ސްޕޯޓްސް އެވޯޑްސް ގައި ވައިވެރިވުމަށް ރާއްޖެއައި ބްރެޒިލްގެ ވޮލީބޯޅަ ލެޖެންޑް ގިލްބާޓޯ ގޮޑޯއީ (ގިބާ) ރާއްޖޭގެ ޒުވާން ވޮލީބޯޅަ ކުޅުންތެރިންނާއެކު ޚާއްސަ ސެޝަންއެއް ކުރިއަށް ގެންގޮސްފިއެވެ.
ގިނަ އަދަދެއްގެ ކުޅުންތެރިން ބައިވެރިވި މި ހަރަކާތް ކުރިއަށް ގެންގޮސްފައިވަނީ ހުކުރު ދުވަހުގެ ހަވީރު މާލޭގެ ބީޗް ވޮލީބޯޅަ ކޯޓުގައެވެ. މި ސެޝަންގައި ގިބާ ވަނީ ސަރވިސް ކުރުމުން ފެށިގެން ވޮލީބޯޅައިގެ ބޭސިކް ގިނަ ކަންތައްތަކެއް ރާއްޖޭގެ ކުޅުންތެރިންނަށް ދަސްކޮށްދީފައެވެ. އަދި ރާއްޖޭގައި އޭނާއަށް ސަޕޯޓުކުރާ ގިނަ އަދަދެއްގެ ސަޕޯޓަރުންނާއެކު އޭނާ ވަނީ ވަގުތު ހޭދަކޮށްފައެވެ. މި ހަރަކާތުގައި ވޮލީބޯޅަ އެސޯސިއޭޝަންގެ އިސްވެރިންގެ އިތުރުން ކުޅިވަރާއި ބެހޭ ވަޒީރު އަހްމަދު މަހްލޫފްވެސް ބައިވެރިވެވަޑައިގަތެވެ.
މޯލްޑިވްސް ސްޕޯޓްސް އެވޯޑްސްގައި ބައިވެރިވުމަށް ރާއްޖެ އައުމަށްފަހު ދިން އިންޓަރވިއުއެއްގައި ވެސް ގިބާ ބުނީ އޭނާގެ މި ދަތުރުގައި ރާއްޖޭގެ ޒުވާން އެތުލީޓުންނާއެކު ވަގުތު ހޭދަކޮށް އެ އެތުލީޓުންނަށް އިތުރު ކަންތައްތަކެއް ދަސްކޮށްދޭނެ ކަމަށެވެ. އަދި ގިނަ ފަރާތްތަކަކުން ރާއްޖެ އަންނަނީ ޗުއްޓީ ހޭދަކޮށްލުމަށް ނަމަވެސް އޭނާ ރާއްޖެއައީ ރާއްޖޭގެ ވޮލީބޯޅައާއި ރާއްޖޭގެ ކުޅިވަރުތައް އިތުރަށް ކުރިއަރުވަން ކަމަށް ބުނެފައިވެއެވެ.
ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީގެ އެތުލީޓްސް ކޮމިޝަންގެ ސެކްރެޓަރީކަމުގެ މަގާމު ފުރަމުން އަންނަ ގީބާ ރަސްމީކޮށް ވޮލީކުޅުން ހުއްޓާލީ 2012 ވަނަ އަހަރުއެވެ. ނަމަވެސް ގީބާ ބުނީ ރާއްޖޭގެ އެތުލީޓުންނާއެކު އޭނާ ވޮލީކުޅެން ބޭނުންވާ ކަމަށެވެ. އަދި އެފަރާތްތަކާއި ޗެލެންޖުކޮށް، ހުނަރުތައް ކުރިއަރުވަން މަސައްކަތް ކުރާނެކަމަށެވެ.
ގީބާ ބުނީ ރާއްޖެ އައުމަކީ އޭނާ ވަރަށް ކުރިންވެސް ދެކެމުންއައި ހުވަފެނެއް ކަމަށާއި، އެހުވަފެން ހަގީގަތަކަށްވެ މިއަދު ރާއްޖެ އާދެވުމުން ވަރަށް އުފާކުރާ ކަމަށެވެ. އަދި ގިނަ ކުޅިވަރުތަކެއް ހިމެނޭހެން އެވޯޑު ދިނުމުގެ ހަފްލާއެއް ބޭއްވުމުގެ މުހިންމުކަން ފާހަގަކޮށް، ގީބާ ބުނީ ތައުލީމާއި އެއްވަރަށް ކުޅިވަރަކީވެސް ވަރަށް މުހިންމު ކަމެއް ކަމަށެވެ.
