އަނބިމީހާ އާއި މާރާމާރީ ހިންގުމުގެ ކުށުގައި ހައްޔަރުކުރި ބިދޭސީ މީހާއަށް ދައުވާ އުފުލައިފި
13 މާރިޗު 2022 | އާދީއްތަ 07:18ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށް
ޕީޖީ އޮފީސް- ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާ ކުރުމަށް 10 މާރިޗު 2022 ގައި ޕީޖީ އޮފީހުން ވަނީ ހުށައަޅާފައި
މާލޭ ގެއެއްގައި ބިދޭސީ އަންހެނަކަށް ގެވެށި އަނިޔާކުރި މައްސަލައިގައި ހައްޔަރުކުރި ބިދޭސީ މީހާއަށް ދައުވާ އުފުލައިފިއެވެ.
މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށެވެ.
އެކަމާ ގުޅޭގޮތުން ޕްރޮސެކިއުޓަރ ޖެނެރަލް އޮފީހުން ބުނީ، 02 ފެބްރުވަރީ 2022 ދުވަހު، މާލޭ ގެއެއްގެ ތެރޭގައި، އޭނާގެ އަނބިމީހާއަށް ވަޅިން ހަމަލާދިން މައްސަލައިގައި ސްރިނިވަސަން ސުބްރަމަނިގެ މައްޗަށް، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާ ކުރުމަށް 10 މާރިޗު 2022 ގައި ކްރިމިނަލް ކޯޓަށް ހުށައަޅާފައިވާ ކަމަށެވެ.
ޕީޖީ އޮފީހުން މައުލޫމާތު ދޭ ގޮތުގައި އޭނާ މިހާރުވެސް ހުރީ ކްރިމިނަލް ކޯޓުގެ އަމުރެއްގެ ދަށުން ބަންދުގައެވެ. އެގޮތުން 10 މާރިޗު 2022 ދުވަހު ބޭއްވުނު ބަންދުގެ އަޑުއެހުމުގައި ދައުލަތުން އެދިފައިވަނީ އޭނާ ޝަރީޢަތް ނިމެންދެން ބަންދު ކޮށްދިނުމަށެވެ.
އެހެންނަމަވެސް، ކޯޓުން އޭނާގެ ބަންދަށް ވަނީ 10 ދުވަސް ޖަހާފައެވެ. އަދި އޭގެ ފަހުން އޭނާ ޝަރީޢަތް ނިމެންދެން ބަންދު ކުރުމާމެދު މައްސަލަ ބައްލަވާ ޤާޟީ ގޮތެއް ނިންމަވާނެކަންވެސް ޕީޖީ އޮފީހުން ފާހަގަ ކޮށްފައިވެއެވެ.
އޭނާ ހައްޔަރު ކުރިއިރު ފުލުހުން ބުނެފައިވަނީ، ތޫނު އެއްޗަކުން ހަމަލާ ދިނުމުގެ ސަބަބުން ދެމީހުން ވެސް ޒަޚަމްވެފައިވާއިރު، އަންހެން މީހާއަށް ބޮޑެތި ޒަޚަމްތަކެއް ލިބިފައިވާ ކަމަށެވެ.
މިހާދިސާގެ ރިޕޯޓު ފުލުހުންނަށް ލިބިފައިވަނީ އެ ދުވަހުގެ ހެނދުނު 06:20 ހާއިރެވެ. މި ހާދިސާއާއި ގުޅޭ ވީޑިއޯއެއް ސޯޝަލް މީޑިއާގައި ދައުރުވެފައިވެއެވެ.
ވީޑިއޯއިން ފެންނަނީ ގެއެއްގެ ސިޑިމަތިން ފުލުހުންގެ އެހީތެރިކަމާއެކު އެ އަންހެންމީހާ ފައިބައިގެންދާ މަންޒަރެވެ. އޭނާ ލައިގެން ހުރި ހެދުމުގެ ފަސްބައިގައި ވަރަށް ގިނަ ލޭ ހުއްޓެވެ. އަންހެން މީހާގެ ޅިނދުކަށިގަނޑު ކައިރިއަށް ތޫނު އެއްޗަކުން ހަމަލާދީފައިވާއިރު، ވަރަށް ބޮޑަށް ޒަޚަމްވެފައިވެފައިވެއެވެ. އަދި ފިރިހެން މީހާގެ ބަނޑަށް ވެސް ތޫނު އެއްޗަކުން ހަމަލާދީފައިވާ ކަމަށާއި ނަމަވެސް އޭނާއަށް މާބޮޑު އަނިޔާއެއް ލިބިފައިނުވާކަމަށް މައުލޫތުލިބެއެވެ.
