މައިލޯ އެކަޑަމީ ޗެމްޕިއަންޝިޕް 2022ގެ ދިހަ އަހަރުން ދަށުގެ މުބާރާތް ކާމިޔާބު ކަމާއެކު ނިންމާލައިފިއެވެ.

ނިންމުމުގެ ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދުއެވެ. ހޮނިހިރު ދުވަހުގެ ހަވީރު ހެންވޭރު ބޯޅަދަނޑުގައި ބޭއްވި މި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ވަނީ މައިލޯ އެކަޑަމީ ޗެމްޕިއަންޝިޕް 2022 ގެ ތިންވަނަ ހޮވި މެޗާއި ފައިނަލް މެޗުގެ ކުޅުން ބައްލަވާލައްވާފައެވެ.

މިއީ ތުއްތު ކުދިންގެ ފުޓްބޯޅަ މުބާރާތަކަށްވުމުން، މި މުބާރާތުގެ ފައިނަލް މެޗުގައި ހުރާ އަދި މާޒިޔާ ބައްދަލުކުރި މެޗު 1–1 ން އެއްވަރުވުމުން، މެޗު ނިންމާފައި ވަނީ ދެ ޓީމަށްވެސް ޗެމްޕިއަންކަން ދީގެންނެވެ. ދިހަ މިނެޓުގެ ދެ ހާފް ކުޅުނު މި މުބާރާތުގެ ތިންވަނަ ޓީމަކަށް ހޮވިފައިވަނީ އެމް.އެސް. މޭޓެވެ. މި މުބާރާތުގައި ކުޅުނު ހުރިހާ ޓީމެއްގެ އެންމެހާ ތުއްތު ކުޅުންތެރިންނަށް ގޯލްޑް މެޑަލް ދީފައިވެއެވެ.

މި ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން ވަނީ މައިލޯ އެކަޑަމީ ޗެމްޕިއަންޝިޕް 2022ގެ ޗެމްޕިއަންކަން ހޯދި ދެ ޓީމަށް ތަށްޓާއި މެޑަލް އަދި ފައިސާގެ އިނާމު ޙަވާލުކޮށްދެއްވާފައެވެ. މި މުބާރާތުގައި 19 ޓީމަކުން ވާދަކޮށްފައިވެއެވެ. މި މުބާރާތުގެ ނިންމުމުގެ ރަސްމިއްޔާތުގައި ބައިވެރިވުމަށް ދިވެހިރާއްޖޭގެ ފުޓްބޯޅައިގައި ފާހަގަކޮށްލެވޭ މަޝްހޫރު ގިނަ އަދަދެއްގެ ކުޅުންތެރިން ވަނީ ދަނޑަށް ހާޒިރުވެފައެވެ.