އެންޓި ކޮރަޕްޝަން ކޮމިޝަން (އޭސީސީ) ގެ މަސައްކަތްތައް އެންމެ ކާމިޔާބުކަމާއެކު ކުރިއަށް ގެންދިއުމުގައި ޕްރޮސެކިއުޓަރ ޖެނެރަލް (ޕީޖީ) އޮފީހުން އަބަދުވެސް އެހީތެރިކަން ފޯރުކޮށްދޭނެ ކަމުގެ ޔަޤީންކަން ދެއްވާކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް އެހެން ވިދާޅުވީ "ޤާނޫނު ތަންފީޒު ކުރުން - ކެނެރީމަގުގެ މިސާލު" މި ނަމުގައި އޭނާގެ ބްލޮގްގައި ޝާއިއު ކުރެއްވި ލިޔުމެއްގައެވެ. އެގޮތުން ޝަމީމް ވަނީ އެންޓި ކޮރަޕްޝަން ކޮމިޝަނުގެ މަސައްކަތް ކާމިޔާބުވުމަކީ ޕްރޮސެކިއުޓަރު ޖެނެރަލްގެ އޮފީހުގެ މަޞްލަޙަތުގައި އޮތް ކަމެއްކަން ފާހަގަކުރައްވައި، ޤާނޫނު ތަންފީޒުކޮށް، ކޮމިޝަނުގެ މަސައްކަތް ކާމިޔާބުކުރުމުގައި، އެކޮމިޝަނުގެ އެއް ނަންބަރު ސަޕޯޓަރަކަށްވާނީ ޕްރޮސެކިއުޓަރ ޖެނެރަލްގެ އޮފީސްކަމަށް ވިދާޅުވެފައެވެ.
ޝަމީމް ވިދާޅުވާ ގޮތުގައި ޕީޖީ އޮފީހުގެ ހުރިހާ އިންސާނީ ވަޞީލަތެއް، އޭސީސީގެ މަސައްކަތް ކާމިޔާބުކުރުމުގެ މަގަށް އަބަދުވެސް ރުކުރުވާލާފައި އޮންނާނެއެވެ. އެކަމުގެ ފުރިހަމަ ޔަޤީންކަން ޝަމީމް ވަނީ ކޮމިޝަނުގެ އައު މެންބަރުންނަށް އަރުއްވާފައެވެ. އެގޮތުން ކޮމިޝަނުން ފަށާ ހުރިހާ ޖިނާއީ ތަޙުޤީޤެއްގެ އަނެއް ކޮޅުގައި ވަރުގަދައަށް ހިއްޕަވާނެކަން ފާހަގަކުރައްވައި ޝަމީމް ވަނީ އެމަސައްކަތްތައް ކާމިޔާބުކުރުމަށް ޕީޖީ އޮފީހަށް ލެވެން އޮތް ބާރެއް ލާނެކަމަށް ވިދާޅުވެފައެވެ.
ޝަމީމްގެ ބޮލޮގްގައި ސިފަ ކުރައްވާފައިވާ ގޮތުގައި ޤާނޫނެއް ހަދައި، ތަންފީޒީ އިދާރާތަކާއި ޙަވާލުކުރުމުން، ޢަމަލު ކުރަންވާނީ ‘ކޮތަރު ސީ’ ލައިއުޅޭ އުޞޫލުންނެވެ. އެގޮތުން ކޮތަރަކީ ވަކި މީހެއްގެ ސައިކަލު މަޑިއެއްތޯ ނުވަތަ ވަކި ތަނެއްތޯ ބެލުމެއް ނެތި ‘ސީ ލާ’ އެއްޗެއްކަން ޝަމީމް ފާހަގަ ކުރެއްވިއެވެ.
ޤާނޫނު ތަންފީޒު ކުރުމަކީވެސް އެފަދަ ކަމެއްކަމަށް ޝަމީމް ވިދާޅުވެއެވެ. އެގޮތުން ލޮލަކަށް، މޫނަކަށް ކަނދުރާއަކަށް ބެލުމެއްނެތި، ޤާނޫނު ތަންފީޒުކުރަން ޖެހޭކަމަށް އޭނާ ވިދާޅުވިއެވެ.
އެކަމުން ނުތަނަވަސްކަން އަންނަ މީހަކަށް ނުތަނަވަސް އައިނަމަވެސް، ޤާނޫނުގެ ކުރިމަތީގައި ހުރަހަށް ޕާކުކުރާ މީހާ ޕާކު ކުރަންވާނީ، ކޮތަރު ‘ގުއި ރޭ’ ގޮތަށް، ޤާނޫނު ތަންފީޒުވުމުގެ ފުރުޞަތު އޮންނާނެކަން ދަނެގެންކަމަށް ޝަމީމް ވިދާޅުވިއެވެ.
އެކަމުން ނުތަނަވަސްކަން އަންނަ މީހަކަށް ނުތަނަވަސްކަން އަންނާނެއެވެ. ނަމަވެސް، ޤާނޫނުގެ ކުރިމަތީގައި ހުރަހަށް ޕާކުކުރާ މީހާ ޕާކު ކުރަންވާނީ، ކޮތަރު ގުއި ރޭ ގޮތަށް، ޤާނޫނު ތަންފީޒުވުމުގެ ފުރުޞަތު އޮންނާނެކަން ދަނެގެންނެވެ.ޕްރޮސެކިއުޓަރ ޖެނެރަލް ހުސައިން ޝަމީމް
އޭސީސީގެ މަސައްކަތްތައްވެސް އެގޮތުގެ މަތިން ގެންދިޔުމުގައި ޕީޖީ އޮފީހުގެ ފުރިހަމަ އެއްބާރުލުން ލިބޭނެކަމުގެ ޔަޤީންކަން ޝަމީމް ވަނީ ދެއްވާފައެވެ.
އޭސީސީއަށް އައު މެމްބަރުން އައްޔަނު ކުރައްވާފައިވަނީ 17 މާރޗު 2022 ގައެވެ. އެގޮތުން ކޮމިޝަނުގެ ރައީސްގެ މަޤާމަށް އަލްއުސްތާޛު އާދަމް ޝާމިލް އަދި ކޮމިޝަނުގެ ނާއިބުރައީސްގެ މަޤާމަށް އަލްއުސްތާޛު ޢަބްދުއް ސަލާމް ވަނީ އައްޔަނު ކުރައްވާފައެވެ.
އައު މެމްބަރުންނާއެކު ކޮމިޝަނަށް ޤާނޫނީ ޒިންމާ އެންމެ ފުރިހަމައަށް އަދާ ކުރެވުމަކީ ގިނަ ބަޔަކުކުރާ އުއްމީދެކެވެ.
