ކުޑަކުދިންގެ އަދުލުގެ ގާނޫނު: ގިނަ ކަންކަން މަތިކޮށްފައިވޭ، އެމަސައްކަތްތައް ކުރުމަށް ބޮޑެތި ގޮންޖެހުންތަކެއް އެބަހުރި
މުއައްސަސާތައް ގުޅިގެން މަސައްކަތް ކުރަންޖެހޭ
މިނިސްޓަރ އޮފް ސްޓޭޓް ފޯ ހޯމް އެފެއަރޒް އަލީ ނަޒީރާއި، ކޮމިޝަނަރ އޮފް ޕޮލިސް މުހައްމަދު ހަމީދު
ކުޑަކުދިންގެ އަދުލުގެ ނިޒާމުގެ ތެރެއިން ގިނަ ކަންކަން މަތިކޮށްފައިވާ ކަމަށާއި، އެމަސައްކަތްތައް ކުރުމަށް ބޮޑެތި ގޮންޖެހުންތަކެއް އެބަހުރި ކަމަށް މިނިސްޓަރ އޮފް ސްޓޭޓް ފޯ ހޯމް އެފެއަރޒް އަލީ ނަޒީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ސްޓޭޓް މިނިސްޓަރު އަލީ ނަޒީރު ވިދާޅުވީ ކުޑަކުދިންގެ އަދުލުގެ ނިޒާމުގެ ތެރެއިން ގިނަ ކަންކަން މަތިކޮށްފައިވާ ޒިންމާތައް އަދާކުރުމުގެ މަސައްކަތްތައް ކުރަމުންދާ ކަމަށެވެ. މި މަސައްކަތްތަކީ ހޯމް މިނިސްޓްރީގެ އިތުރުން ކަމާއި ބެހޭ މުއައްސަސާތައް ގުޅިގެން މަސައްކަތްކޮށްގެން މެނުވީ ކާމިޔާބު ކުރުން އުނދަގޫ ކަމެއްގެ ގޮތުގައި ފާހަގަކުރެއްވިއެވެ. އަދި ވިދާޅުވީ އެންމެ ބޮޑު ގޮންޖެހުމަކީ ވަސީލަތްތައް ނުލިބުމާއި، އެކަށީގެންވާ މިންވަރަށް މުވައްޒަފުން ނުލިބުން ކަމަށެވެ.
ކުށުގެ ވެއްޓަށް ކުށަހެޅޭ ކުދިންނަށް މުޖުތަމައުއަށް ނެރުމެއް ގިނަ މަސައްކަތްތަކެއް ކުރަންޖެހޭ ކަން ފާހަގަކުރައްވައި ސްޓޭޓް މިނިސްޓަރު ވިދާޅުވީ ކުޑަކުދިންގެ އަދުލުގެ ގާނޫނުގެ ދަށުން 7 ބާވަތެއްގެ މަރުކަޒު ގާއިމްކުރަން ޖެހޭ ކަމަށެވެ. ނަމަވެސް ރާއްޖޭގައި މަރުކަޒުކޮށްގެން ފަރުވާ ދޭންޖެހޭ ކުދިންގެ އަދަދު އެހައި ގިނަ ނޫން ކަމަށާއި، އެހައި ގިނަ މަރުކަޒުތަކެއް ގާއިމް ކުރަންޖެހޭ ސަބަބު ނުވިސްނޭ ކަމަށެވެ. ރާއްޖޭގައި ކުށުގެ ވެއްޓަށް ހުށަހެޅޭ ކުދިންގެ ނިސްބަތުން މަދުއިރު، އެކުދިންނަށް އެކަށީގެންވާ އަޅާލުމާއި، ލޮއެއްބާއި ތަމްރީން ދޭން ޖެހޭ ކަމަށް ސްޓޭޓް މިނިސްޓަރު ވިދާޅުވިއެވެ. އަދި އެކުދިންނަށް އެކަށީގެންވާ ތަމްރީން ނުދެވުމަކީ ކުދިން ކުރާ ކުށްތައް ބޮޑުވެ، އަތް ނުފޯރާ ހިސާބަށް ދާ ސަބަބުގެ ގޮތުގައި ފާހަގަކުރެއްވިއެވެ.
ޖުވެނަލް ޖަސްޓިސްގެ ބެލުމުގެ ދަށުން ދ.ކުޑަހުވަދޫގައި ރެހެބިލިޓޭޝަން ސެންޓަރެއް ގާއިމްކުރުމުގެ މަސައްކަތްތައް ކުރިއަށްދާކަން ފާހަގަކުރައްވައި ސްޓޭޓް މިނިސްޓަރު ވިދާޅުވީ މިއަހަރުގެ ފަހުކޮޅު ނުވަތަ އަންނަ އަހަރުގެ ކުރީކޮޅު މަސައްކަތް ނިންމާއި، އެސެންޓަރުގައި ކުދިންނަށް ފަރުވާ ދެވެން ފެށޭނެ ކަމަށެވެ. އަދި އެހެނިހެން ސެންޓަރުތަކާއި، ހިންގަންޖެހޭ ތަމްރީން ޕްރޮގްރާމްތައް ކުރިއަށް ނުގެންދެވެނީ ބަޖެޓްގައި ފައިސާ އެލޮކޭޓްކޮށްފައި ނެތުމާއި، އެކަށީގެންވާ މިންވަރަށް ދާއިރާއަށް ތަމްރީންވެފައިވާ މުވައްޒަފުން ނުލިބޭތީ ކަމަށެވެ.
