ރައީސް އިބްރާހީމް މުޙައްމަދު ޞާލިޙް އައްޑޫ ސިޓީ ހުޅުމީދޫ އަށް ވަޑައިގެންފި
މި ދަތުރުފުޅުގެ ތެރެއިން މީދޫ ބަނދަރު ހުޅުވައިދެއްވާނެ
ރައީސް ސޯލިހު ހުޅުމީދޫ އަށް ވަޑައިގަތުން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް, އައްޑޫ ސިޓީގެ ހުޅުމީދޫ އަށް ވަޑައިގެންފިއެވެ.
އެމަނިކުފާނާއި، އަދި އެމަނިކުފާނުގެ އަނބިކަނބަލުން ފަޒްނާ އަހުމަދު ގެ އިތުރުން އަރިހުގައި ވަޑައިގެންނެވި ފަރާތްތަކަށް އެ 2 އަވަށުން ވަނީ ހޫނު މަރުހަބާއެއް ދަންނަވާފައެވެ.މަރުހަބާ ދެންނެވުމުގައި އިސްކޮން ތިއްބެވީ މީދޫ ދާއިރާގެ މެންބަރު ރޮޒައިނާ އާދަމާއި، ހުޅުދޫ ދާއިރާގެ މެންބަރު އިލްޔާސް ލަބީބުގެ އިތުރުން އައްޑޫ ސިޓީގެ މޭޔަރު އަލީ ނިޒާރާއި، ދައުލަތުގެ މުއައްސަސާތަކުގެ ވެރިންނެވެ. އަދި ގިނަ އަދަދެއްގެ އާންމުންވެސް މަރުހަބާދެންނެވުމަށް ނިކުމެފައި ވެއެވެ.
އައްޑޫ ސިޓީއަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން، އެމަނިކުފާނު ހުޅުދޫ މީދޫ އަށް ވަޑައިގެން، އެ ދެ އަވަށުގެ އެކި ތަންތަނަށް ވަޑައިގަތުމަށް ވަނީ ހަމަޖެހިފައެވެ. އެގޮތުން، މާލެއިން ބޭރުގައި ފުރަތަމަ ފަހަރަށް ގާއިމްކުރި ޑިޓޮކްސް ސެންޓަރު ބައްލަވާ ލައްވާ، ހުޅުދޫ ބަނދަރުގެ މަސައްކަތް ބައްލަވާ ލައްވާނެއެވެ. އަދި މި ދަތުރުފުޅުގެ ތެރެއިން، މީދޫ ބަނދަރު ރަސްމީކޮށް އެމަނިކުފާނު ހުޅުވައިދެއްވާނެއެވެ.
މީދޫ ބަނދަރުގެ މަސައްކަތުގެ ތެރެއިން އެ ބަނދަރުގެ ބޭރު ތޮށި މަރާމާތުކޮށްފައިވެއެވެ. މި މަސައްކަތް ކުރިއަށް ގެންދިޔައީ އެމްޓީސީސީ އާއި ހަވާލުކޮށްގެންނެވެ. ބައެއްބަދަލުތައް ހިމަނައިގެން މި މަސައްކަތަށް ސަރުކާރުން ވަނީ 36.5 މިލިއަން ރުފިޔާ ހަރަދުކޮށްފައެވެ.
މީދޫ ދާއިރާގެ މެންބަރުކަމަށް ރޮޒައިނާ ވަޑައިގެން ރައްޔިތުންގެ އެދުމުގެ މަތިން ސަރުކާރާއި މަޝްވަރާތަކެއް ކޮށް ބަނދަރުގެ މަސައްކަތަށް ބޮޑެތި ބަދަލުތަކެއް ގެނެސްފައިވެއެވެ. އޭގެ ތެރޭގައި ބަނދަރު އިތުރަށް ބޮޑުކޮށް، ޒަމާނީ އަދި ފަސޭހަ ބަނދަރެއް މިހާރު ވަނީ ހަދާ ނިންމާފައެވެ.
