119 ކިލޯ ޑްރަގް ކޭސް: ތަހުގީގު ކުރިއަށްދާ ބައެއްގެ ވާހަކަތައް ހިމެނޭ އިންޓެލް ރިޕޯޓުތަކާއި ގުޅޭ ބަހުސެއް
އިތުރު ފަރާތްތަކެއްގެ މައްޗަށް ތަހުގީގު ކުރިއަށްދޭ
119 ކިލޯ ޑްރަގް ކޭސްގައި ހައްޔަރުކޮށް ދައުވާ އުފުލާފައިވާ މީހުން
މާލެއާއި ހުޅުމާލޭގައި ފުލުހުން ނިމިދިޔަ ޑިސެމްބަރު މަހުގެ 12 ވަނަ ދުވަހު ހިންގި ޑްރަގް އޮޕަރޭޝަނުގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މިއީ މިހާރުވެސް ތަހުގީގު ކުރިއަށްދާ ބޮޑު މައްސަލައެކެވެ. އެގޮތުން ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލައިގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަޙްމަދު ސުނައިނު އާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.
މިއީ ކޮން މައްސަލައެއް؟
މި މައްސަލައިގައި ފުލުހުން ހުއްޓުވި ޓެކްސީން ފެނިފައިވާ ތަކެއްޗަކީ ޑިސެމްބަރު 12 ވަނަ ދުވަހުގެ ފަތިހުގެ ވަގުތެއްގައި “ބަންގާ” ނަމަކަށް ކިޔާ ލޯންޗުން މާލެއަށް އެތެރެކުރި މަސްތުވާތަކެތިކަމަށް ދެނެގަނެވިފައިވާކަމަށް ފުލުހުންގެ ތަހުގީގުގައި ބަޔާން ކޮށްފައިވެއެވެ. އަދި އެމީހުންނާއި ގުޅުން ހުރި ކާރެއްގެ ތެރެއިންނާއި، ސައިކަލެއްގެ މަޑިދަށުންވެސް މަސްތުވާތަކެތި ހޯދާފައިވެއެވެ.
މީގެއިތުރުން ހޯނޑެއްދޫ އަލޯރާ އުމުރުން 26 އަހަރުގެ އަރުޝަދު ޚާލިދު އެ ތިން މީހުންނާއި ބައްދަލުކޮށް، ކަމުގެ އިރުޝާދު ދިނުމުގައި ހަރަކާތްތެރިވެފައިވާކަން ތަހުގީގަށް ފާހަގަކުރެވިފައިވެއެވެ. އަދި މާލެއަށް މަސްތުވާތަކެތި އެތެރެކުރުމަށްފަހު އަރުޝަދު ޚާލިދު އާއި މުހައްމަދު އަކްރަމް އަބްދުލް ހަންނާން ވަނީ ޑިސެމްބަރު 12 ވަނަ ދުވަހު ރާއްޖެއިން ބޭރަށްފުރައިގެންގޮސްފައެވެ.
އަދި މި މައްސަލާގައި ތުހުމަތުކުރެވޭ މީހުންގެ ތެރެއިން އަރުޝަދު ޚާލިދަކީ މަސްތުވާތަކެތި ރާއްޖެއަށް އެތެރެކުރުމުގައި އެންމެ އިސްކޮށް ހުރި ފަރާތްކަމަށް ފުލުހުން ތުހުމަތު ކުރެއެވެ.
މި މައްސަލައިގައި ބުދަ ދުވަހު އޮތް އަޑުއެހުމުގައި ދައުލަތުން އެ 3 މީހުންގެ މައްޗަށްވެސް ކުރާ ދައުވާ އިއްވާފައިވާއިރު، 3 މީހުންވެސް ވަނީ ދައުވާއަށް އިންކާރު ކޮށްފައެވެ. އެއަށްފަހު ހެކި ހާމަކުރުމުގެ ކުރިން ދައުލަތުން ވަނީ ހެކި ރައްކާތެރި ކުރުމުގެ އަމުރާއި ގުޅޭގޮތުން ވާހަކަ ދައްކާފައެވެ.
މި މައްސަލައިގައި ދައުލަތުން ހުށައަޅާފައިވާ ހެކިތަކުގެ ތެރޭގައި ހިމެނޭ 3 އިންޓެލިޖެންސް ރިޕޯޓެއް ސިއްރުކޮށްދިނުމަށް ދައުލަތުން އެދެއެވެ. ސަބަބަކީ އެ ރިޕޯޓުތަކުގައި މިހާރުވެސް ކުރިއަށްދާ ތަހުގީގުތަކަކާއި ގުޅޭ މައުލޫމާތުތަކެއް ހިމެނޭތީ އާއި، އެ ފަރާތްތަކަށް އެ މައުލޫމާތުތައް ލިބިއްޖެނަމަ ހެކި ނައްތާލުމުގެ އިހްތިމާލު އޮތުމުންނެވެ.
އެހެންނަމަވެސް، ދިފާއީ ވަކީލުންނާއި ދައުވާ ލިބޭ ފަރާތްތައް ކޯޓަށް ހާޒިރުވެ، މުޅި ރިޕޯޓު ބެލުމަށް ދައުލަތުން އިއުތިރާޒެއް ނުކުރެއެވެ. އެހިސާބުން ދިފާއުން ވަނީ ތަހުގީގު ކުރިއަށްދާ ބައެއްގެ މައުލޫމާތު ހިމެނޭ ރިޕޯޓެއް ދިފާއަށް ދޫކުރުމާއި، ކޯޓަށް ހާޒިރުވެ، އެ ރިޕޯޓު އޮތް ގޮތަށް ބަލައި، ބޭނުންވާ މައުލޫމާތުތައް ނޯޓުކޮށްގެން ދިއުމާ ހުރި ތަފާތަކީ ކޮބައިތޯ ސުވާލު އުފައްދާފައެވެ.
އެކަމާއި ގުޅިގެން ދައުލަތުން ބުނީ، އެ ރިޕޯޓުތަކުގައި ދިފާއަށް ދޫކުރަން ނުޖެހޭ މައުލޫމާތުތަކެއް ހުރި ނަމަވެސް، ރިޕޯޓު ދިފާއަށް ދެއްކުމަށް އެދުނީ ދިފާއުވުމުގެ ޙައްޤަށް އުނިކަމެއް ނާންނާނެ ގޮތަށް ދައުލަތުންވެސް މައްސަލައިގައި ކުރިއަށް ދާން ބޭނުންވުމާއި، ދައުވާ ލިބޭ ފަރާތްތައް ދައުވާއަށް ޖަވާބުދާރީވުމަށްޓަކައި އެ މައުލޫމާތުތައް މުހިއްމުވެސް ވާތީ ކަމަށެވެ.
އެ މައުޟޫއަށް ދައުލަތާއި ދިފާއުންވެސް ގިނަ ވާހަކަތަކެއް ދައްކާފައިވާއިރު، މައްސަލަ ބައްލަވާ ގާޒީ ދީބާނާޒް ފަހުމީވެސް ވަނީ ދައުލަތަށް ސުވާލެއް އަމާޒު ކުރައްވާފައެވެ. އެގޮތުން ގާޒީ ދީބާނާޒް ވަނީ، އެ ދެ ޙާލަތުގައި ތަހުގީގަށް ހުރަސް އެޅުމަށް އޮތް ތަފާތަކީ ކޮބައިތޯ ސުވާލު ކުރައްވާފައެވެ. އެހެންނަމަވެސް އެ ސުވާލަށްވެސް ދައުލަތުން ދިން ޖަވާބަކީ މުޅި ރިޕޯޓު ދޫކޮށްފިނަމަ ހުރިހާ މައުލޫމާތެއް ފެންނަން ހުންނާނެކަމެވެ.
އެހިސާބުން ގާޒީ ދީބާނާޒް ފަހުމީ ވަނީ ހެކި ރައްކާތެރި ކުރުމުގެ އަމުރާއި ގުޅޭގޮތުން ދައުލަތުން ހުށައަޅާފައިވާ ހުށައެޅުމަށް ބަދަލެއް ގެނައުމަށް ހިޔާލު ހުށައަޅުއްވާފައެވެ. އެގޮތުން އިންޓެލިޖެންސް ރިޕޯޓުތަކުގައި ހިމެނޭ ސިއްރު ކުރަންޖެހޭ މައުލޫމާތު ސިއްރު ކުރުމަށްފަހު ދިފާއަށް ރިޕޯޓު ދޫކުރުމާއި، ދިފާއުން މުޅި ރިޕޯޓު ބަލަން ބޭނުންވާނަމަ، ދައުލަތުން އެދިފައިވާ ގޮތަށް ކޯޓަށް އައިސް ކޯޓުން ކަނޑައަޅާ ޝަރުތުތަކާއެކު ބެލޭނެ ގޮތް ހެދުމާމެދު އިއުތިރާޒެއް އޮތްތޯ ގާޒީ ސުވާލު ކުރެއްވިއެވެ. އެގޮތަށް އެންމެ ރަނގަޅުކަމަށް ދައުލަތާއި ދިފާއުންވެސް ދެކެއެވެ. ވުމާއެކު އެގޮތަށް އަމުރު ނެރުއްވުމަށް ގާޒީ ނިންމެވިއެވެ.
ދެން ކުރިއަށް ދިޔައީ ދައުލަތުން ހެކި ހާމަ ކުރުމެވެ. އެއަށްފަހު ދެން އޮންނަ އަޑުއެހުމެއްގައި ދިފާއީ ހެކި ހާމަކުރުން އޮންނާނެކަމަށް ގާޒީ ވިދާޅުވިއެވެ.
ގާޒީ ވަނީ މި މައްސަލަ ކުރިއަށްދާނެ ގޮތުގެ ތާވަލެއްވެސް ދެ ފަރާތުގެ ހިޔާލާއެކު އެކުލަވާލައްވާފައެވެ.
