ދިވެހި ފުލުހުންގެ ޚިދުމަތަށް 89 އަހަރު
ފުލުހުންގެ މައި އިދާރާ ކުރިމަތީގައި ދިދަ ނެގުމުގެ ރަސްމިއްޔާތެއް ބޭއްވި
ދިވެހި ފުލުހުންގެ ހިދުމަތަށް 89 އަހަރު ފުރުމުގެ ރަސްމިއްޔާތުގެ ތެރެއިން
ދިވެހި ފުލުހުންގެ ހިދުމަތަށް 89 އަހަރު ފުރުމުގެ ރަސްމިއްޔާތު ބާއްވަފިއެވެ.
މި ރަސްމިއްޔާތުގައި ހޯމް މިނިސްޓަރ ޝެއިޙް އިމްރާން އަބްދުﷲ ބައިވެރިވެ ވަޑައިގަންނަވާފައިވެއެވެ. ފުލުހުންގެ 89 ވަނަ އަހަރީ ދުވަހުގެ މުނާސަބަތުގައި ފުލުހުންގެ މައި އިދާރާ ކުރިމަތީގައި ދިދަ ނެގުމުގެ ރަސްމިއްޔާތެއް ބާއްވާފައިވަނީ ހޯމަ ދުވަހުގެ ރޭ 00:00 ގައެވެ.
އެކަމާ ގުޅޭގޮތުން ފުލުހުން ބުނެފައިވަނީ، ކޮވިޑްގެ ބަލިމަޑު ކަމަށްފަހު ކުރީގައި އޮންނަ އުސޫލުން ދިދަ ނެގުމުގެ ރަސްމިއްޔާތު ކަމާއެކު ބޭއްވިގެން ދިޔުމަކީ ލިބޭ ވަރަށް ބޮޑު އުފަލެއް ކަމަށެވެ. ދިވެހި ފުލުހުންގެ ޚިދުމަތުން ވަނީ ހިދުމަތުގައި ދެމިތިއްބެވި އަދި ފުލުހުންގެ މުއައްސަސާއަށް ހިދުމަތްކޮށްދެއްވި ހުރިހާ ބޭފުޅުންނާއި އެބޭފުޅުންގެ އާއިލާތަކަށް ދުވަހުގެ ތަހުނިޔާ ދަންނަވާފައެވެ.
ދިވެހި ފުލުހުންގެ ޚިދުމަތް ރަސްމީކޮށް ފެށިގެން ދިޔައީ 1933 މާރިޗު 29 ވަނަ ދުވަހު، ރާއްޖޭގެ ކީރިތި މަހާރަދުން، އައްސުލްތާން މުޙައްމަދު ޝަމްސުއްދީން ތިނެއް، ''ފުލުހު މީހުންގެ ގާނޫނު'' ތަސްދީގު ކުރެއްވުމާ ގުޅިގެންނެވެ. މި ގާނޫނަކީ 1932 ޑިސެންބަރު 22 ވަނަ ދުވަހު ދިވެހިންނަށް ލިބުނު ފުރަތަމަ ގާނޫނު އަސާސީ އެވެ.
ދިވެހިންގެ ފުލުހުންގެ ޚިދުމަތުން މައުލޫމާތު ދޭ ގޮތުގައި މި ގާނޫނު އަސާސީގެ ދަށުން އެންމެ ފުރަތަމަ އުފެދުނު ފުލުހުންގެ ފައުޖުގައި ހިމެނެނީ 120 ފުލުހުންނެވެ. މި ފައުޖު ބެހިފައިތިބީ މާލޭގެ ހަތަރު އަވަށުގެ މައްޗަށެވެ. އެއީ މާފަންނު، މައްޗަންގޮޅި އަދި ހެންވޭރު، މިއިން ކޮންމެ އަވަށަކަށް 32 މީހުންނެވެ. ގަލޮޅަށް 24 މީހުންނެވެ.
އޭގެ އިތުރުން، 1992 ވަނަ އަހަރު ފުލުހުންގެ ޚިދުމަތް ވީހާގާތުން އަވަހަށް ރައްޔިތުންނަށް ފޯރުކޮށްދިނުމަށްޓަކައި، ފުލުހުންގެ ޚިދުމަތް މުޅިރާއްޖެއަށް ފުޅާކޮށް، ދެވޭ ޚިދުމަތުގެ ފެންވަރުމަތިކުރުމުގެ މަސައްކަތް ވަރަށް އަވަހަށް ފެށިގެން ދިޔަކަމަށް ފުލުހުން ބުނެއެވެ. އެގޮތުން، 1993 އޮކްޓޫބަރު 06 ވަނަ ދުވަހު ސ. ގަމުގައި ފުލުހުންގެ ޚިދުމަތްދޭން ފެށުނެވެ. މިއީ، މާލެއިން ބޭރުގައި ސިފައިން ގާއިމުވެ ތިބެގެން ފުލުހުންގެ ޚިދުމަތް ދިނުމުގެ ފެށުމުގެ ގޮތުގައި ދިވެހި ފުލުހުންގެ ޚިދުމަތުން ވަނީ ސިފަ ކޮށްފައެވެ.
ދިވެހި ފުލުހުންގެ ޚިދުމަތަށް 89 އަހަރު ވެފައިވާއިރު، ދާދި ފަހުން ވަނީ ދިވެހި ފުލުހުންގެ ޚިދުމަތުގެ އައު ގާނޫނަށް އަމަލުކުރަންވެސް ފަށާފައެވެ.
މި ގާނޫނަށް އަމަލުކުރަން ފެށުމާއެކު، ފުލުހުންގެ ޤާނޫނުގެ ދަށުން ގާއިމުކުރެވިފައިވާ "މޯލްޑިވްސް ޕޮލިސް ސަރވިސް"، މި ޤާނޫނުގެ ދަށުން އުފައްދާ "ދިވެހި ފުލުހުންގެ ޚިދުމަތް" އަށް ބަދަލުވާނެއެވެ. ނަމަވެސް "ދިވެހި ފުލުހުންގެ ޚިދުމަތް" އަށް އިނގިރޭސި ބަހުން ބޭނުންކުރާނެ ނަމަކީ "މޯލްޑިވްސް ޕޮލިސް ސަރވިސް" ކަމުގައި މި ގާނޫނުގައި ބަޔާންކޮށްފައިވެއެވެ.
