ޝަރީއަތުގެ މަރުޙަލާ ފެށެންވާއިރަށް އާރަށު ޚިޔާނާތުގެ އަޑުއެހުންތައް ލައިވް ކުރެވޭނެކަމުގެ އިޝާރާތެއް

ޝަރީއަތުގެ މަރުޙަލާ ފެށެންވާއިރަށް ވ.އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނާއި ޔޫސުފް ނައީމްގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ލައިވް ކުރެވޭނެކަމުގެ އިޝާރާތެއް މައްސަލަ ބައްލަވާ ގާޒީ ދެއްވައިފިއެވެ.

ކްރިމިނަލް ކޯޓުގައި މި މައްސަލަ ބައްލަވަނީ އެ ކޯޓުގެ އިސްގާޒީ އަހުމަދު ޝަކީލެވެ.

މި މައްސަލައިގެ އަޑުއެހުންތައް ކްރިމިނަލް ކޯޓުގައި ކުރިއަށްދާއިރު، 13 ޖެނުއަރީ 2022 ގައި ބޭއްވިއަޑުއެހުމުގައި ޔާމީނުގެ ގާނޫނީ ވަކީލުންގެ ޓީމުން ވަނީ މިމައްސަލައިގެ އަޑުއެހުންތައް ލައިވްކޮށްގެން ކުރިއަށް ގެންދިޔުމަށް އެދިވަޑައިގެންފައެވެ.

އެހެންނަމަވެސް، އެކަމަށް ގޮތެއް ނިންމަވައި 27 ޖެނުއަރީގައި ބޭއްވި އަޑުއެހުމުގައި ގާޒީ ޝަކީލު ވަނީ, ޝަރީއަތް ލައިވް ނުކުރެވެނީ މިވަގުތު ކޯޓުގެ އިދާރީ އިންތިޒާމުތައް ހުރި ގޮތުން އެކަމުގައި ދަތިތަކެއް ހުރުމުންކަމަށް ވިދާޅުވެފައެވެ.

މި މައްސަލައިގައި 10 ފެބްރުއަރީގައި ބޭއްވި އަޑުއެހުމުގައިވެސް ދިފާއުން ވަނީ ކޯޓުގައި ވަސީލަތް ނެތްނަމަ، އަމިއްލަ ބަޔަކާއި ހަވާލުކޮށްގެންވެސް ލައިވްކޮށްދޭން އެދިފައެވެ.

އޭގެ އިތުރުން، 16 ފެބްރުއަރީ 2022 ގައި ބޭއްވި އަޑުއެހުމުގައި ރައީސް ޔާމީނުގެ ޤާނޫނީ ވަކީލުންގެ ޓީމުން ވަނީ އަޑުއެހުންތައް ލައިވް ކުރެވެންދެން ޝަރީއަތް ލަސްކޮށްދިނުމަށް އެދިފައެވެ. އެ ދުވަހު ގާޒީ ވަނީ އެކަމަށް ޙައްލެއް ހޯދުމަށް ކުރެވެން އޮތް މަސައްކަތެއް ކޮށްދެއްވާނެކަމަށް ވިދާޅުވެފައެވެ. މިހާރުވެސް ކޯޓުން އައިޓީ އޮފިސަރެއް ހޯދުމަށްޓަކައި ކުރަންޖެހޭ ކަންކަން ކުރަމުންދާކަން ގާޒީ އޭރު ފާހަގަކުރެއްވިއެވެ.

މި މައްސަލައިގައި ހޯމަ ދުވަހު ކުރިއަށް ދިޔަ އަޑުއެހުމުގައި ރައީސް ޔާމީނުގެ ޤާނޫނީ ވަކީލުންގެ ޓީމުން ޑރ މުޙައްމަދު ޖަމީލް އަހުމަދު ވަނީ އެ ނުކުތާ ނަންގަވާފައެވެ. އެކަމާއި ގުޅިގެން މައްސަލަ ބައްލަވާ ގާޒީ ވިދާޅުވީ، ޝަރީއަތްތައް ލައިވް ކުރުމަށް މަގުފަހި ކޮށްދެއްވުމަށް މަސައްކަތް ކުރައްވަމުން ގެންދަވާ ކަމަށެވެ.

އަދި މިހާރު ކުރިއަށްދަނީ އިބްތިދާއީ މަރުޙަލާ ނަމަވެސް، ޝަރީއަތުގެ މަރުޙަލާތައް ފެށެންވާއިރަށްވެސް، ޝަރީއަތް ލައިވް ކުރެވޭނެކަމަށް އުއްމީދު ކުރައްވާކަމަށް ވިދާޅުވިއެވެ.

މި މައްސަލައިގައި ހޯމަ ދުވަހު ބޭއްވި އަޑުއެހުމުގައި ދައުލަތުން ވަނީ ހެކި ހާމަކޮށްފައެވެ. ދެން މި މައްސަލައިގެ އަޑުއެހުމެއް އޮންނާނީ 31 މާރޗުގައެވެ. އެއީވެސް މައްސަލައިގެ އިބްތިދާއީ އަޑުއެހުމެކެވެ.