ޕީޖީ އޮފީހުން ފުރަތަމަ ފަހަރަށް، ކްރިމިނަލް ކޯޓަށް އޮންލައިންކޮށް މައްސަލައެއް ހުށަހަޅައިފި
ފުލުހުން މަޝްވަރާ ބޭނުންވާ މައްސަލަތަކުގައި މަޝްވަރާ ކުރެވޭނެ އޮންލައިން ޕޯޓަލެެއް ވަނީ ޤާއިމުކޮށްފައި
ޕްރޮސެކިއުޓަރ ޖެނެރަލް ހުސައިން ޝަމީމް- ޝަމީމް ވަނީ ރާއްޖޭގެ ހުރިހާ ކޯޓުތަކަށް މިގޮތަށް މައްސަލަ ހުށަހެޅޭގޮތް ވެއްޖެނަމަ ބޮޑު ބަދަލެއް ފެންނާނެކަމަށް ވިދާޅުވެފައި
ފުރަތަމަ ފަހަރަށް، ކްރިމިނަލް ކޯޓަށް އޮންލައިންކޮށް މައްސަލައެއް ހުށަހަޅައި އެ މައްސަލަ ކްރިމިނަލް ކޯޓުން ބަލައިގެންފިއެވެ.
އެކަން ހާމަ ކުރައްވައި ޕްރޮސެކިއުޓަރ ޖެނެރަލް ހުސައިން ޝަމީމް އޭނާގެ ބްލޮގްގައި ޝާއިއު ކުރެއްވި ލިޔުމެއްގައި ވިދާޅުވީ، މަޤާމާއި ޙަވާލުވެވަޑައިގަތީއް ސުރެ ޓެކްނޮލޮޖީއަށް އިންވެސްޓު ކުރައްވައި، މަސައްކަތްތައް މިހާރަށްވުރެ "އޮޓޮމޭޓް" ކޮށްގެން ކުރިއަށް ގެންދިޔުމަށް މަސައްކަތް ކުރައްވާފައިވާނެ ކަމަށެވެ. ޝަމީމް ވަނީ އެގޮތުުގެ މަތިން ގެނެވިފައިވާ ބައެއް ބަދަލުތައް ހިއްސާ ކުރައްވާފައެވެ.
އޭގެ ތެރޭގައި ޑާޓާ އެންޓްރީގެ މަސައްކަތް މަދު ކުރުމާއި، ތަހުގީގީ އިދާރާތަކުން ހުށައަޅާ މައްސަލަތައް ޕީޖީ އޮފީހުގެ ކޭސް މެނޭޖްމަންޓް ސޮފްޓްވެއަރގެ ތެރެއަށް ނެގުމާއި، ފުލުހުން މަޝްވަރާ ބޭނުންވާ މައްސަލަތަކުގައި މަޝްވަރާ ކުރެވޭނެ އޮންލައިން ޕޯޓަލެެއް ޤާއިމު ކުރެއްވުން ހިމެނެއެވެ.
މީގެއިތުރުން، ޕީޖީ އޮފީހުގެ ކޭސް މެނޭޖްމަންޓް ސޮފްޓްވެއަރގެ އޭޕީއައި އަކުން ކޯޓާއި ގުޅާލެވި، އެ ލިންކު މެދުވެރިކޮށް، ޕީޖީ އޮފީހުން މައްސަލައެއް އަޕްލޯޑް ކުރުމުން، ކޯޓުން އެމައްސަލައިގެ ލިޔުންތައް ބަލައިގަނެވޭ ގޮތަށް ވަނީ ހަމަޖައްސާފައެވެ. ޝަމީމް ވިދާޅުވާ ގޮތުގައި އެ މަސައްކަތް މީގެ ހަފްތާއެއްހާ ދުވަސް ކުރިން ނިންމައި ވަނީ އަޖުމަ ބެލިފައެވެ.
އެއާއެކު، ކްރިމިނަލް ކޯޓުގެ ފަނޑިޔާރުންގެ މަޖިލީހުގެ އިސްނެންގެވުމަކާއެކު، އޮންލައިންކޮށް މައްސަލަ ބަލައިގަތުމުގެ ކަންތައް ރަސްމީކުރުމަށް ނިންމަވާފައިވާކަން ޝަމީމް ފާހަގަކުރެއްވިއެވެ. އަދި އާދިއްތަ ދުވަހު ރަސްމީކޮށް އެ މަސައްކަތް މިހާރު ފެށިފައިވާކަމަށްވެސް ޝަމީމް ވިދާޅުވިއެވެ. މިއީ ޕީޖީ އޮފީހާއި ކޯޓުގެ ވަގުތު އެތައް ގޮތަކުން ސަލާމަތް ކުރެވޭނެ ކަމެއްކަމަށްވެސް ޝަމީމް ވިދާޅުވިއެވެ.
މި ބަދަލު ގެންނެވުމަށް ކްރިމިނަލް ކޯޓުގެ ފަނޑިޔާރުންގެ މަޖިލީހުން ނިންމެވީތީ، ކްރިމިނަލް ކޯޓުގެ ފަނޑިޔާރުންނަށް ޝަމީމް ވަނީ ޝުކުރު އަދާކުރައްވާފައެވެ. ޕީޖީ އޮފީހުގެ ނިޒާމު އޮތީ، މުޅި ރާއްޖޭގައިވެސް މިކަން ކުރެވޭ ވަރަށް ތައްޔާރަށްކަން ފާހަގަކުރައްވައި ޝަމީމް ވަނީ ރާއްޖޭގެ ހުރިހާ ކޯޓުތަކަށް މިގޮތަށް މައްސަލަ ހުށަހެޅޭގޮތް ވެއްޖެނަމަ ބޮޑު ބަދަލެއް ފެންނާނެކަމަށް ވިދާޅުވެފައެވެ. އެކަންކަން ވީހާވެސް އަވަހަކަށް ހަމަޖެހިގެން ދާނެކަމަށް އުއްމީދު ކުރައްވާކަމަށްވެސް ޝަމީމް ވިދާޅުވިއެވެ.
