ރަޝިޔާއިން ޔޫކްރެއިންއަށް އަރައި ކުރަމުންދާ ހަނގުރާމަ ނިމުމަކަށް ގެނައުމަށް ފަށާފައިވާ ސުލްހައިގެ މަޝްވަރާގެ ހަތަރުވަނަ ބައްދަލުވުން ހޯމަ ދުވަހު ބާއްވާ ގޮތަށް ނިންމައިފިއެވެ.
މަޝްވަރާގެ ހަތަރުވަނަ ބައްދަލުވުން ހޯމަ ދުވަހު ބާއްވާނެކަން ހާމަކޮށްފައިވަނީ ޔޫކްރެއިންގެ ރައީސްގެ އެޑްވައިޒަރު މައިޚައިލޯ ޕޮޑޮލިއަކްއެވެ.
މައިޚައިލޯ ކުރެއްވި ޓްވީޓެއްގައި ވިދާޅުވީ ސުލްހައިގެ މަޝްވަރާތައް އަލުން ފެށިފައިވާ ކަމަށާއި، ހޯމަ ދުވަހު ބާއްވާ މަޝްވަރާތައް ކުރިއަށްދާނީ ވީޑިއޯ ކޮންފަރެންސް މެދުވެރިކޮށް ކަމަށެވެ. ނަމަވެސް ބައްދަލުވުން އޮންނާނީ ދެގައުމުގެ ވެސް ކޮންތަނެއްގައި ކަމެއް އަދި ބައްދަލުވުމުގައި މިފަހަރު ބައިވެރިވާނީ ކޮން ބައެއް ކަމެއް ހާމަކޮށްފައި ނުވެއެވެ.
ހޯމަ ދުވަހުގެ މަޝްވަރާތަކުގައި ޕްރިލިމެނެރީ ނަތީޖާތަކާއި ގުޅޭ ގޮތުން މަޝްވަރާކުރުމަށް ވަނީ ނިންމާފައެވެ.
ޔޫކްރެއިން އަދި ރަޝިޔާއިން ވެސް މީގެ ކުރިން ބުނެފައިވަނީ މަޝްވަރާތަކުގައި ކުރިއެރުމެއް ލިބެމުން އަންނަ ކަމަށާއި، ކުރިއަށް އޮތް ދުވަސްތަކުގައި އޭގެ ނަތީޖާތައް ފެންނާނެ ކަމަށެވެ.
މަޝްވަރާތައް ފަށާފައިވީ ނަމަވެސް، ރަޝިޔާއިން ދެމުން އަންނަ ހަމަލާތައް މެދުކަނޑާލާފައި ނުވެއެވެ. މިހާތަނަށް ޔޫކްރެއިންގެ 7 ހޮސްޕިޓަލަކަށް ރަޝިޔާގެ އަސްކަރިއްޔާއިން ހަމަލާދީފައިވާ އިރު، އިތުރު ތަންތަނަށް ވެސް ހަމަލާދީފައިވާ ކަމަށް ޔޫކްރެއިނުން ވަނީ ބުނެފައެވެ.
