ރައްޔިތުންގެ މަޖިލީހުގެ މެމްބަރުކަން ކުރީގައި ކުރައްވާފައިވާ ޢަބްދުއްރަޝީދު ޢަލީގެ ހަނދާނުގައި ސުކޫތެއް
ރައްޔިތުންގެ މަޖިލީހުގެ އ އަތޮޅުގެ މެމްބަރުކަން އަދި ފަހުން އދ އަތޮޅުގެ މެންބަރުކަން ދިގު މުއްދަތަކަށް ކުރައްވާފައިވޭ
އަބްދުއްރަޝީދުގެ ހަނދާނުގައި ހަމަހިމޭން ކަމުގެ ސުކޫތެއް
ރައްޔިތުންގެ މަޖިލީހުގެ މެމްބަރުކަން ކުރީގައި ކުރައްވާފައިވާ ޢަބްދުއްރަޝީދު ޢަލީ އަވަހާރަވުމާއި ގުޅިގެން އެމަނިކުފާނުގެ ހަނދާނުގައި ރައްޔިތުންގެ މަޖިލީހުގައި ހަމަހިމޭންކަމުގެ ސްކޫތެއް ގެނެސްފިއެވެ.
ޢަބްދުއްރަޝީދު އަވަހާރަވީ އިންޑިއާގެ ބެންގަލޫރުގައި އަންގާރަ ދުވަހުގެ ހެނދުނެވެ. އަބްދުއްރަޝީދު ވަނީ ރައްޔިތުންގެ މަޖިލީހުގެ އ އަތޮޅުގެ މެމްބަރުކަން އަދި ފަހުން އދ އަތޮޅުގެ މެންބަރުކަން ދިގު މުއްދަތަކަށް ކުރައްވާފައެވެ. އަދި ޚާއްސަ މަޖިލީހުގެ މެމްބަރުކަން ކުރައްވާފައިވެއެވެ.
ސަރުކާރުގެ އެހެން މަގާމުތައް ވެސް އަބްދުއްރަޝީދު އަދާކުރެއްވި އެވެ. އޭގެ ތެރޭގައި ޖެންޑަރ މިނިސްޓްރީގެ ޑިރެކްޓަރ ޖެނެރަލުކަމާއި ފުލުސް ކޯޓުގެ ފުރަތަމަ އިސް ގާޒީ ކަމާއި ޕްރިޒްންސް ޑިވިޝަންގެ އިސްވެރިޔާ ކަމާއި މާފަންނު އަވަށު އޮފީހުގެ އިސްވެރިއެއްގެ މަގާމު ހިމެނެއެވެ. މީގެ އިތުރުން އަހުމަދިއްޔާ ސްކޫލްގެ ފުރަތަމަ ޕްރިންސިޕަލުގެ މަޤާމުވެސް ފުރުއްވިއެވެ.
އަބްދުއްރަޝީދު އަވަހާރަވިއިރު އަނބިކަނބަލަކާއި ތިން ދަރިކަނބަލުން އަދި ހަތަރު ދަރިކަލުން ދުނިޔޭގެ އެބަތިއްބެވިއެވެ. އަބްދުއްރަޝީދަކީ، ރައްޔިތުންގެ މަޖިލީހުގެ ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދުގެ ބައްޕާފުޅެވެ.
