ރާއްޖޭގެ ފުޓްސަލް ޓީމުން ބައިނަލްއަގްވާމީ މެޗަކުން ފުރަތަމަ މޮޅު ހޯދައިފި

ތައިލެންޑުގައި މިހާރު ކުރިއަށްދާ އެން.އެސް.އެފް.ޑީ އިންވިޓޭޝަަނަލް ފުޓްސަލް ކަޕުގެ ރޭންކިންގ މެޗުގައި މޮންގޯލިއާ އާއި ވާދަކޮށް ރާއްޖޭގެ ގައުމީ ފުޓްސަލް ޓީމުން މެޗު ކާމިޔާބުކޮށްފިއެވެ.

މި މެޗުން ރާއްޖެ މޮޅުވީ 8-7 ގެ ނަތީޖާއަކުންނެވެ. މިއި ރާއްޖޭގެ ގައުމީ ފުޓްސަލް ޓީމު ބައިނަލްއަގްވާމީ މެޗަކުން މޮޅުވި ފުރަތަމަ ފަހަރެވެ. މި މޮޅާއެކު ރާއްޖެ ވަނީ މުބާރާތުގެ ފަސް ވަނައިގައި ރޭންކު ކުރެވިފައެވެ.

ޖުމްލަ ހަ ގައުމަކުން ވާދަކުރި މި މުބާރާތުގައި ހޮނިހިރު ދުވަހު ބައްދަލުކުރީ ކޮންމެ ގްރޫޕަކުންވެސް އެންމެ ފުލުގައި އޮތް ދެޓީމެވެ. މުބާރާތުގެ ރޭންކިން މެޗުގެ ފުރިހަމަ ވަގުތު ހަމަވީ ކޮންމެ ޓީމަކުންވެސް ތިން ލަނޑުޖަހާ އެއްވަރުވެފައި ވަނިކޮށެވެ. ރާއްޖެ ޓީމުގެ އަބްދުﷲ ޝާފިއު (ޝާއްޕެ) މި މެޗުގައި ދެ ލަނޑު ކާމިޔާބުކުރިއިރު، ހުސެއިން ޝަރީފް (އޮންލީ) ވެސް ވަނީ ލަނޑެއް ޖަހާފައެވެ.

މެޗުގެ ފުރިހަމަ ވަގުތު ހަމަވިއިރު ދެޓީމު އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ. ރާއްޖޭން ޕެނަލްޓީތައް ކާމިޔާބުކުރީ އަބްދުﷲ ޝައްފާން (ޝާކާ)، އޮންލީ، މުހައްމަދު އިމްރާން (އިންމި)، ސާމިން މުހައްމަދު، އިޝާން އިބްރާހިމް (ސައްޓު) އެވެ. ރާއްޖޭގެ މުހައްމަދު ޔަފާއު ޖެހި ޕެނަލްޓީ އިދިކޮޅު ކީޕަރު މަތަކުރިއިރު، ހުޒައިފަތު ރަޝީދު ފޮނުވާލި ޕެނަލްޓީ ދިޔައީ ދަނޑީގައި ޖެހިފަ ބޭރަށެވެ.

މި މެޗުގެ މޮޅު ކުޅުންތެރިޔާގެ މަގާމު ހާސިލްކުރީ މި މުބާރާތުގައި މޮޅު ކުޅުމެއް ދައްކާފައިވާ ރާއްޖޭގެ އަބްދުﷲ ޝާފިއު (ޝާއްޕެ) އެވެ.

ރާއްޖެއިން މި މުބާރާތުގައި ބައިވެރިވީ އަންނަ މަހު ބޭއްވުމަށް ހަމަޖެހިފައިވާ އޭޝިއަން ފުޓްސަލް ކަޕް ކޮލިފައިން އަށް ތައްޔާރުވުމުގެ ގޮތުންނެވެ. ކޮލިފައިންގައި ރާއްޖެ ބައްދަލުކުރަން ޖެހޭނީ އޭޝިއާގެ ޗެމްޕިއަން އީރާންގެ އިތުރުން ކިރްގިސްތާން އާއި ތުރުކުމެނިސްތާން އާއެވެ.