ވަގެއް ކަމަށް ތުހުމަތު ކުރެވޭ މީހަކު ހައްޔަރުކުރުމަށް ފުލުހަކު ކުރި މަސައްކަތަށް ސީޕީގެ ތައުރީފް
ވަގަށް ނެގި އެއްޗެހި ހޯދާފައިވޭ
ދައުރުވަމުންދާ ވީޑިއޯގެ ސްކްރީން ޝޮޓެއް
މާލެސިތީގެ މަގެއްގެ މަތިން، ވަގެއް ކަމަށް ތުހުމަތު ކުރެވޭ ފިރިހެނަކު އަތުގައި ގަތުމަށް މަސައްކަތް ކުރި ސާޖަންޓް މުއްސަދު އަސްލަމްގެ މަސައްކަތް ފާހަގަކުރައްވާ ކޮމިޝަނަރ އޮފް ޕޮލިސް މުހައްމަދު ހަމީދު ތައުރީފް ކުރައްވައިފިއެވެ.
ބުދަ ދުވަހުގެ ވަގުތެއްގައި ސީޕީ ހަމީދު ވަނީ ސާޖަންޓް މުއްސަދާއި ބައްދަލުކުރައްވާފައެވެ. މި ބައްދަލުކުރެއްވުމަށްފަހު ސީޕީ ވިދާޅުވީ މާފަންނު ޕޮލިސް ސްޓޭޝަންގެ އޮފިސަރު މުއްސަދު، ވައްކަން ކުރި މީހަކު ހައްޔަރުކޮށް ވަގަށް ނެގި އެއްޗެހި ހޯދާފައިވާ ކަމަށެވެ. އޭނާއަކީ ރަގަޅު ފުލުހެއްގެ ނަމޫނާއެއްކަން ފާހަގަކުރައްވައި ސީޕީ ވަނީ ވަރަށް ބޮޑަށް އޭނާ އަށް ތައުރީފް ވެސް ކުރައްވާފައެވެ.
ސީޕީ ވިދާޅުވީ މިކަހަލަ ވަރަށް ގިނަ ކޭސްތަކުގައި ފްރަންޓްލައިންގައި މަސައްކަތް ކުރާ އޮފިސަރުން ވަރަށް ފުރިހަމައަށް އެމީހުންގެ ޑިއުޓީ ފުރިހަމަކޮށް، އަދި ކުރަމުންދާ ކަމަށެވެ. ރައްޔިތުންގެ ޚިދުމަތުގައި މަސައްކަތް ކުރަމުންދާއިރު، ކުށްމަދު އަމާންވެއްޓެއް ގާއިމްކުރުމަށް ކުރަމުންދާ މަސައްކަތް ވަރަށް ކާމިޔާބު ކަމަށް ސީޕީ ވިދާޅުވިއެވެ.
މީގެ އިތުރުން ސީޕީ ވިދާޅުވީ ދާދި ފަހުން ފްރަންޓަލައިން ޕޮލިސިންގ މޮޑެލްއަށް ގެނައި ބަދަލުތަކުގެ ނަތީޖާތައް ރަނގަޅަށް ފެންނަމުންދާ ކަމަށެވެ.
ވަގެއް ކަމަށް ތުހުމަތު ކުރެވޭ ފިރިހެނެއް އަތުގައި ގަތުމަށް މަސައްކަތް ކުރި ސާޖަންޓް މުއްސަދު އަސްލަމްގެ މަސައްކަތް ފާހަގަކުރައްވާ ސީޕީ ތައުރީފް ކުރައްވާފައިވާއިރު، ގިނަބައެއްގެ ސަމާލުކަން އެ ވީޑިއޯއަށް ލިބިފައިވެއެވެ.
ސޯޝަލް މީޑިއާގައި ދައުރުވަމުންދާ އެވީޑިއޯއިން ފެންނަނީ އާއްމު މީހެއްގެ ފަހަތުން ވަރަށް ބާރަށް ދުވެފައި ސާޖަންޓް މުއްސަދު އަންނަ ތަނެވެ. ސާޖަންޓް މުއްސަދު އެމީހާއާއި އަރާ ހަމަކުރަނިކޮށް ގެއަކަށް އެމީހާ ވަދެއެވެ. ސިނޑިން ވެސް ވަރަށް ބާރަށް ދުވެފައި އަރައެވެ. އެކަމަކު ސާޖަންޓް މުއްސަދު ވެސް ހުއްޓުމެއް ނެތި ސިޑިން ދުވެފައި އަރައެވެ. ވަރުބަލިވި ނަމަވެސް ސާޖަންޓް މުއްސަދު ހުއްޓެނީ އެމީހާ އަތުލައި ގަތުމަށްފަހުއެވެ. ވައްކަން ކުރި ކަމަށް ތުހުމަތުވާ މިހާ ޓީޝާޓުގެ ގިރުވާނުގައި ހިފައި އަނެއްކާ ސިޑިން ތިރިއަށް ގެންދެއެވެ. އަދި އޭރު ދެ މީހުން ވެސް ތިބީ އިންތިހާއަށް ވަރުބަލިވެފައިކަން އެނގެއެވެ. އަދި އެންމެ ތިރީ ފްލޯއިން ފުލުހުންގެ މީހާ ފޯނެއް ނަގާތަން ފެނެއެވެ. މިއީ ވައްކަން ކުރި ކަމަށް ތުހުމަތު ކުރެވޭ އެމީހާ އެތަނަށް އެއްލާލި ފޯނުކަމަށް ބެލެވެއެވެ.
މި ހާދިސާއާއި ގުޅިގެން އެކި މީހުންގެ ޝުއޫރުތައް ބަންޑުން ކުރަމުންދާއިރު، ވަގުންގެ ފަހަތުން ދުވެ، މީހުން އަތުލައި ގަތުމަކީ އައު ކަމަކަށްނުވި ނަމަވެސް މިފަހަރު ވައިރަލްވި މި ވީޑިއޯ ވަރަށް ތަފާތު ކަމަށް ބައެއް މީހުން ބުނެފައިވެއެވެ. އެއީ މާލޭގައި ވައްކަމުގެ ތުހުމަތުކުރެވުނު މީހެއްގެ ފަހަތުން ފުލުހަކު ދުވެ، އަތުލައިގަތް މުޅި މަންޒަރު އާއްމު ރައްޔިތުންނަށް ފެނިގެންދަނީ މަދު ފަހަރެއްގައި ކަމަށްވާތީއެވެ. އެހެންކަމުން އާއްމުންނަށް މި ފެނިގެން މިދިޔަ ފުލުހުންގެ މީހާއަކީ ދިވެހި ފުލުހުންގެ ޚިދުމަތުގައި ހުރި ސިންގްހަމް ކަމަށް ސިފަކޮށްފައިވެއެވެ. އަދި އެއްމިނިޓް 49 ސިކުންތުގެ ވީޑިއޯއިން އެކަނި ފުލުހުން ކުރަމުންދާ ބުރަ މަސައްކަތް ހިތަށް ތަސައްވުރު ނުކުރެވޭނެ ކަމަށް ވެސް ބައެއް މީހުން ބުނެފައިވެއެވެ.
