ވިލިލާމެ ދާއިރާގެ ކުރީގެ މެމްބަރު އަދި ޕީޕީއެމްގެ ކުރީގެ ޕީޖީ ލީޑަރު އަހުމަދު ނިހާން ހުސައިން މަނިކުގެ މައްޗަށް އުފުލާފައިވާ 6 ދައުވާގެ އަޑުއެހުން ދައުލަތުން އެދިގެން ކެންސަލް ކޮށްފިއެވެ.

ނިހާންގެ މައްޗަށް ކުރާ ދައުވާގެ އަޑުއެހުންތައް ތާވަލުކޮށްފައި އޮތީ އާދިއްތަ ދުވަހުގެ ހެނދުނު 09:00 އަށެވެ. ނަމަވެސް އެ އަޑުއެހުން ކެންސަލް ކުރީ ދައުލަތުން އެކަމަށް އެދި ސިޓީއެއް ފޮނުވާފައިވުމުންނެވެ.

މިމައްސަލައިގެ އަޑުއެހުމެއް އެންމެ ފަހުން ބާއްވާފައިވަނީ 16 ފެބްރުއަރީގައެވެ. އެ ދުވަހުގެ އަޑުއެހުމުގައި ކުރިއަށް ގެންދިޔައީ ހެކި ހާމަކުރުމުގެ މަރުޙަލާއެވެ. އެގޮތުން ދައުލަތުންނާއި ދިފާއުން ވަނީ ހެކި ހާމަކޮށްފައެވެ.

ދިފާއުން ހުށައަޅާފައިވާ ހެކިތަކަށް ބަލާއިރު، މާލިއްޔަތު ކޮމިޓީގެ ޖަލްސާތަކުގެ އެޖެންޑާތަކުގެ ޚުލާސާ ހުށައަޅާފައިވެއެވެ. އެއީ ހުށަހަޅާފައިވާ އޮޑިޓް ރިޕޯޓާއި ގުޅިގެން މަސައްކަތްކުރިކަން ސާބިތުކުރުމަށެވެ.

ހަމައެއާއެކު، ޕީޖީ ލީޑަރުގެ ދައުރު ސާބިތު ކުރުމަށް ޕީ.ޕީ.އެމްގެ ގަވާއިދުވެސް ހުށައަޅާފައިވާއިރު، އެމް.އެމް.ޕީ.އާރް.ސީގެ ޚާއްސަ އޮޑިޓް ރިޕޯޓާއި، ޖޭ ހޮޓެލްސް އެންޑް ރިސޯޓްގެ ސިޓީއަކާއި، "އަދީބުގެ ފޯނު- ދައުލަތުގެ ބޮޑު ޓެސްޓެއް" ނަމުގައި ނޫހެއްގައި ލިޔެފައިވާ އާޓިކަލްއެއްވެސް ހިމެނެއެވެ. އެއީ ޗެއިން އޮފް ކަސްޓަޑީ ނެތް ފޯނެއްކަން ބަޔާން ކުރުމަށެވެ. އެކަން ސާބިތު ކުރުމަށް ޢަލީ ވަހީދުގެ ވީޑިއޯ އިންޓަރވިއުއެއްވެސް ވަނީ ހުށައަޅާފައެވެ.

މީގެއިތުރުން ބައެއް ޓްވީޓުތަކުގެ ސްކްރީން ޝޮޓްވެސް ކިތާބީ ހެކީގެ ގޮތުގައި ހުށައަޅާފައިވެއެވެ.

ޝަފަހީ ހެކިތަކަށް ބަލާއިރު، ދަތުރު ކުރި ތާރީޚާއި، ރޮލެކްސް ގަޑިގަތް ތާރީޚާއި، ގަޑި ދިން އިރު ހުރި ފަރާތެއްގެ ހައިސިއްޔަތުން މ މުލައް، މުނިޔާވިލާ، މުޙައްމަދު ޢަލީގެ ނަން ވަނީ ހުށައަޅާފައެވެ.

ދިފާއުން ހުށައެޅި ޝަފަހީ ހެކިން

މިމައްސަލައިގައި ދައުލަތުން އެދިފައިވަނީ، ނިހާންގެ ރޮލެކްސް ގަޑިއާއި, އޭނާ ރިޝްވަތާއި މަނީ ލޯންޑަރ ކޮށްގެން ހޯދާފައިވާ ފައިސާ ދައުލަތަށް ނަގައިދިނުމަށެވެ. މި މައްސަލައަކީ މޯލްޑިވްސް ޕޮލިސް ސަރވިސް އާއި، އެންޓި-ކޮރަޕްޝަން ކޮމިޝަނާއި, ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީ ގުޅިގެން ތަހުގީގުކުރުމަށްފަހު ޕީޖީ އޮފީހަށް ފޮނުވި މައްސަލައެކެވެ. 

ނިހާނަށް ލިބިފައިވާ މިފަދަ އެއްވެސް ފައިސާއެއް ލިބުނުކަން އޭނާ 2014 އިން ފެށިގެން 2019އާ ދެމެދު ހުށަހަޅާފައިވާ މާލީ ބަޔާންތަކުގައި ހިމަނާފައި ނުވާކަން ޕީޖީ އޮފީހުން މީގެ ކުރިން ހާމަކޮށްފައިވެއެވެ. ދައުލަތުން ވަނީ ފައިސާގެ އިތުރުން ނިހާނުގެ ރޮލެކްސް ގަޑިވެސް ދައުލަތަށް ނަގައިދިނުމަށް އެދިފައެވެ.