އެމްޑީޕީގެ އެތެރޭގެ އިންތިޚާބު ގަދަ ހިފުމަކަށް، ޥޯޓްލުން މާދަމާ

މާދަމާއަކީ އިދިކޮޅު އެންމެ ބޮޑު ސިޔާސީ ޕާޓީ އެމްޑީޕީގެ މެމްބަރުންނަން ހާއްސަ ދުވަހަކެވެ. އެޕާޓީގެ ޗެއާޕާސަންގެ ނައިބު އިދާރީ އަދި ޗެއާޕާސަންގެ ނައިބު މާލީގެ މަގާމަށް ބޭފުޅުން އިންތިހާބު ކުރުމަށް ބާއްވާ އިންތިޚާބު ބާއްވާ ދުވަހެއެވެ. ޕާޓީގެ އެތެރޭގެ އިންތިޚާބެއް ނަމަވެސް ކެޑިޑޭޓުންގެ ކެމްޕޭން ކުރިއަށް ގެންދަނީ ވަރަށް ފޯރިއާއި އެކުގައެވެ. ވާދަވެރިކަން އެކަން އެކަމުން ހާމަވެގެން ދެއެވެ. މާދަމާ އެމްޑީޕީގެ މެމްބަރުން ނިންމުން ވޯޓުން ނިންމާނެވެ.

މި އިންތިޚާބުގެ ވޯޓުލުން ކުރިއަށް ގެންދަން ނިންމާފައި ވަނީ މާދަމާ ހަވީރު 15.00 ފެށިގެން 18.00 އަށް އެޕާޓީގެ ހަރުގެ ތަކުގައެވެ. މި އިންތިޚާބުގައި ވޯޓުލެވޭނީ އެ ޕާޓީގެ ގޮފިތަކަށާއި ރަށް ރަށުގެ އެމްޑީޕީގެ ކައުންސިލް މެމްބަރުންނަށެވެ. ޖުމްލަ 150 ވޯޓް ފޮށި ދިވެހި ރާއްޖޭގެ އެކި ކަންކޮޅުތަކުގައި ބަހައްޓަން ވަނީ ނިންމާފައެވެ. މީގެ ކުރިން އެޕާޓީގެ އެތެރޭ އިންތިޚާބުތަކުގައި ލަންކާގައިވެސް ވޯޓް ފޮށި ބެހެއްޓިނަމަވެސް، މި އިންތިހާބުގައި ލަންކާގައި ވޯޓް ފޮށި ނުބަހައްޓަން އެޕާޓީން ވަނީ ނިންމާފައެވެ.

އެމްޑީޕީން ބުނީ މި އިންތިޚާބުގެ ވަގުތީ ނަތީޖާ މާދަމާ އިއުލާން ކުރާނެ ކަމަށެވެ.

އެމްޑީޕީގެ ޗެއާޕާސަން ނައިބު މާލީގެ މަގާމަށް ތިން ބޭފުޅަކު ކުރިމަތިލައިވާއިރު ވާދަވެރި ކެމްޕެއިންތަކެއް ވަނީ ކުރިއަށް ގެންގޮސްފައެވެ. އެ މަގާމަށް ކުރިމަތިލައްވާފައިވަނީ ހުސެއިން ޝަހީމް (އަނދުން ހުސެއިން) އާއި އިބްރާހިމް ވަހީދު (އެންސްޕާ ވަހީދު) އާއި ރައްޔިތުންގެ މަޖިލީހުގެ ކުރީގެ މެމްބަރު އަހްމަދު އަބްދުﷲ އެވެ.

މި ތިން ބޭފުޅުންގެ ކެމްޕޭން ޓީމްތަށް ވަނީ އަތޮޅުތެރޭގެ ރަށްތަކަށް ދަތުރުކޮށް، މަގާމަށް އިންތިހާބް ވެއްޖެނަމަ ކަންކުރާނެ ގޮތް އެޕާޓީގެ ގޮފިތަކުގެ ރައީސުންނާއި ކައުންސިލަރުންނާއި ހިއްސާކޮށްފައެވެ. ކެމްޕެއިން ޓީމްތަކުގައި އެޕާޓީގެ ޕީޖީ ގްރޫޕްގެ މެމްބަރުންނާއި ގައުމީ މަޖިލީހުގެ މެމްބަރުން ބައިވެރިވާ އިރު، ކޮންމެ ކެނޑިޑޭޓެއްވެސް ދަނީ ރައީސް މުހައްމަދު ނަޝީދަށް ރިޔާސީ އިންތިޙާބު ކާމިޔާބު ކޮށްދިނުމަށް ފަސްޖެހުމެއް ނެތި މަސައްކަތް ކުރާނެ ކަމަށް ބުނަމުނެވެ. އަދި އެމްޑީޕީގެ ގޮފިތަކަށް ބާރުވެރިކުރުމަށް، ރަށްރަށުގެ ހަރުގެ ހަރަކާތްތަށް ފޯރިއާއި އެކު ކުރިއަށް ގެންދިއުމަށް ކުރާނެ ކަންކަމާއިމެދު ދަނީ ވައުދުވަމުނެވެ.

އެމްޑީޕީގެ ޗެއާޕާސަންގެ ނައިބު އިދާރީގެ މަގާމާށް އަލީ ނިޔާޒް ވަނީ ހޮވިފައެވެ. އެމަޤާމަށް އަލީ ނިޔާޒް އިންތިޚާބުވިކަން ރަސްމީކޮށް ކަށަވަރުވާނީ މާދަމާ ބާއްވާ އިންތިޚާބުގައި ވޯޓު ނަގާއިރު މަދުވެގެން 10 ޕަސެންޓް ވޯޓު ލިބުމުންނެވެ. ނަމަވެސް އަލީ ނިޔާޒް އިންތިޚާބުވީ އެމަޤާމަށް ކުރިމަތިލެއްވީ އޭނާ އެކަނިކަމަށް ވުމުންނެވެ. ނިޔާޒަކީ ކުރިން އެޕާޓީގެ ޗެއަރޕާސަން މާލީގެ މަޤާމްގައިވެސް ހުންނެވި ބޭފުޅާއެވެ. ޗެއަރޕާސަން ނައިބު އިދާރީގެ މަސްއޫލިއްޔަތު ތަކުގެ ތެރޭގައި ޕާޓީގެ މެމްބަރޝިޕް ކޮމެޓީއާއި ކެމްޕެއިން ކޮމެޓީ ޗެއަރކުރެއްވުން އަދި ޗެއަރޕާސަން ނެތިއްޖެ ހާލަތެއްގައި އެމަޤާމް ފުރުން ހިމެނެއެވެ.