ފަނޑިޔާރުގޭގެ ދުރުރާސްތާ ޕްލޭން އެކުލަވާލުމުގައި ފަނޑިޔާރުންގެ ދައުރު ބޮޑު: ޗީފް ޖުޑީޝަލް އެޑްމިނިސްޓްރޭޓަރ
މިފަދަ އެކްޝަން ޕްލޭނެއް އެކުލަވާލުމަކީ މުހިއްމު މަސައްކަތެއް
ފަނޑިޔާރުންގެ މަހާސިންތާ 2022 އިފްތިތާހުކުރުމަށް ބޭއްވި ރަސްމިއްޔާތު
ފަނޑިޔާރުގޭގެ ދުރުރާސްތާ ޕްލޭން އެކުލަވާލުމުގައި ފަނޑިޔާރުންގެ ދައުރު ބޮޑުކަމަށް ޗީފް ޖުޑީޝަލް އެޑްމިނިސްޓްރޭޓަރ އާއިޝަތު ރިޒްނާ ވިދާޅުވެއްޖެއެވެ.
ރިޒްނާ އެހެން ވިދާޅުވީ ފަނޑިޔާރުންގެ މަހާސިންތާ 2022 އިފްތިތާހުކުރުމަށް ހޮނިހިރު ދުވަހުގެ ހެނދުނު ބޭއްވި ރަސްމިއްޔާތުގައި ވާހަކަދައްކަވަމުންނެވެ.
މި އަހަރުގެ ފަނޑިޔާރުންގެ މަހާސިންތާ ޚާއްސަކޮށްފައިވަނީ ފަނޑިޔާރުންނާއި ކޯޓުތަކުގެ ޗީފް އެޑްމިނިސްޓްރޭޓަރުންނާއި އިދާރީ ބޭފުޅުން ހިމެނޭގޮތަށް, ޝަރުއީ ދާއިރާގެ ސްޓްރެޓެޖިކް އެކްޝަން ޕްލޭނެއް އެކުލަވާލުމަށެވެ. އެގޮތުން މީގެ ކުރިންވެސް އެކި ސިފަސިފައިގައި ޝަރުއީ ދާއިރާގެ ޕްލޭންތައް އެކުލަވާލެވި، އެއަށް އަމަލުކުރަމުން ގޮސްފައިވާކަން ފާހަގަ ކުރައްވައި ރިޒްނާ ވިދާޅުވީ، ފަނޑިޔާރުންނާއި ފަނޑިޔާރުގޭގެ އިސް ފަރާތްތައްވެސް ހިމެނޭ ގޮތަށް މިހާރު މި ކުރިއަށްދާ އުސޫލުން މި މަސައްކަތް ކުރިއަށް ގެންދެވިފައިނުވާކަމަށެވެ.
ރިޒްނާ ވަނީ މިފަދަ އެކްޝަން ޕްލޭނެއް އެކުލަވާލުމަކީ މުހިއްމު މަސައްކަތެއްގެ ގޮތުގައި ސިފަކުރައްވާފައެވެ.
އޭގެ އިތުރުން، މި މަހާސިންތާގެ ޒަރީއާއިން އެކުލަވާލެވޭ ސްޓްރެޓިޖިކް އެކްޝަން ޕްލޭނަކީ އަދުލު އިންސާފުގެ ނިޒާމާއި ކޯޓުތަކުގެ އިދާރީ ހިންގުން އިތުރަށް ހަރުދަނާކުރުމަށް ކުރިއަށް އޮތް 5 އަހަރުގެ ތެރޭގައި ކުރެވިދާނެ ކަންކަން ބަޔާން ކުރެވިގެން އެކުލަވާލެވޭ ޕްލޭނަކަށް ވުން މުހިއްމުކަންވެސް އޭނާ ފާހަގަކުރެއްވިއެވެ. އަދި މިއީ މުޅި ޝަރުއީ ދާއިރާގެ ފެންވަރު މިހާރަށްވުރެ އިތުރަށް ރަނގަޅު ކުރެވޭނެ ފަދަ އެކްޝަން ޕްލޭނަކަށް ވެގެންދާނެކަމަށް އުއްމީދުކުރައްވާކަމަށްވެސް ރިޒްނާގެ ވާހަކާގައި ފާހަގަކުރެއްވިއެވެ.
ރިޒްނާ ވަނީ ބިނާކުރަނިވި މަޝްވަރާތަކެއްގެ ޒަރީއާއިން މި މަސައްކަތް ކުރެވިއްޖެނަމަ، މިފަދަ އެކްޝަން ޕްލޭނެއް އެކުލަވާލުމުގެ މަގުސަދު ހާސިލުކުރެވޭނެކަމަށް ވިދާޅުވެފައެވެ.
