ޑިސްކައުންޓް އަގެއްގައި ރަޝިޔާއިން ތެޔޮ ގަތުމަށް އިންޑިއާއިން ވިސްނަނީ
14 މާރިޗު 2022 | ހޯމަ 09:57ދަނޑުވެރިކަމަށް ބޭނުންކުރާ ސާމާނުވެސް ރަޝިޔާއިން ހެޔޮ އަގެއްގައި ލިބޭތޯ މަސައްކަތް ކުރަމުން އަންނަނީ
ރަޝިޔާއިންވަނީ ޑިސްކައުންޓް އަގެއްގައި އިންޑިއާއަށް ތެޔޮ ވިއްކުމަށް ހުށަހަޅާފައި
ޑިސްކައުންޓް އަގެއްގައި ރަޝިޔާއިން ތެޔޮ ގަތުމަށް އިންޑިއާއިން ވިސްނަމުންދާ ކަމަށް އިންޑިއާއިން ބުނެފިއެވެ.
އިންޑިއާ ސަރުކާރުގެ ދެ އޮފިޝަލަކާ ހަވާލާދީ ރޮއިޓާރސްގައި ރިޕޯޓް ކޮށްފައިވާ ގޮތުން ރަޝިޔާއިންވަނީ ޑިސްކައުންޓް އަގެއްގައި އިންޑިއާއަށް ތެޔޮ ވިއްކުމަށް ހުށަހަޅާފައެވެ. ރަޝިޔާގެ މި ހުށަހެޅުން ގަބޫލުކުރުމާމެދު ވިސްނަމުން އަންނަ ކަމަށް އިންޑިއާއިން ވަނީ ބުނެފައެވެ.
ރަޝިޔާ - ޔޫކްރެއިން ހަނގުރާމައިގެ ސަބަބުން ބައެއް ގައުމުތަކުންވަނީ ރަޝިޔާއިން ތެޔޮ ގަތުން ހުއްޓާލުމަށް ނިންމާފައެވެ. އެހެންނަމަވެސް އެކަމުގެ ސަބަބުން ރަޝިޔާއިން ތެޔޮ އެތެރެކުރުން މަނަލެއް ނޫން ކަމަށް އިންޑިއާ ސަރުކާރުގެ އޮފިޝަލްވަނީ ވިދާޅުވެފައެވެ.
އިންޑިއާއަށް އެތެރެކުރާ 80 އިންސައްތަ ތެލުގެ ބާވަތުގެ ތެރެއިން ރަޝިޔާއިން އެތެރެކުރަނީ ގާތްގަނޑަކަށް 3 އިންސައްތައެވެ.
"ތެލާއި އެހެނިހެން ބާވަތްތައް ހެޔޮ އަގެއްގައި ދިނުމަށް ރަޝިޔާއިން ވަނީ ހުށައަޅާފައި. އެ ހުށަހެޅުން ގަބޫލްކުރަން ތައްޔާރު." އިންޑިއާ ސަރުކާރުގެ އޮފިޝަލަކު ވިދާޅުވިއެވެ.
އިންޑިއާއިން ބުނެފައިވަނީ، ދަނޑުވެރިކަމަށް ބޭނުންކުރާ ސާމާނުވެސް ރަޝިޔާއިން ހެޔޮ އަގެއްގައި ލިބޭތޯ މަސައްކަތް ކުރަމުން އަންނަ ކަމަށެވެ.
