އައިއީޑީ ގޮއްވާލަން އުޅުނު މައްސަލަ: އިންޓެލް ރިޕޯޓު ކޯޓުގައި ބެލިޔަސް، ދިފާއަށް ދޫކުރިޔަސް ފުލުހުންގެ އުކުޅުތައް އެނގޭނެ
29 މާރިޗު 2022 | އަންގާރަ 05:08މި މައްސަލަ ކްރިމިނަލް ކޯޓުގައި ބައްލަވަނީ ގާޒީ އަލީ ނަދީމް
ކްރިމިނަލް ކޯޓް- މި މައްސަލަ ކްރިމިނަލް ކޯޓުގައި ބައްލަވަނީ ގާޒީ އަލީ ނަދީމް
2017 ވަނަ އަހަރުގެ އޭޕްރީލްމަހުގެ ތެރޭގައި މާލޭގައި އައިއީޑީއެއް ގޮއްވަން އުޅުނު ކަމުގެ ތުހުމަތުގައި ދައުވާ އުފުލި މީހުންނަށް އުފުލާފައިވާ ދައުވާތަކުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
އައިއީޑީއެއް ތައްޔާރުކުރުމަށް ބޭނުންވާ ތަކެއްޗާއި ކެމިކަލް، ތަނެއްގެ ތެރޭގައި ތައްޔާރުކޮށް އައިއީޑީއެއް ހަދާ އެ ގޮއްވާލުމަށް ރާވަމުންދާކަމުގެ ތުހުމަތުގައި ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ އިއުތިސާމް މުޙައްމަދު ސައީދާއި، މުޙައްމަދު ތަސްލީމާއި، ނާސިއު މުޙައްމަދުގެ އިތުރުން، ޝިމާން ޝަރީފެވެ. އެ 4 މީހުންގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރަން އުޅުމުގެ ކުށުގެ ދައުވާއެވެ.
މި އަޑުއެހުމުގައި އިއުތިސާމްގެ ފަރާތުން ވަނީ އޭނާގެ ބަލި ޙާލަތު ހުރި ގޮތުން، އޭނާގެ އަޑުއެހުންތައް ފަސްކޮށްދިނުމަށް އެދިފައެވެ. އޭނާގެ ބަލި ޙާލަތާއި ގުޅޭ ގިނަ ކަންބޮޑުވުންތަކެއް ހިއްސާ ކޮށްފައިވާއިރު، އޭގެ ތެރޭގައި އޭނާއަށް ދިމާވާ ނަފްސާނީ މައްސަލަތަކާއި، ދައުލަތުން އޭނާގެ ބޭސްފަރުވާއަށް އިހުމާލުވާކަން ބަޔާންކޮށް ހުށައެޅި ވާހަކަތައް ހިމެނެއެވެ. އެކަމާ ގުޅިގެން ގާޒީ ވަނީ ބަންދު މުރާޖައާ ކުރުމަށް އޭނާ އެދޭނަމަ އެކަމާ ގުޅޭ ލިޔެކިޔުންތައް ކޯޓަށް ހުށައެޅުމަށް ދަންނަވާފައެވެ.
ގާޒީ ވިދާޅުވީ، އޭނާގެ ނަފްސާނީ ޙާލަތަށް ބަލައި މައްސަލަ ލަސް ކުރެވޭނީވެސް އެކަމާއި ގުޅޭ ލިޔެކިޔުންތައް ހުށައެޅުމުން އެއަށް ބެލުމަށްފަހު ކަމަށެވެ.
މި މައްސަލަ ކްރިމިނަލް ކޯޓުގައި ބައްލަވަނީ ގާޒީ އަލީ ނަދީމެވެ.
މި މައްސަލައިގައި އަންގާރަ ދުވަހު އޮތް އަޑުއެހުމަކީ ދައުލަތުން ހުށައަޅާފައިވާ ހެކި ރައްކާތެރި ކުރުމުގެ އަމުރާއި ގުޅޭގޮތުން ގޮތެއް ނިންމުމަށް ބޭއްވި އަޑުއެހުމެކެވެ. އޭގެ ތެރެއިން ބައެއް ހެކިތައް އެއްކޮށް ސިއްރު ކުރުމާއި، ވަކި މިންވަރަކަށް ހާމަކުރުމަށް ދައުލަތުން އެދެއެވެ. ސިއްރު ކުރަން އެދިފައިވަނީ ސިއްރު ހެކިންނަކީ ކޮން ބައެއްކަން އެނގޭފަދަ ހެކިތަކެވެ. އެއީ ސިއްރު ހެކި 1 ފުލުހުންގެ ތަހުގީގަށް ދީފައިވާ ބަޔާނެވެ.
ވަކި މިންވަރަކަށް ހާމަކުރުމަށް އެދޭ ލިޔުންތަކުގެ ތެރޭގައި އައިއީޑީ ތައްޔާރު ކުރުމާއި ގުޅޭގޮތުން އެމްއެންޑީއެފުން ހުށައަޅާފައިވާ ރިޕޯޓުތަކާއި، އިންޓެލިޖެންސް ރިޕޯޓު ހިމެނެއެވެ.
މި މައްސަލައިގައި ގާޒީ އަލީ ނަދީމް ނިންމެވީ ސިއްރު ހެކި 1 ފުލުހުންގެ ތަހުގީގަށް ދީފައިވާ ބަޔާން ސިއްރު ކުރުމަށެވެ. އެގޮތުން އާންމު އުސޫލުން ސިއްރު ހެކިންނަކީ ކޮން ބައެއްކަން އެނގޭނެ މައުލޫމާތު ސިއްރު ކުރުމަށްފަހު ދިފާއަށް ދޫކުރި ނަމަވެސް، މި ބަޔާނަށް ބަލާއިރު، އެފަދަ މައުލޫމާތުތައް ސިއްރު ކުރުމުންވެސް އެ ސިއްރު ހެކިން ދެނެގަތުމުގެ ފުރުސަތު އޮތްކަމަށް ދެކިވަޑައިގަންނަވާކަމަށް ގާޒީ ވިދާޅުވިއެވެ.
އޭގެ އިތުރުން، ދައުލަތުން އެދިފައިވާ ގޮތަށް އައިއީޑީ ތައްޔާރު ކުރުމާއި ގުޅޭގޮތުން އެމްއެންޑީއެފުން ހުށައަޅާފައިވާ ރިޕޯޓުވެސް ޝަރީއަތަށް ހާޒިރުވެ، ވަކި މިންވަރަކަށް ހާމަކުރުމުގެ އަމުރެއް ގާޒީ ވަނީ ނެރުއްވާފައެވެ.
އަދި، ފުލުހުންގެ އުކުޅުތައް އެނގޭނެކަމަށް ބަޔާންކޮށް އިންޓެލިޖެންސް ރިޕޯޓު ސިއްރު ކުރުމަށް ދައުލަތުން އެދުނު ނަމަވެސް، ދައުލަތުން އެދިފައިވާ ގޮތަށް ޝަރީއަތަށް ހާޒިރުވެ ރިޕޯޓު ބެލޭނަމަ ހަމަ އެ އުކުޅުތައް އެނގިގެން ދާނެ ނޫންތޯ ގާޒީ ވިދާޅުވިއެވެ.
އިންޓެލް ރިޕޯޓު ކޯޓުގައި ބެލިޔަސް، ދިފާއަށް ދޫކުރިޔަސް ފުލުހުންގެ އުކުޅުތައް އެނގޭއިރު، ދައުލަތުގެ ހުށައެޅުމުގެ މަޤްސަދު ވަކި ޙާސިލެއް ނުވާނެކަމަށްވެސް ގާޒީ ވިދާޅުވިއެވެ. ވުމާއެކު އެ ހުށައެޅުން ދައުލަތުން އެދުނު ގޮތަށް ނިންމައެއް ނުދެއްވިއެވެ. ގާޒީ ވަނީ އެ ސަބަބަށް ރިއާޔަތް ކުރައްވައި އިންޓެލިޖެންސް ރިޕޯޓު ދިފާއަށް ހާމަކުރެއްވުމަށް ނިންމަވާފައެވެ.
ދެން މި މައްސަލައިގައި އޮންނާނީ ދައުވާ ސާފުކޮށް ޖަވާބުދާރީވުމާއި، ދިފާއުން ހެކި ހާމަކުރުމެވެ. އެއަށްފަހު ދެން އޮންނާނީ މަދަނީ މިންގަނޑުން ކުރިއަށް ގެންދެވިދާނެތޯ ކަނޑައެޅުމުގެ ބައެވެ.
