ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު މުރާޖަޢާކުރުމާގުޅޭ މަޝްވަރާތައް ފަށައިފި
ހަރުކަށި ފިކުރު ހުއްޓުވުމަށް ޤާނޫނަށް ގެންނަންޖެހޭ އިޞްލާޙުތައް ދެނެގަތުމުގެ މަޝްވަރާތައް ކުރެވުނު
ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު މުރާޖަޢާކުރުމާ ގުޅޭގޮތުން، ކަމާބެހޭ ފަރާތްތަކާ އެޓަރނީ ޖެނެރަލް ބައްދަލުކުރެއްވުން
ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤާނޫނު މުރާޖަޢާކުރުމާ ގުޅޭގޮތުން ކަމާބެހޭ ފަރާތްތަކާއެކު މަޝްވަރާތައް ފަށައިފިއެވެ.
އެޓަރނީ ޖެނެރަލްގެ އޮފީހާއި ކަމާބެހޭ ފަރާތްތައް ގުޅިގެން ކުރިއަށްގެންދިޔަ މި މަޝްވަރާތަކުގައި، ފަތުވާދޭ މަޖިލިސް އެކުލެވިގެންވާ ގޮތާއި މަސްއޫލިއްޔަތުތައް މުރާޖަޢާކުރުމާއި، ހަރުކަށި ފިކުރު ހުއްޓުވުމަށް ޤާނޫނަށް ގެންނަންޖެހޭ އިޞްލާޙުތައް ދެނެގަތުން ހިމެނެއެވެ. މީގެ އިތުރުން ކޮންމެ މައްސަލައަކަށް ޖިނާއީ ޢަދުލުގެ ނިޒާމުން ހަމައެކަނި ޙައްލު ހޯދުމުގެ ބަދަލުގައި, ކަމާގުޅުންހުރި ދައުލަތުގެ އިދާރާތަކުން އިދާރީ ޙައްލު ހޯދޭނެ ގޮތްތައް ދެނެގަތުމާއި، ޒަމާނީ ވަޞީލަތްތައް މެދުވެރިކޮށް ޙަޤީޤަތާ ޚިލާފު މަޢުލޫމާތު ފެތުރުން ހުއްޓުވުމަށް އެޅޭނެ ފިޔަވަޅުތައް ދެނެގަތުންވެސް ހިމެނެއެވެ.
އިސްލާމީ ފަތުވާދޭ އެންމެމަތީ މަޖިލީހުގެ މަސްއޫލިއްޔަތުގެ ތެރޭގައި, ދައުލަތުގެ މުއައްސަސާތަކުން މަޖިލީހުގެ ލަފަޔަކަށް އެދޭ ދީނީ ކަންކަމުގައި އެފަރާތްތަކަށް ބޭނުންވާ ލަފާ ފޯރުކޮށްދެއްވުމާއި، ރައްޔިތުންގެ ދީނީ ޚިޔާލު ތަފާތުވުންތައް އުފެދޭ މައްސަލަތައް ދެނެގަނެ އެކަންކަމުގެ ދިރާސާކޮށް އެ މަޖިލީހުގެ ފަތުވާ ޢާންމުންނަށް ދިނުން ހިމެނެއެވެ. ޤާނޫނަށް ހުށަހަޅަން ފެންނަ އިޞްލާޙުތަކާ ގުޅޭގޮތުން ކަމާބެހޭ އެހެން އިދާރާތަކާ އެކުވެސް މަޝްވަރާކުރުމަށްވެސް ވަނީ ހަމަޖެހިފައެވެ.
ދިވެހިރައްޔިތުންގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނަކީ 1994 އަހަރު އަމަލު ކުރަން ފެށި ގާނޫނެކެވެ. އަށާވީސް އަހަރު ވީ އެ ގާނޫނަށް މިހާތަނަށް ގެނެސްފައި ވަނީ ދެ އިސްލާހެކެވެ. އެ އިސްލާހުތައް ގެނެސްފައި ވަނީ 2014 ވަނަ އަހަރާއި 2016 ވަނަ އަހަރުއެވެ.
ސަރުކާރުގެ ލެޖިސްލޭޓިވް އެޖެންޑާގައި 201 ބިލު މަޖިލީހަށް ހުށަހެޅުމަށް ނިންމާފައިވެއެވެ. މަޖިލިސް މިއަހަރަށް ފެށުމުން، ރައީސް އޮފީހުން މަޖިލީހަށް ފޮނުވި ބިލްތަކުގެ ލިސްޓުގައި ބުނެފައި ވަނީ މިއަހަރުގެ ފުރަތަމަ ދައުރުގައި 36 ބިލު ހުށަހަޅަން ގަސްދުކުރާ ކަމަށެވެ.
