ތަރައްގީގެ ޕްރޮޖެކްޓުތަކާއެކު ވެލާކަހަނބު ބިސްއަޅާ މާހައުލުތައް ހަލާކުވޭ: ނައީމް
ދިރޭތަކެތީގެ މާހައުލަށް ގެއްލުންނުވާނެހެން ތަރައްގީގެ މަސައްކަތްތައް ކުރިއަށްގެންދަންޖެހޭ
އިބްރާހިމް ނައީމް
ރަށްރަށުގައި ކުރިއަށްގެންދާ ތަރައްގީގެ އެކި ޕްރޮޖެކްޓުތަކުގެ ސަބަބުން ވެލާކަހަނބު ބިސްއަޅާ މާހައުލަށް ގެއްލުންވަމުންދާކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވެއްޖެއެވެ.
ވެލާ ބިސްއަޅާ މާހައުލުތަކާ ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ނައީމް ވިދާޅުވީ, ތަރައްގީގެ މަސައްކަތްތައް ކުރިނަމަވެސް ދިރޭ ތަކެތީގެ މާހައުލަށް ގެއްލުންނުވާނެގޮތަށް އެކަން ކުރަންޖެހޭ ކަމަށެވެ. ތަރައްގީގެ މަޝްރޫއުތަކާއެކު ވެލާކަހަނބު ފަދަ ތަކެތި ބިސް އަޅާ ތަންތަނަށްވެސް ގެއްލުންވަމުންދާކަމަށް ނައީމް ވިދާޅުވިއެވެ.
މިގޮތުން މީހުން ދިރިއުޅޭ ރަށްރަށުގެ އައްސޭރިފަށް ހިމާޔަތްކުރުމަށް ކުރިއަށްގެންދާ ޕްރޮޖެކްޓުތަކާއި އެއަރޕޯޓުތައް ތަރައްގީކުރުމުގެ މަސައްކަތްތަކުގެ ސަބަބުން ވެލާކަހަނބު ބިސް އަޅަމުންދާ ތަންތަނަށް ގެއްލުންވަމުންދާކަމަށް ނައީމް ވިދާޅުވިއެވެ. ނައީމް ވިދާޅުވީ މީގެ ކުރިން ނ. މާފަރަށްވެސް ވެލާކަހަނބު ބިސް އެޅުމަށް އަރާކަން ފާހަގަކުރެވިފައިވާކަމަށެވެ. އެހެންނަމަވެސް އެރަށުގައި އެއަރޕޯޓު ތަރައްގީކުރުމުން އެރަށަށް ބިސް އެޅުންވެސް ހުއްޓިފައިވާކަމަށް ނައީމް ވިދާޅުވިއެވެ.
އެހެންކަމުން އެތަކެތީގެ މާހައުލަށް ގެއްލުން ނުވާނެހެން ތަރައްގީގެ މަޝްރޫއުތައް ހިންގުމަށް ސަމާލުކަން ދޭންޖެހޭކަމަށް ނައީމް ވިދާޅުވިއެވެ. އަދި ވެލާ ބިސް އަޅަން އަރާ ފަޅު ރަށްރަށުގައި އެކި މަސައްކަތްތައް ކުރާއިރުވެސް އެތަކެތީގެ މާހައުލަށް ގެއްލުން ނުވާނެގޮތަށް އެކަން ކުރަން އަންގާ ކަމަށް ނައީމް ވިދާޅުވިއެވެ.
ނައީމް ވިދާޅުވީ އައްސޭރިފަށް ހިމާޔަތްކުރުމުގެ މަސައްކަތް ކުރެވޭނެ އެކި ގޮތްތައް މިހާރު އެބަހުރި ކަމަށެވެ. މިގޮތުން ވަށައިގެން ހިލަ ޖެހުމުގެ ބަދަލުގައި އައްސޭރިފަށަށް ވެލި އަޅައިގެން ގޮނޑުދޮށްތައް އެ އޮންނަ ގޮތަށް ބޭއްވުމަކީވެސް ކުރެވިދާނެ ކަމެއް ކަމަށް ނައީމް ވިދާޅުވިއެވެ. މިއީ ކޮންމެވެސް ވަރެއްގެ ޚަރަދެއް ހިނގާނެ މަސައްކަތެއްނަމަވެސް މިގޮތަށް މިކަން ކުރާނަމަ ވެލާ ކަހަނބަށް ބިސް އެޅުމަށް އަރަން ފަހި މާހައުލެއް އޮންނާނެ ކަމަށް ނައީމް ވިދާޅުވިއެވެ.
