އެމްއޭސީއެލްގެ މުވައްޒަފުންނަށް އޭޕްރިލް މަހު ފްލެޓް ދޫކުރަނީ
ފްލެޓުތަކުގެ 99 އިންސައްތަ މަސައްކަތް ވަނީ ނިމިފައި
އެމްއޭސީއެލްގެ ފްލެޓެއް
މޯލްޑިވްސް އެއަރޕޯޓްސް ކޮމްޕެނީ ލިމިޓަޑް (އެމްއޭސީއެލް)ގެ މުވައްޒަފުންނަށް އޭޕްރިލް މަހު ފްލެޓް ދޫކުރުމުގެ މަސައްކަތް ކުރަމުންދާ ކަމަށް އެ ކުންފުނިން ބުނެފިއެވެ.
އެމްއޭސީއެލުން ބުނީ އިމާރާތްކުރަންފެށި ދެ ޓަވަރުގެ މަސައްކަތް މިހާރު ނިމެން ކައިރި ވެފައިވާ ކަމަށެވެ. އެ ފްލެޓުތަކުގެ 99 އިންސައްތަ މަސައްކަތް ނިމިފައިވާ ކަމަށާއި އަންނަ މަހުގެ ތެރޭގައި ތަޅުދަނޑިތައް ހަވާލުކުރެވޭނެ ކަމަށް ލަފާކުރެވޭ ކަމަށެވެ. އަދި މިހާރު ކުރިއަށް ގެންދަނީ ފްލެޓްތަކުގެ ފިނިޝިންގއާއި, ފްލެޓް ލިބުނު މުވައްޒަފުންނާ އެ ތަންތަން ހަވާލު ކުރުމުގެ ކުރިން ކުރަންޖެހޭ އެންމެ ފަހުގެ މަސައްކަތްތައް ކަމަށް ވެސް އެމްއޭސީއެލުން ބުންޏެވެ.
އެ ޕްރޮޖެކްޓުގެ ދަށުން ދެ ޓަވަރުގައި 384 އެޕާޓްމަންޓް ވަނީ ހަދައިފަ އެވެ. އެއީ ދެ ކޮޓަރީގެ 240 އެޕާޓްމަންޓާއި އެއް ކޮޓަރީގެ 72 އެޕާޓްމަންޓެވެ. ހުރިހާ އެޕާޓްމަންޓެއް ވެސް ހަދަނީ އެންމެ ޒަމާނީ ފެންވަރަށް ކަމަށް އެމްއޭސީއެލުން ބުންޏެވެ. އެ ކުންފުނިން މިހާރު އަންނަނީ އެޕާޓްމަންޓް ލިބުނު މީހުންނަށް އެ ތަން ދެއްކުމާއި, ކަމާ ގުޅޭ މައުލޫމާތު ދިނުމުގެ ބައްދަލުވުންތައް ބާއްވަމުންނެވެ.
އެމްއޭސީއެލުން ބުނީ އެޕާޓްމަންޓްތައް ހަވާލުކުރުމުގެ މަސައްކަތްކުރިނަމަވެސް ކަރަންޓާއި ފެނުގެ ޚިދުމަތް ފޯރުކޮށްދިނުމުގައި ލަސްތަކެއް ދިމާވާ ކަމަށާއި, އެކަންތައްތައް އަވަސް ކުރުމުގެ މަސައްކަތް ކުރަމުންދާކަމަށެވެ.
އެމްއޭސީއެލުން އިމާރާތް ކޮށްފައިވަނީ 14 ބުރީގެ ދެ ޓަވަރެވެ. އެ ފްލެޓްތަކުގެ މަސައްކަތް އެމްއޭސީއެލުން ހަވާލުކުރީ ޗައިނާގެ ބީޔޫސީޖީ ކުންފުންޏާއެވެ.
