ޗެލްސީއަށް މާލީ މަންފާ ނުވާގޮތަށް, މެޗު ޓިކެޓް ވިއްކުމުގެ ހުއްދަ އެކްލަބަށް ދީފިއެވެ. ރަޝިޔާއާއި ޔުކްރެއިނާއި ދެމެދު ކުރަމުންދާ ހަނގުރާމަ އާއި ގުޅިގެން ރަޝިޔާގެ ވިޔަފާރިތަކަށާއި, ރަޝިޔާއަށް ވާގިވެރިވާ ވިޔަފާރިތަކަށް އިނގިރޭސި ސަރުކާރުން އެޅި ފިޔަވަޅުތަކާއި ގުޅިގެން ޗެލްސީގެ ވެރިޔާ އަބްރޯމަވިޗަށްވެސް ވަނީ ފިޔަވަޅު އަޅާފައެވެ. އެފިޔަވަޅުތަކުގެ ތެރެއިން ޗެލްސީގެ މެޗު ޓިކެޓް ވިއްކުންވެސް ހުއްޓުވިއެވެ.
ޗެލްސީގެ ފިހާރަތަކުގެ ވިޔަފާރިއާއި, ޓްރާންސްފަރުގެ ކަންތަކާއި, ކްލަބް ވިއްކާލުމުގެ ކަންކަންވެސް ކުރިއަށް ނުގެންދެވޭނެހެން ފިޔަވަޅުތައް އެޅިއެވެ. އެކަމަކު ސަޕޯޓަރުންގެ ހައްޤު ގެއްލި, ސަޕޯޓަރުންނަށް މެޗުތައް ބަލަން ވަނުމުގެ ފުރުޞަތު ގެއްލޭތީ އެކަމަށް އިނގިރޭސި ސަރުކާރުން ވަނީ ލުޔެއް ދީފައެވެ. އެއީ ވަކި މެޗުތަކެއްގެ ޓިކެޓް ވިއްކުމުގެ ހުއްދަ ދިނުމެވެ. އެގޮތުން ޗެމްޕިއަންސް ލީގު ކްއާޓަރ ފައިނަލް ފުރަތަމަ ލެގުގައި އަންނަ މަހު 6 ވަނަ ދުވަހު ރެއާލް މެޑްރިޑާއި ދެކޮޅަށް ކުޅޭ މެޗާއި, ވެމްބްލީގައި ކުޅޭ އެފްއޭކަޕް ސެމީފައިނަލްގައި ކްރިސްޓްލް ޕެލަސްއާއި ދެކޮޅަށް އޭޕްރީލް 16 ވަނަ ދުވަހު ކުޅޭ މެޗުގެ ޓިކެޓްވެސް ވިއްކޭނެއެވެ. އެކަމަކު އެފައިސާވެސް ޕްރިމިއަރ ލީގު މެދުވެރިކޮށް ލިބޭނީ ޝާމިލްވާ އެހެން ފަރާތްތަކަށެވެ. މީގެއިތުރުން ޗެލްސީގެ ދަނޑުގައި ކުޅޭ ޕްރިމިއަރ ލީގުގެ މެޗުތަކަށް އަވޭ ޓީމްގެ ސަޕޯޓަރުންނަށްވެސް ޓިކެޓް ވިއްކޭނެއެވެ. އެކަމަކު އެފައިސާ ދާނީ ޕްރިމިއަރ ލީގަށެވެ. ޗެލްސީން އަވޭގައި ކުޅޭ މެޗުތަކުގެ ޓިކެޓް ގަތުމުގެ ފުރުޞަތު ޗެލްސީގެ ސަޕޯޓަރުންނަށް ދިން ނަމަވެސް އެކަމުންވެސް މާލީ ފައިދާއެއް ޗެލްސީއަކަށް ނެތެވެ. އެފައިސާ ލިބޭނީ ޗެލްސީއާއި ދެކޮޅަށް ކުޅޭ ހޯސްޓް ކްލަބަށެވެ.
ޗެލްސީގެ އަންހެން ޓީމް ކުޅޭ މެޗުތަކުގެ ޓިކެޓް ވިއްކުމުގެ ހުއްދަވެސް ވަނީ ދީފައެވެ. އޭގެތެރޭގައި ހިމެނޭ އާސެނަލާއި ދެކޮޅަށް ކުޅޭ އެފްއޭކަޕް ސެމީފައިނަލް މެޗުގެ ޓިކެޓް ވިއްކައިގެން ލިބޭ ފައިސާވެސް ލިބޭނީ އިނގިރޭސި އެފްއޭއަށެވެ. އިނގިރޭސި ސަރުކާރުން ފުރަތަމަ އެޅި ފިޔަވަޅުތަކާއެކު ޗެލްސީ މެޗުތަކަށް ވަދެވޭނީ ހަމައެކަނި ސީޒަން ޓިކެޓް ގަނެފައިވާ ފަރާތްތަކަށާއި, ފިޔަވަޅުތައް އެޅުމުގެ ކުރިން ޓިކެޓް ގަނެފައިވާ ސަޕޯޓަރުންނަށެވެ.
ޗެލްސީއަށް ފިޔަވަޅުތައް އެޅިއިރު އަބްރޯމަވިޗް އޮތީ ކްލަބް ވިއްކާލަންވެސް އިއުލާންކޮށްފައެވެ. އެކަމަކު ފިޔަވަޅުތަކާއި ގުޅިގެން އެކަންވެސް ވަނީ ހުއްޓިފައެވެ.
