މޯލްޑިވްސް ސްޕޯރޓްސް އެވޯޑް މިއުޒިކް ޝޯގައި ބޮލީވުޑްގެ މަޝްހޫރު ލަވަކިޔުންތެރިޔާ ޝާން ބައިވެރިވަނީ
18 މާރިޗު 2022 | ހުކުރު 15:13މި ޝޯގައި ނިޝް ބޭންޑް، ސަފޫރާ ވިތް ސޯ ބްލޫ އަދި ނަޒިއްކޮ ބައިވެރިވާނެ
ބޮލީވުޑްގެ މަޝްހޫރު ލަވަކިޔުންތެރިޔާ ޝާން ޔޫތު މިނިސްޓަރު މަހުލޫފާއެކު
މޯލްޑިވްސް ސްޕޯރޓްސް އެވޯރޑް މިއުޒިކް ޝޯގައި ބައިވެރިވުމަށް ބޮލީވުޑްގެ މަޝްހޫރު ލަވަކިޔުންތެރިޔާ ޝަންތަނު މުކަރުޖީ (ޝާން) ރާއްޖެ އައިސްފިއެވެ.
ހުކުރު ދުވަހުގެ ރޭ އެކުވެނި ދަނޑުގައި އޮންނަ މި ޝޯގައި ޝާންގެ ހުށަހެޅުންތައް ފެނިގެންދާނެއެވެ. ރާއްޖެ އައިސް ޔޫތު މިނިސްޓަރު އަހުމަދު މަހުލޫފާއެކު އެއަރޕޯޓްގައި ހުރެ ހިއްސާކުރި މެސެޖްގައި ޝާން ބުނީ މޯލްޑިވްސް ސްޕޯރޓްސް އެވޯރޑް ޝޯގައި ބައިވެރިވުމުގެ ފުރުސަތު ލިބުމުން ވަރަށް އުފަލުން ހުރި ކަމަށެވެ. ދަނޑުގައި ހުކުރު ދުވަހުގެރޭ 9:00ގައި މި ޝޯ ފެށިގެންދާއިރު، ޝާންގެ މަޝްހޫރު ލަވަތަށް ހުށައަޅައިދޭނެއެވެ.
ޝާންގެ އިތުރުން މި ޝޯގައި ނިޝް ބޭންޑް، ސަފޫރާ ވިތު ސޯ ބްލޫ އަދި ނަޒިއްކޮ ބައިވެރިވާނެކަން މިނިސްޓަރު ހާމަކުރެއްވިއެވެ.
ޝޯ ކުރިއަށް ގެންދަނީ އާންމުކޮށް ހުޅުވާލައިގެންނެވެ.
މޯލްޑިވްސް ސްޕޯރޓްސް އެވޯރޑްގައި ބައިވެރިވުމަށް ކުޅިވަރުގެ ދައިރާގައި ދުނިޔޭގެ މަޝްހޫރު ތަރިންވަނީ ރާއްޖެ އައިސްފައެވެ. ފުޓުބޯޅައިގެ ލެޖެންޑުން ކަމުގައިވާ، ރޮބާޓޯ ކާލޯސް، މިކޭލް ސަލްގާޑޯ އަދި ކުޅިވަރު ނޫސްވެރިޔާ ރޮމާނޯ ފަބްރީޒިއޯ ފަދަ ފާހަގަކޮށްލެވޭ އެތައް ފަރާތެއް އެވޯޑް ހަފްލާގައި ބައިވެރިވިއެވެ.
