"ފަނޑިޔާރުން މީހަކު ޖަލަށްލާން، ނުވަތަ އަދަބެއްދޭން ހުކުމްކުރަނީ އެކަން ކުރާހިތަކުންނޫން"
ސިމްޕޯޒިއަމްގެ ލަނޑުދަނޑިތައް ހާސިލުކުރުމަށް ފަނޑިޔާރުންގެ ބައިވެރިވުން މުހިއްމު
ފަނޑިޔާރުންގެ މަހާސިންތާ 2022 އިފްތިތާހުކުރުމަށް ބޭއްވި ރަސްމިއްޔާތުގައި އުއްތަމަ ފަނޑިޔާރު ޑރ. މުއުތަސިމް އަދުނާން ވާހަކަ ދައްކަވަނީ
ފަނޑިޔާރުން ޖިނާއީ މައްސަލަތަކުގައި މީހަކު ޖަލަށްލާން ނުވަތަ އަދަބެއް ދޭން ހުކުމްކުރަނީ އެކަން ކުރާހިތުން ނޫންކަމަށް އުއްތަމަފަނޑިޔާރު ޑރ. މުއުތަސިމް އަދުނާން ވިދާޅުވެއްޖެއެވެ.
އުއްތަމަފަނޑިޔާރު އެހެން ވިދާޅުވީ "ފަނޑިޔާރުންގެ މަހާސިންތާ 2022" އިފްތިތާހުކުރުމަށް ހޮނިހިރު ދުވަހު ބޭއްވި ޚާއްސަ ރަސްމިއްޔާތުގައި ދެއްކެވި ވާހަކަފުޅުގައެވެ. އެގޮތުން ގިނަ ދުވަހު ޖުޑީޝަރީއަށް ޚިދުމަތްކުރާ ފަނޑިޔާރުންގެ އަގުވަޒަން ކުރުން މުހިއްމުކަމަށް އެމަނިކުފާނުގެ ވާހަކަފުޅުގައި ވިދާޅުވިއެވެ.
މި ސިމްޕޯޒިއަމްގެ ލަނޑުދަނޑިތައް ހާސިލުކުރުމަށް ފަނޑިޔާރުންގެ ބައިވެރިވުން މުހިއްމުކަން ފާހަގަ ކުރައްވައި އެމަނިކުފާނު އިތުރަށް ވިދާޅުވީ، މި މަހާސިންތާ މައިގަނޑު ގޮތެއްގައި އަމާޒު ކުރެވިފައިވަނީވެސް ޝަރުއީ ދާއިރާގެ ދުރު ރާސްތާ ޕްލޭނެއް އެކުލަވާލުމުގެ މައްޗަށް ކަމަށެވެ.
ގާނޫނު އަސާސީ ވުޖޫދަށް އައި ފަހުން ޝަރުއީ ދާއިރާ އެކި ގޮތްގޮތަށް ބައްޓަންވަމުން އައިސްފައިވާކަމަށްވެސް އުއްތަމަފަނޑިޔާރު ވިދާޅުވިއެވެ. ވަކިން ޚާއްސަކޮށް، 2008 ވަނަ އަހަރު ވުޖޫދުވި ގާނޫނު އަސާސީގައި ވަރަށް ފުރިހަމައަށް ރައްޔިތުންގެ ހައްގުތަކާގުޅޭ ބާބެއް އެކުލަވާލެވިފައިވާކަމަށް އެމަނިކުފާނު ވިދާޅުވިއެވެ. އަދި ރައްޔިތުންގެ އެ ހައަގުތައް ކަށަވަރުކުރެވޭނީ ކޯޓުތަކުން ކުރަންޖެހޭ ކަންކަން ފުރިހަމައަށް ކޮށްގެންކަމަށްވެސް އެމަނިކުފާނު ވިދާޅުވިއެވެ.
ކޯޓުތައް ތަރުތީބުކުރެވިފައިވާ ގޮތަށް އަލިއަޅުވާލައްވައި އެމަނިކުފާނު އިތުރަށް ވިދާޅުވީ، އެކަމުގެ ސަބަބުން އިލްމީ ގޮތުން އިތުރަށް ކުރިއެރުމުގެ އަމާޒެއް ހިފުމަށް މެޖިސްޓްރޭޓް ކޯޓުތަކުގެ ފަނޑިޔާރުންނަށްވެސް އެހީއަކަށް ވެގެންދާކަމަށެވެ.
އޭގެ އިތުރުން، އަދުލު އިންސާފު ގާއިމުކުރުމަށް ހާސިލުކުރަންޖެހޭ މަގުސަދުތައް މި މަހާސިންތާގެ ޒަރީއާއިން ހާސިލުވެގެން ދިއުމަކީ އެންމެ މުހިއްމު އެއް މަގުސަދުކަމަށްވެސް އެމަނިކުފާނު ވިދާޅުވިއެވެ. އެގޮތުން އަތޮޅުތެރޭގައި ދިމާވާ އެކި ގޮންޖެހުންތަކަށްވެސް އެމަނިކުފާނުގެ ވާހަކަފުޅުގައި އަލިއަޅުވާލައްވާފައިވެއެވެ. މިސާލަކަށް އެއްރަށުން އަނެއްރަށަށް މެޖިސްޓްރޭޓުން ބަދަލު ކުރުމާއި، ރަށްރަށުގެ އެކި ކޯޓުތަކަށް މީހުން ހާޒިރުކުރުން ފަދަ ކަންކަމުގައި ދިމާވާ ގޮންޖެހުންތަކަށް ހައްލުތަކެއް ހޯދުނު ނަމަވެސް، އަދިވެސް އެކަމުގައި ގޮންޖެހުންތައް ހުރިކަމަށް ވިދާޅުވިއެވެ.
މިހާރު ސުޕްރީމް ކޯޓާއި ހައިކޯޓުގައި, ދުރަށް ދައްކައިގެން ޝަރީއަތްތައް ކުރިއަށް ގެންދެވުނު ނަމަވެސް، ހުރިހާ ކޯޓެއްގައި އެ މަސައްކަތް ފެށުމަށް ވަގުތުތަކެއް ނަގާނެކަމަށް އުއްތަމަފަނޑިޔާރު ވިދާޅުވިއެވެ. އެހެންނަމަވެސް އެ ޓެކްނޮލޮޖީ ހުރިހާ ކޯޓުތަކަށް އެންމެ ފުރިހަމައަށް ބޭނުން ކުރެވޭގޮތަށް އިންތިޒާމުތައް ހަމަޖެއްސޭތޯ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުންވެސް ކެނޑިނޭޅި މަސައްކަތް ކުރަމުންދާކަން އެމަނިކުފާނު ފާހަގަ ކުރެއްވިއެވެ. މި ސިމްޕޯޒިއަމްގައި އެކަންކަމާއި ގުޅޭގޮތުން މަޝްވަރާ ކުރެވިދާނެކަމަށްވެސް ވިދާޅުވިއެވެ.
ފަނޑިޔާރުން ކުރާ ހުކުމުގެ އަސަރު މުޅި މުޖުތަމައަށްވެސް ކުރާކަން ފާހަގަ ކުރައްވައި އުއްތަމަފަނޑިޔާރު ވިދާޅުވަނީ އެ ހުކުމަކާ ގުޅިގެން ނުކުންނާނެ ނަތީޖާތަކާމެދު ވިސްނަވަންޖެހޭނެ ކަމަށެވެ. ފަނޑިޔާރުން މީހުންނަށް އަދަބުދެނީ އެކަން ކުރާ ހިތަކުން ނޫންކަމަށްވެސް އެމަނިކުފާނު ވިދާޅުވިއެވެ. އެހެންނަމަވެސް އެއީ މުޅި މުޖުތަމައުގެ މަސްލަހަތަށް ވިސްނާއިރު ކުރަންޖެހޭ ކަމެއްކަމަށް އެމަނިކުފާނު ވިދާޅުވިއެވެ.
އެމަނިކުފާނު ވަނީ ހިތްވަރު ގަދަކަމާއެކު، ގާނޫނު ބުނާ ގޮތަށް ހުކުމްކުރާ ބަޔަކަށް ފަނޑިޔާރުން ވާންޖެހޭކަމަށް ވިދާޅުވެފައެވެ. އަދި ފަނޑިޔާރުން ކުރާ ހުކުމްތަކާ ގުޅިގެން ފާޑުކިއުން އަމާޒުވީނަމަވެސް، އެކަންކަމަށް ކެތްތެރިވާންޖެހޭނެ ކަމަށްވެސް ވިދާޅުވިއެވެ،
