ޒިޔަތުއާއި ޝާހިދުގެ ޚިޔާނާތުގެ މައްސަލަ އަނެއްކާ ވެސް ކެންސަލް!

އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުއާއި، ކުރީގެ ނައިބު ރައީސް އަހުމަދު އަދީބުގެ ދެބެއިންގެ ދެދަރި ކޮއްކޮ ހުސެއިން ޝާހިދުގެ މައްޗަށް ޚިޔާނާތުގެ ކުށުގެ ދައުވާގައި ހިންގާ ޝަރީއަތުގެ އަޑުއެހުން އަނެއްކާ ވެސް ކެންސަލް ކޮށްފި އެވެ.

ޒިޔަތު އާއި ޝާހިދުގެ މައްޗަށް އުފުލާފައިވަނީ ޚިޔާނާތްތެރިވުމުގެ ކުށުގެ ދައުވާ އެވެ. އެ ދައުވާ ކޮށްފައިވަނީ 2014 ވަނަ އަހަރުގެ ތެރޭގައި އެމްއެމްޕީއާރްސީ އަށް ލިބުނު ފައިސާގެ ތެރެއިން އެއް މިލިއަން ޑޮލަރު (15 މިލިއަން ރުފިޔާ) އަށް ޚިޔާނާތްތެރިވި މައްސަލައިގަ އެވެ. ދައުވާގައިވާ ގޮތުން، ބީއެމްއެލްގައި ހުޅުވާފައިވާ އެކައުންޓަކުން، ޝާހިދުގެ އެކައުންޓަށް ޑޮލަރުތައް ވަނީ ޖަމާކޮށްފަ އެވެ.

އެ ދައުވާގެ ޝަރީއަތުގައި އާދިއްތަ ދުވަހުގު މެންދުރު 2:00 އަށް ތާވަލުކުރި އަޑުއެހުން ވަނީ ކެންސަލް ކޮށްފަ އެވެ. އެ އަޑުއެހުން ކެންސަލް ކުރި ސަބަބެއް ކްރިމިނަލް ކޯޓުން ހާމަކޮށްފައިނުވާއިރު، މީގެ ކުރިން ފެބްރުއަރީ 26 ވަނަ ދުވަހު ބާއްވަން ތާވަލުކުރި އަޑުއެހުން ވެސް ވަނީ ކެންސަލް ކޮށްފަ އެވެ. އެ އަޑުއެހުން ކެންސަލް ކޮށްފައިވަނީ ޒިޔަތު ހާޒިރުކޮށްދިނުމަށް ކްރިމިނަލް ކޯޓުން ފޮނުވި ޗިޓުގައި ނުބައި ތާރީޚެއް ލިޔެފައި އޮތުމުންނެވެ.

ޖެނުއަރީ 10 ވަނަ ދުވަހު ޒިޔަތުއާއި ޝާހިދުގެ މައްޗަށް ދައުވާކުރި އިރު، އެ ދައުވާގެ ޝަރީއަތުގެ ފުރަތަމަ އަޑުއެހުން ބާއްވާފައިވަނީ ޖެނުއަރީ 26 ވަނަ ދުވަހު އެވެ.

އެ އަޑުއެހުމުގައި ދައުވާ އިއްވުމުން ޒިޔަތުގެ ވަކީލު ވިދާޅުވީ ލިޔުންތައް ލިބުމުން ޖަވާބުދާރީވާނެ ކަމަށެވެ. ޝާހިދު ވަނީ ދައުވާ އަށް އިންކާރުކޮށް، ވަކީލެއް ހަމަޖެއްސުމަށް 15 ދުވަސް ދިނުމަށް އެދިފަ އެވެ.

ޅ. މާބިންހުރާ ކުއްޔަށް ދޫކޮށްގެން ދައުލަތަށް ލިބެންޖެހޭ ފައިސާ އަށް ޚިޔާނާތްތެރިވި މައްސަލައިގައި ޒިޔަތު މިހާރު ވެސް ހުންނެވީ 8 އަހަރުގެ ޖަލު ހުކުމެއްގަ އެވެ. ޚިޔާނާތުގެ މައްސަލައާ ގުޅިގެން ޝާހިދު ހުރީ ފުލުހުންގެ ބަންދުގަ އެވެ.

މި މައްސަލައިގައި ދެން އަޑުއެހުމެއް ބާއްވާނެ ދުވަހެއް ކްރިމިނަލް ކޯޓުން ހާމައެއް ނުކުރެ އެވެ.