވި ގޮތުގައި މަސް ގަންނަ އަގު ބޮޑުކުރެވޭނީ، މަސްކިރާތާ 48 ގަޑިއިރުތެރޭ ފައިސާ ދިނުމުގެ ނިޒާމު ހަރުދަނާ ވުމުންނެވެ. އެހެން ނަމަވެސް، އަގު ބޮޑުކުރެއްވުމަކީ ކަށަވަރު ކަމެއްކަމުގެ ޔަޤީންކަން އެމަނިކުފާނު ދެއްވިއެވެ.

މަސްކިރާތާ 48 ގަޑިއިރުގެ ތެރޭގައި ފައިސާ ދިނުމަކީ ވެސް ރައީސް މުއިއްޒުގެ ވައުދެކެވެ. ވެރިކަމަށް ދެ އަހަރު ވެގެން ދާ އިރު މުއިއްޒުގެ ވާހަކަ ފުޅުން ދޭހަވީ އަދި ވެސް ފައިސާ ދިނުމުގެ ނިޒާމު ހަރުދަނާ ކުރެވިފައި ނުވާ ކަމެވެ. އޭގެ އިތުރުން ރައީސް މުއިއްޒުގެ ވައުދުގައި އޮތީ މަސްވެރިން ކިރާ މަހަށް ޑޮލަރުން އަގު ދެއްކުމެވެ.

ބޮޑު ކަންނެލީގެ މަސްވެރިންނަށް ކިލޯ އަކަށް 80ރ އާއި 100ރ ގެ އަދަދެއް ދެއްވާނެ ކަމަށާއި އަދި މިފްކޯ އަށް ބޮޑު ކަންނެލި ކިރާނެ ކަމަށް މުއިއްޒު ވައުދުވެފައިވީ ނަމަވެސް އަދި މިހާތަނަށް އެ ވައުދު ފުއްދުމަށް ކުރެވިފައިވާ އެއްވެސް ކަމެއްގެ ވާހަކަ އެއް ސަރުކާރުން ހާމަ ކޮށްފައެއް ނުވެއެވެ.

ބޭންކް ލޯނުތަކާ ގުޅޭގޮތުން ވާހަކަދައްކަވަމުން، ލޯނު ނެގުމުގެ އިޖުރާއަތުތައް ލުއިކޮށްދިނުމަށް ބޭންކާ މަޝްވަރާކުރައްވާނެ ކަމަށް ރައީސް ވިދާޅުވިއެވެ.

ރާއްޖޭގެ އެންވެރިކަން ދަށްވެފައިވާ ކަމަށާއި، އެންވެރިކަން އެންމެ ރަނގަޅު އަތޮޅަކީ ވ. އަތޮޅުކަން މަސްވެރިން ފާހަގަ ކުރުމުން، އަދި ވ. އަތޮޅުގައި ކުރިއަށްގެންދާ ބިންހިއްކުމުގެ މަޝްރޫއުތައް މަސްވެރިންގެ ލަފަޔާއެކު ކުރިއަށް ގެންދަވާނެ ކަމަށް ވެސް މުއިއްޒު ވިދާޅުވިއެވެ.

އެސްޓީއޯ އިން ތެޔޮ ވިއްކުމުގެ ޚިދުމަތް ރާއްޖޭގެ ހުރިހާ އަތޮޅަކަށް ފުޅާކުރުމުގެ މަސައްކަތް އަންނަ އަހަރުގެ މާރިޗު މަހަށް ނިންމުމަށް ރޭވިފައިވާކަން ރައީސް ހާމަކުރެއްވިއެވެ. މީގެއިތުރުން މިފްކޯ އިން ތެޔޮ ވިއްކަން ފެށުމަށް ކުރެވެމުންދާ މަސައްކަތުގެ މައުލޫމާތުވެސް ކެޔޮޅުންނާ ހިއްސާކުރެއްވިއެވެ.

ބައްދަލުވުން ނިންމަވާލައްވަމުން ރައީސް މުއިއްޒު ވަނީ، މަސްވެރިންނާއި ކެއުޅުންގެ ކަންބޮޑުވުންތަކަށް އަވަސް ހައްލެއް ހޯދައިދެއްވުމަށް ސަރުކާރުން މަސައްކަތްކުރައްވާނެ ކަމުގެ ޔަޤީންކަން އަލުން ދެއްވާފައެވެ.

މިދިޔަ އަހަރު އެންމެ ފަހުން ރައީސް މުއިއްޒު މަސްވެރިންނާ ބައްދަލު ކުރެއްވި އިރު ވެސް އަދި ހޯމަ ދުވަހު ކެއުޅުންނާ އެކު ބައްދަލު ކުރެއްވި އިރުވެސް ރާއްޖޭގެ އެންމެ ބޮޑު އިދިކޮޅު ޕާޓީ - އެމްޑީޕީ އިން އޮތީ ސަރުކާރުން ރައްޔިތުންނަށް ވެފައިވާ ވައުދުތައް ނުފުއްދާ ރައްޔިތުންގެ ފައިސާ ލޫޓު ވަމުން ގެންދާ ކަމަށް ބުނެ ބޮޑު އިހުތިޖާޖަކަށް ގޮވާލާފައެވެ.