ޖޯޖްއާއި އަމާލް ކްލޫނީއަށް އެއްމާބަނޑު ދެކުދިން ލިބިއްޖެ

ކުރީގެ ރައީސް މުހައްމަދު ނަޝީދުގެ ގާނޫނީ ޓީމްގައި ހިމެނޭ އަމާލް ކްލޫނީއާއި ފިރިމީހާ ޖޯޖަށް އެންމާބަނޑު ދެކުދިން ލިބިއްޖެއެވެ.

އަންގާރު ދުވަހުގެ ހެނދުނުގެ ވަގުތެއްގައި އަމާލް ދެ ކުދިން ވިހާފައިވާކަމަށާއި، މަންމައާއި ކުދިންގެ ހާލު ރަނގަޅުކަމަށް އެމީހުންގެ ތަރުޖަމާނު ސްޓޭން ރޮޒެންފީލްޑް ވަނީ އީމޭލުން ޔޫއެސްއޭ ޓުޑޭއަށް އަންގާފައެވެ.

"ޖޯޖް ވަނީ ސިޑޭޓްކޮށްފައި، ދުވަސްކޮޅެއް ތެރޭ ހާލު ރަނގަޅުވާނެކަމަށް ބެލެވެނީ"، ސަމާސަ ގޮތަކަށް ރޮޒެންފީލްޑް ބުންޏެވެ.

ޖޯޖްއާއި އަމާލްގެ ކުދިންގެ ނަމަކީ އެލާއާއި އެލްގްޒޭންޑަރކަން ވެސް ރޮޒެންފީލްޑް ހާމަކޮށްފައިވެއެވެ.

ގިނަ ދުވަސްތަކެއް ވަންދެން "ދުނިޔޭގެ އެންމެ ކާމިޔާބު ބެޗަލާ" ގޮތަށް ހުރުމަށްފަހު ޖޯޖްގެ ހަޔާތް ބަދަލުވީ 2013 ގައެވެ. އެ އަހަރު އަމާލްއާ އޭނާއާ ދިމާވެއެވެ. އަދި 2014 ވަނަ އަހަރުގެ އޭޕްރިލްގައި ވަނީ ޕްރޮޕޯޒްކޮށްފައެވެ. ކައިވެނިކޮށްފައިވަނީ އެ އަހަރުގެ ސެޕްޓެމްބަރު މަހު ވެނިސް، އިޓަލީގައެވެ.