ބޯހިޔާވަހިކަން ފަހިކޮށްދިނުމަކީ އެމްޑީޕީގެ ވައުދެއް

އެމްޑީޕީގެ ސްލޮޓެއްގައި ވަޒީރުކަން ކުރައްވަމުން ގެންދަވާ ވަޒީރެއްކަމަށްވާ, މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ ވަނީ, މާލެ ސަރަހައްދުން މާލޭގެ ރައްޔިތުންނަށް ދޫކުރަން ސަރުކާރުން ނިންމާފައިވާ ގޯތިތަކަށް ކުރިމަތިލުމަށް ކަނޑައަޅާފައިވާ ޝަރުތުތަކާ ގުޅޭގޮތުން ހޯމަ ދުވަހު އޮތް މަޖިލީހުގެ ޖަލްސާގައި ވާހަކަ ދައްކަވާފައެވެ.

މާލެ ސަރަހައްދުން ގޯތި ދޫކުރުމުގެ މަސައްކަތް ފެށޭނެ ތާރީޚަކާއި އެއަށް ކަނޑައެޅިފައިވާ ޝަރުތުތަކާ ގުޅޭގޮތުން މެމްބަރުން ކުރެއްވި ސުވާލުތަކަށް މިނިސްޓަރު ވަނީ ޖަވާބުދެއްވާފައެވެ.

މިނިސްޓަރު އަސްލަމް ވިދާޅުވީ، އެ ޝަރުތުތަކަކީ، މާލެއަށް އުފަން މާލެ ރައްޔިތަކަށްވުމާއި، އެ މީހެއްގެ ނަންމަތީގައި 600 އަކަފޫޓަށް ވުރެ ބޮޑު ބިމެއް ނެތުމާއި އަދި ވާރުތަކުރަން ވެސް އެވަރުގެ ބިމެއް ނެތުމާއި, އެވަރުގެ ބިމެއް ލިބިއްޖެނަމަ ދައުލަތަށް ދޫކޮށްލުން ނުވަތަ ވާރުތަވާން އޮތް ތަނެއްވެސް ދޫކޮށްލުމެވެ. ތިންވަނަ ޝަރުތެއްގެ ގޮތުގައި ވިދާޅުވީ، ދަފްތަރަށް އުފަން މީހުންނަށް ވެސް ކުރިމަތިލެވޭނެ ކަމަށެވެ. މީގެ އިތުރުން މާލޭގައި ދިރިއުޅޭނެ އެއްވެސް ތަނެއް ނެތް މާލެ މީހުންނަށް ވެސް ގޯއްޗަށް ކުރިމަތިލެވޭނެ ކަމަށެވެ.

މި ޝަރުތުތައް ހިއްސާ ކުރެއްވުމުން މެމްބަރުން ދެއްކެވި ވާހަކަތަކަށް ބަލާއިރު، ހުސް އެކަނި ޝަރުތު ކަނޑައެޅުމަކުން ނުފުދޭ ކަމަށް ވިދާޅުވެ ބައެއް މެމްބަރުން ވަނީ މަޖިލީހުގައި ޝުއޫރު ފާޅުކުރައްވާފައެވެ. އެގޮތުން ޝަރުތު ކަނޑައެޅުމަކުން މިކަމެއް ނުނިމޭ ކަމަށާއި, ކަމެއް ކުރެވުނު ކަމަށް ވާނީ އެތަންތަން މާލޭ މީހުންނަށް ދެވުމުން ކަމަށް ވިދާޅުވެ އެމްޑީޕީއަށް ނިސްބަތްވެވަޑައިގަންނަވާ ބައެއް މެމްބަރުންވެސް ވާހަކަ ދައްކަވާފައިވެއެވެ.

އެމްޑީޕީގެ ބައެއް މެމްބަރުންގެ ވާހަކަތައް ބައެއް ފަރާތްތަކުން ސިފަކުރަމުންދަނީ އިދިކޮޅު ސިޔާސީ ޕާޓީއެއްގެ ދައުރު އަދާކުރާ ޕާޓީއެއްގެ ބަސްމަގު ފަދައިންނެވެ. އެގޮތުން ސަރުކާރަށް ކަމެއް ކުރެވުނުކަމަށް ވާނީ އެކަމެއް ކޮށް، އެ މަންޒަރު ދެއްކުމުން ކަމަށް ސަރުކާރު ހިންގާ ޕާޓީގެ މެމްބަރުން ވިދާޅުވާއިރު، މިއީ ވަކި ސިޔާސީ ޕާޓީއެއްތޯ ބައެއް ފަރާތްތަކުން ދަނީ ސުވާލު ކުރަމުންނެވެ. ނުވަތަ ސަރުކާރުން ކުރަމުންދާ މަސައްކަތްތަކުގެ އަމާޒާއި، ސަރުކާރު ހިންގާ ޕާޓީއަށް ނިސްބަތްވާ މަޖިލިސް މެމްބަރުން ކުރައްވާ މަސައްކަތްތަކުގެ އަމާޒު މުޅިން ތަފާތީތޯވެސް މީހުން ދަނީ ސުވާލު އުފައްދަމުންނެވެ.

ބޯހިޔާވަހިކަން ފަހިކޮށްދިނުމަކީ އެމްޑީޕީގެ އެޖެންޑާ 19 މެނިފެސްޓޯގައި ހިމެނޭ ކަމެކެވެ. އޭރު އެމްޑީޕީ ވެރިކަމަށް އައީ އެއް އަމާޒެއްގައި އެ މަސައްކަތް ކުރުމަށެވެ. މަޖިލީހަށް މެމްބަރުން ކެމްޕޭންކުރިއިރު ވީ އެންމެ ބޮޑު އެއް ވައުދަކީ ސަރުކާރުގެ ވައުދުތައް ފުއްދުމާއި، އެޖެންޑާ 19ގެ ލަނޑުދަނޑިތައް ޙާސިލު ކުރުމަށް މަސައްކަތް ކުރުމެވެ. އެއީ ބޯހިޔާވަހިކަން ވިޔަސް، ބޭސް ފަރުވާ ވިޔަސް، ޖުޑީޝަރީ އިސްލާހުކުރުން ކަމުގައިވިޔަސް، ނުވަތަ މިނިވަން މުއައްސަސާތައް އިސްލާހުކުރުން ކަމުގައި ވިޔަސްވެހެވެ.

އެހެންނަމަވެސް މިއަދު މަންޒަރު ފެންނަނީ އެހެނެއް ނޫނެވެ. އެޖެންޑާ 19ގެ ވައުދުތައް ފުއްދުމުގައި ސަރުކާރާއެކު އޮންނާނެކަމަށް ބުނަމުންދިޔަ މަޖިލިސް މިއަދު ފެންނަނީ ސަރުކާރާ ނުހަނު ބީރައްޓެހި ކޮށެވެ. ކަމެއް ހާސިލުކުރުމަށް އެކުގައި މަސައްކަތް ކުރުމުގެ ރޫހަށްވުރެ ބޮޑަށް ފެންނަނީ, ސަރުކާރަށް ކަމެއް ވަންޏާ ކޮށްފައި ދައްކާށޭ ބުނެ ހަޖޫ ޖަހާ މަންޒަރެވެ. މިއަދު މަޖިލީހުގައި އޮޕޮޒިޝަންގެ ދައުރު އަދާ ކުރާތަންވެސް ބައެއް ފަހަރު ފެންނަމުންދަނީ ވެރިކަން ކުރާ މައި ޕާޓީންކަމަށް ބުނާ މީހުންވެސް މަދެއް ނޫނެވެ.

ބޯހިޔާވަހިކަން ފަހިކޮށްދިނުމަކީ އެމްޑީޕީގެ ވައުދެކެވެ. ސަރުކާރުގެ، މަޖިލީހުގެ ވައުދަކަށްވުރެ ބޮޑަށް، އެމްޑީޕީގެ މެނިފެސްޓޯގައި ހިމަނައި، ރައްޔިތުންނަށް ވީ ވައުދެކެވެ. އެކަމުގައި ސަރުކާރެއް މަޖިލީހެއް ތަފާތެއް ނެތެވެ.