މޫސުމާއި ބެހޭ ޤައުމީ އިދާރާގެ އައު ވެބްސައިޓް ލޯންޗުކޮށް، ވާރޭ ފެން ނެގޭނެ ސަރަހައްދުތައް އަންގައިދޭ ނޮޓިފިކޭޝަން އެޕަށް
23 މާރިޗު 2022 | ބުދަ 08:11ވެބްސައިޓުން ކުރިއަށް އޮތް ތިން ދުވަހުގެ މޫސުން ބަލާލެވޭނެ
މި ޚިދުމަތްތައް ލޯންޗުކޮށްދެއްވީ އެންވަޔަރަމެންޓް މިނިސްޓަރު އައިމިނަތު ޝައުނާ
މޫސުމާއި ބެހޭ ޤައުމީ އިދާރާގެ އައު ވެބްސައިޓް ލޯންޗުކޮށް، ވާރޭ ފެން ނެގޭނެ ސަރަހައްދުތައް މެޓް އޮފީހުގެ އެޕްލިކޭޝަން މެދުވެރިކޮށް ބެލޭނެ ގޮތް ހަދައިފިއެވެ.
މެޓް އޮފީހުގައި ބުދަ ދުވަހު ބޭއްވި ރަސްމިއްޔާތުގައި މި ޚިދުމަތްތައް ލޯންޗުކޮށްދެއްވީ އެންވަޔަރަމެންޓް މިނިސްޓަރު އައިމިނަތު ޝައުނާއެވެ.
އައު ވެބްސައިޓް ލޯންޗުކޮށްފައިވާއިރު މި ވެބްސައިޓުން ކުރިއަށް އޮތް ތިން ދުވަހުގެ މޫސުން ބަލާލެވޭނެ ކަމަށާއި އެންމެ ފަހުގެ ސެޓެލައިޓް ފޮޓޯތައް ވެސް ފެންނަން ހުންނާނެ ކަމަށް އެ އިދާރާ އިން ބުނެއެވެ.
މި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރު ޝައުނާ ވިދާޅުވީ މެޓް އޮފީހަކީ ދާން ބޭނުންވާ މަންޒިލަށް މަގު ފަހިކޮށްދޭ މުއައްސަސާއެއް ކަމަށެވެ. އަދި ކުރީ އަހަރުތަކާއި އަޅާބަލާއިރު މިހާރު އެ އޮފީހުން ފޯރުކޮށްދޭ ޚިދުމަތުގެ ފެންވަރު ރަނގަޅުކަން ފާހަގަކުރައްވާ ޝައުނާ ވިދާޅުވީ އެތަނުގެ ޓެކްނިކަލް ކެޕޭސިޓީ ވެސް ރަނގަޅު ކަމަށެވެ.
އަހަރުގެ ދެބައި ކަނޑުގަދަވެ، ވައިގަދަވާ ކަމަށާއި އެހެންކަމުން ކަނޑުމަތީގައި ހިނގާ ހިތާމަވެރި ހާދިސާތައް އިތުރުވެފައިވާ ކަމަށް އޭނާ ވިދާޅުވިއެވެ. އާންމު ރައްޔިތުންނަށް ރައްކާތެރިކަމާއެކު އެއްރަށުން އަނެއް ރަށަށް ދަތުރު ކުރެވޭނެ ނިޒާމެއް ޤާއިމުކުރުމަކީ ދައުލަތު ޒިންމާއެއް ކަމަށް ވެސް ޝައުނާ ވިދާޅުވިއެވެ.
މޫސުމަށް އަންނަ ބަދަލުތައް ގުޅިފައިވަނީ ވާރޭ ވެހޭ މިންވަރާއި ރަށް ގިރުމާއި ފެން ފަށަލައަށް އަންނަ ބަދަލުތަކަށް ކަމަށާއި މެޓް އޮފީހުން އެއްކޮށްފައިވާ މައުލޫމާތުގެ މައްޗަށް ބިނާކޮށް ދުރާލާ ކަންކަން ރާވަންޖެހޭ ކަމަށް މިނިސްޓަރު ވިދާޅުވިއެވެ. އެކި ޕްރޮޖެކްޓްތައް ސަރުކާރުން ހިންގާއިރު މޫސުމަށް އަންނަ ބަދަލުތަކަށް ބެލުމަށްފަހު އެކަންތައް ކުރިއަށް ގެންދަންޖެހޭ ކަމަށް ވެސް ވިދާޅުވިއެވެ.
ޝައުނާ އިތުރަށް ވިދާޅުވީ ވާރޭފެން ނެގޭނެ ސަރަހައްދުތައް އަންގައިދޭ ނޮޓިފިކޭޝަން އެޕްލިކޭޝަނަށް އިތުރު ކުރެވިފައިވާއިރު ވާރޭފެން ރައްކާ ކުރުމުގެ ނިޒާމުތައް މިހާރު ހުރި މިންވަރަށް ވުރެން ވެސް ހަރުދަނާ ކުރަން ޖެހޭނެ ކަމަށެވެ. އަދި މި ޚިދުމަތުގެ ބޭނުން އެންމެން ވެސް ހިފުމަށް ވަނީ އެދިވަޑައިގެންފައެވެ.
މި ރަސްމިއްޔާތުގައި ވާހަކަ ދައްކަވަމުން މެޓް އޮފީހުގެ ޑިރެކްޓަރ ޖެނެރަލް އަބްދުﷲ ވާހިދު ވިދާޅުވީ މިއީ އެޕްލިކޭޝަނަށް ލިބިގެން ދިޔަ އިތުރު ފުރިހަމަކަމެއް ކަމަށެވެ. އަދި މެޓް އޮފީހުން އަބަދުވެސް މަސައްކަތް ކުރަނީ ގޮންޖެހުންތަކާއެކު ވެސް ރައްޔިތުންނަށް ފެންވަރު ރަނގަޅު ޚިދުމަތެއް ފޯރުކޮށްދިނުމަށް ކަމަށް ވިދާޅުވިއެވެ.
މޫސުމާއި ބެހޭ ޤައުމީ އިދާރާގެ އެޕްލިކޭޝަން ‘moosun’ ގޫގުލް ޕްލޭ ސްޓޯރުންނާއި އެޕް ސްޓޯރުން ޑައުންލޯޑް ކޮށްލެވޭނެއެވެ. އަދި އެއިދާރާގެ ވެބްސައިޓް www.meteorology.gov.mv އިން މައުލޫމާތު ލިބޭނެކަމުގައި މެޓް އޮފީހުން ބުނެއެވެ.
