ޕެސްޓް އަނބުރާ ޖަލަށް ބަދަލުކުރުމަށް ހައިކޯޓުން އަމުރުކޮށްފި
16 މާރިޗު 2022 | ބުދަ 13:23ކްރިމިނަލް ކޯޓުން އޭނާ ގޭބަންދަށް ދޫކޮށްފައިވަނީ ދެ މަސްދުވަހަށް
ހައި ކޯޓު
މަސްތުވާތަކެތީގެ މައްސަލައެއްގައި ޝަރީއަތް ނިމެންދެން ބަންދުކޮށްފައި ހުއްޓައި, މަޝްހޫރު ރެޕް ލަވަކިޔުންތެރިޔާ ޏ. ފުވައްމުލައް-ދިގުވާނޑު، ނައި، އިސްމާއިލް އިފްހާމް މުހައްމަދު (ޕެސްޓު) ގޭ ބަންދަށް ބަދަލުކުރުމަށް ކްރިމިނަލް ކޯޓުން ކުރި އަމުރު ބާތިލްކޮށް، ޖަލަށް އަނބުރާ ބަދަލު ކުރުމަށް ހައިކޯޓުން އަމުރުކޮށްފިއެވެ.
އެކަށީގެންވާ ބޭސްފަރުވާ ލިބެމުން ނުދާކަމަށް ޕެސްޓް ބުނެފައިވާތީ, ޝަރުތުތަކާއެކު ކްރިމިނަލް ކޯޓުން އޭނާ ގޭބަންދަށް ދޫކޮށްފައިވަނީ ދެ މަސްދުވަހަށެވެ. ނަމަވެސް މި މައްސަލަ ޕްރޮސެކިއުޓަރ ޖެނެރަލް (ޕީޖީ) އޮފީހުން ވަނީ ހައިކޯޓުގައި އިސްތިއުނާފުކޮށްފައެވެ.
ހައިކޯޓުގައި މިމައްސަލަ ބައްލަވާފައިވަނީ ފަނޑިޔާރު އަލީ ސަމީރު، އިސްފަނޑިޔާރު ހާތިފް ހިލްމީ, އަދި ފަނޑިޔާރު އަބްދުލްރައޫފު އިބްރާހިމް އެވެ.
ހައިކޯޓުން ކުރި ހުކުމްގައި ބުނެފައިވަނީ, ބޭސްފަރުވާއާ ގުޅޭގޮތުން ކުރި ޝަކުވާތަކަށް ބެލިކަމަށް ދަށު ކޯޓުގެ އަމުރުގައި އޮތް ކަމުގައި ވިޔަސް, އެ ކަންކަމުގެ ތަފްސީލު އެ ނިންމުމުން އެނގެން ނެތްކަމަށެވެ. އެހެންކަމުން ކޯޓުން ވަނީ ޖަލަށް އަނބުރާ ބަދަލުކުރުމަށް ނިންމައި ހުކުމް ކޮށްފައެވެ.
މި މައްސަލާގައި ޕެސްޓް ހިމެނޭހެން ފަސް މީހެއްގެ މައްޗަށް ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް ހުށަހެޅީ 2021 ވަނަ އަހަރުގެ އޭޕްރީލް މަހުއެވެ. މި މައްސަލައިގެ އަޑުއެހުންތައް ކްރިމިނަލް ކޯޓުގައި ކުރިއަށް ގެންގޮސް، އޭނާ ޝަރީއަތް ނިމެންދެން ބަންދުކޮށްފައި ހުއްޓައި ގާޒީ ވަނީ ބޭސްފަރުވާއަށް އޭނާ ޝަރުތުތަކާއެކު ގޭބަންދަށް ދޫކޮށްލައްވާފައެވެ.
ޕެސްޓް ހައްޔަރުކޮށްފައިވަނީ ގިނައަދަދެއްގެ މަސްތުވާތަކެތި ރާއްޖެ އެތެރެކުރުމަށްފަހު އެތަކެތި ގެންގުޅެ، ބޭނުންކޮށް އަދި ވިޔަފާރި ކުރާކަމަށް ލިބުނު މައުލޫމާތަކާއި ގުޅިގެން ފުލުހުން ހިންގި އޮޕަރޭޝަނެއްގެ ތެރެއިން, 2021 ވަނަ އަހަރުގެ ފެބްރުއަރީ މަހުގެ 13 ވަނަ ދުވަހުއެވެ. މި އޮޕަރޭޝަންގައި ޕެސްޓްގެ އިތުރުން ފުލުހުން ހައްޔަރުކޮށްފައިވަނީ، ލ. ގަން/ތުނޑި، ހަނދުވަރީހިޔާ، އަހްމަދު ޝަމްއޫނާއި ލ. ގަން/ތުނޑި، ރޯޝަންހިޔާ، އަހްމަދު ހުސާމާއި ލ. ގަން/ތުނޑި، އަބަދަށްއުފާ، މުހައްމަދު ސުއައިދު އާއި ކ. މާލެ/ މ. އަސަރީހަނދާން، އާއިޝަތު ހަސްނާ ނާހިދުއެވެ.
މި މައްސަލައިގައި ޕްރޮސެކިއުޓަރ ޖެނެރަލްގެ އޮފީހުން ބުނީ، 13 ފެބްރުވަރީ 2021 ދުވަހު، ދިވެހިރާއްޖެއަށް މަސްތުވާތަކެތި އެތެރެކުރުމަށްފަހު އެތަކެތި މއ. ވީމާގޭގައާއި، ގ. ރިހިއަވިގޭގެ އިތުރުން, މައްސަލާގައި ދައުވާލިބޭ މީހުންނާ ގުޅުންހުރި ތަންތަނުގައި ބޭނުންކޮށް، ގެންގުޅެ, އަދި އެތަކެތީގެ ވިޔަފާރި ކުރާކަމަށް ތުހުމަތު ކުރެވޭ ކަމަށެވެ.
މައްސަލައިގައި ތުހުމަތުކުރެވޭ ޕެސްޓްގެ މައްޗަށް ފަސް ދައުވާއެއް އުފުލާފައިވެއެވެ. އެއީ ކެނެބިސް ޓްރެފިކްކުރުމުގެ ކުށުގެ ދައުވާއާއި، ޑައިމޯފިން ޓްރެފިކް ކުރުމުގެ ކުށުގެ ދައުވާއާއި، މަސްތުވާތަކެއްޗާބެހޭ ގާނޫނުގެ ޖަދުވަލު 1ގައިވާ, މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާއާއި، ކެނެބިސް ބޭނުންކުރުމުގެ ކުށުގެ ދައުވާގެ އިތުރުން, ކުށްކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާއެވެ.
