ފެބްރުއަރީމަހު ރާއްޖެއިން އެކްސްޕޯޓް ކުރި މުދަލުގެ އަގު އިތުރުވެއްޖެ

މިދިޔަ ފެބްރުއަރީ މަހު ރާއްޖެއިން އެކްސްޕޯޓުކުރި މުދަލުގެ އަގު 2021 ވަނަ އަހަރުގެ ފެބްރުއަރީ މަހާއި އަޅާ ބަލާއިރު އިތުރުވެއްޖެއެވެ.

މޯލްޑިވްސް ކަސްޓަމްސްއިން އާންމުކޮށްފައިވާ ފެބްރުއަރީ މަހުގެ ތަފާސްހިސާބުތައް ދައްކާގޮތުން 2021 ވަނަ އަހަރުގެ ފެބްރުއަރީ މަހު ރާއްޖެއިން އެކްސްޕޯޓުކޮށްފައިވަނީ 239 މިލިއަން ރުފިޔާގެ މުދަލެވެ. މިއަހަރު މި އަދަދު ވަނީ 309 މިލިއަން ރުފިޔާއަށް އިތުރުވެފައެވެ. މިއީ 29 އިންސައްތައިގެ އިތުރުވުމެއް ކަމަށް ކަސްޓަމްސްއިން ހާމަކޮށްފައިވެއެވެ.

Advertisement

ފެބްރުއަރީ މަހު ރާއްޖެ އެތެރެކޮށްފައިވާ މުދަލުގެ އަގުވެސް މިދިޔަ އަހަރުގެ މި މުއްދަތާއި އަޅާ ބަލާއިރު 39 އިންސައްތަ ވަނީ އިތުރުވެފައެވެ. 2021 ވަނަ އަހަރުގެ ފެބްރުއަރީ މަހު ރާއްޖެ އެތެރެކޮށްފައިވަނީ 2.7 ބިލިއަން ރުފިޔާގެ މުދަލެވެ. މި އަދަދު މިއަހަރު ވަނީ 3.8 ބިލިއަން ރުފިޔާއަށް އިތުރުވެފައެވެ.

ކަސްޓަމްސްއިން ބުނީ ފާއިތުވި މަހު ރާއްޖެއަށް އެންމެ ގިނައިން މުދާ އެތެރެކޮށްފައިވަނީ އޮމާން، ޔޫއޭއީ އަދި އިންޑިއާ އާއި ޗައިނާ އިން ކަމަށެވެ. އޮމާން އިން 621 މިލިއަން ރުފިޔާގެ މުދާ އެތެރެކޮށްފައިވާއިރު، ޔޫއޭއީ އިން 613 މިލިއަން ރުފިޔާގެ މުދާ ވަނީ އެތެރެކޮށްފައެވެ. އިންޑިއާއިން 509 މިލިއަން ރުފިޔާގެ މުދާ އަދި ޗައިނާ އިން 442 މިލިއަން ރުފިޔާގެ މުދާ ވަނީ އެތެރެކޮށްފައެވެ.

ފެބްރުއަރީ މަހު އަގުގެ ގޮތުން އެންމެ ގިނަ މުދާ ރާއްޖެއަށް އިމްޕޯޓުކޮށްފައިވަނީ އޮމާން އަދި ޔޫއޭއީން ކަމަށް ކަސްޓަމްސްއިން ހާމަކޮށްފައިވެއެވެ. ފެބްރުއަރީ މަހު ރާއްޖެއަށް އިމްޕޯޓުކުރި މުދަލުގެ 16 އިންސައްތަ ހިއްސާކުރަނީ މި ދެ ގައުމުންނެވެ. އަދި 13 އިންސައްތަ މުދާ އިންޑިއާއިން އެތެރެކޮށްފައިވާއިރު، ޗައިނާއިން 12 އިންސައްތަ އަދި ސިންގަޕޫރުން 8 އިންސައްތަ މުދާ ވަނީ އެތެރެކޮށްފައެވެ.

ފާއިތުވި މަހު ރާއްޖެއިން އެންމެ ގިނަ މުދާ އެކްސްޕޯޓުކޮށްފައިވަނީ ތައިލޭންޑަށްކަމަށް ކަސްޓަމްސްއިން ހާމަކޮށްފައިވެއެވެ. ފެބްރުއަރީ މަހު ރާއްޖެއިން އެކްސްޕޯޓުކުރި މުދަލުގެ 56 އިންސައްތަ މުދާ އެކްސްޕޯޓުކޮށްފައިވަނީ ތައިލޭންޑަށް ކަމަށް ކަސްޓަމްސްއިން ހާމަކޮށްފައިވެއެވެ. އިންގިރޭސިވިލާތް އަދި ޖަރުމަނުވިލާތަށް 7 އިންސައްތަ މުދާ އެކްސްޕޯޓުކޮށްފައިވާއިރު، އިންޑިއާއަށް އެކްސްޕޯޓުކޮށްފައިވަނީ 6 އިންސައްތަ މުދަލެވެ. އަދި ފަރަންސޭސިވިލާތަށް 3 އިންސައްތަ މުދާ އެކްސްޕޯޓުކޮށްފައިވެއެވެ.

ކަސްޓަމްސްއިން ބުނީ ފެބްރުއަރީ މަހު ރާއްޖެއިން ބޭރުން އައިސްފައިވާ 134 އުޅަނދަކަށް ކްލިއަރެންސް ދެވިފައިވާކަމަށެވެ. އަދި ރާއްޖެއިން ފުރާފައިވާ 136 އުޅަނދަކަށް ކްލިއަރެންސް ދެވިފައިވާކަމަށް ކަސްޓަމްސްއިން ބުނެފައިވެއެވެ.

ކަސްޓަމްސްއިން ބުނީ ފެބްރުއަރީ މަހު 325 މިލިއަން ރުފިޔާގެ އާމްދަނީއެއް ދައުލަތަށް ލިބިފައިވާކަމަށެވެ. މިއީ މިދިޔަ އަހަރުގެ މި މުއްދަތުގައި ކަސްޓަމްސްއަށް ލިބުނު އާމްދަނީއަށްވިރެ 27 އިންސައްތަ އިތުރު އަދަދެކެެވެ. މިދިޔަ އަހަރުގެ ފެބްރުއަރީ މަހު ދައުލަތަށް ލިބިފައިވަނީ 256 މިލިއަން ރުފިޔާގެ އާމްދަނީއެކެވެ. މިއަހަރުގެ ފެބްރުއަރީ މަހު ރޯޔަލްޓީގެ ގޮތުގައި 13.1 މިލިއަން ރުފިޔާ ލިބިފައިވާކަންވެސް ކަސްޓަމްސްއިން ވަނީ ހާމަކޮށްފައެވެ.