މެމްބަރު ސައީދަށް ދިމާވި އަނިޔާވެރި ގޮތުން ހިތް ފަޅައިގެންދޭ - ރައީސް ނަޝީދު
މުޒާހަރާއިން ހައްޔަރުކުރި މީހުން ދޫކޮށްލުމަށް ގޮވާލައި، ހޯމަ ދުވަހުގެ ޖަލްސާއަށް ހުށައެޅި މައްސަލަ ބަލައި ނުގަނޭ
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
މުޒާހަރާގައި ހައްޔަރު ކުރުމަށްފަހު ސައިދާ މެދު އަމަލުކޮށްފައިވާ ގޮތުން ހިތްފަޅައިގެންދާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ، ހުކުރު ދުވަހު ޕީޕީއެމުން ކުރި މުޒާހަރާގައި ހައްޔަރު ކުރުމަށްފަހު ޖަލަށް ގެންގޮސް އަނިޔާވެރިގޮތަކަށް އަމަލުކޮށްފައިވާކަމަށް މާވަށު ދާއިރާގެ މެމްބަރު މުހައްމަދު ސައީދު ވިދާޅުވުމުންނެވެ. ރައީސް ނަޝީދު ވިދާޅުވީ، 24 ގަޑިއިރު ގޮޅީގައި ހުންނަވަން ޖެހިވަޑައިގަތުމާއި ގޮނޑީގައި އިންނަވަން ޖެހި ވަޑައިގަތުންފަދަ އަނިޔާވެރި ކަންކަމުން އެމަނިކުފާނުގެ ހިތް ފަޅައިގެންދާ ކަމަށެވެ.
ސައީދު ވިދާޅުވީ އިންސާނީ ހައްގުތަކޭ ކިޔައިގެން މިސަރުކާރުން ވާހަކަދައްކަން ލަދު ގަންނަން ޖެހޭކަމަށާއި، ހުކުރު ދުވަހުގެ މުޒާހަރާގައި ހައްޔަރު ކުރުމަށްފަހު ޖަލަށް ގެންގޮސް ބެހެއްޓި ގޮޅީގެ ފާޚާނާގައިވެސް ހުރީ ކެމެރާ ހަރުކޮށްފައިކަމަށެވެ. ސައީދު ވިދާޅުވީ، ގާނޫނު އަސާސީގައި ބަންދު ކުރެވޭ މީހާ 24 ގަޑިއިރުގެ ތެރޭގައި ގާޒީއެއްގެ ކުރިމައަށްޗަށް ގެންނަން ޖެހޭކަމަށް ބުނެފައިވާތީ 17 މީހުން ގެނެސް 8 ގަޑިއިރު ވަންދެން ގޮނޑި ތަކުގައި އަތުރާފައި ބޭތިބުން ފަދަ ބޮޑެތި ލާއިންސާނީ އަމަލު ހިންގާފައިވާކަމަށެވެ.
މުޒާހަރާއިން ހައްޔަރުކުރި މީހުން ދޫކޮށްލުމަށް ގޮވާލައި، ހޯމަ ދުވަހުގެ ޖަލްސާއަށް ނައިފަރު ދާއިރާގެ މެމްބަރު އަހުމަދު ޝިޔާމް ހުށައެޅުއްވި މައްސަލަ މަޖިލީހުންވަނީ ބޭރު ކޮށްލާފައެވެ.
މައްސަލަ މަޖިލީހުން ބޭރުކޮށްލީ 26 މެމްބަރުންގެ ވޯޓުންނެވެ. ބަހުސް ކުރުމަށް ފެންނަ ކަމަށް ވޯޓު ދިނީ 3 މެމްބަރެކެވެ.
