އޮޅުވާލައިގެން ބޮޑެތި އަދަދުތަކުން ފައިސާ ހޯދަނީ، ސްކީމްތަކުގައި ބައިވެރިނުވޭ
އެ ސްކީމް ހިންގަމުންދަނީ ފޭސްބުކާއި ޓެލެގްރާމް މެދުވެރިކޮށް
އޮންލައިން ކޮން ފައިސާ ބަދަލުކުރެވޭ މުއާމަލާތްތަކުގައި އިތުރަށް ސަމާލުވުމަށް ކަމާބެހޭ ފަރާތްތަކުން އިލްތިމާސްކުރޭ
ކުޑަ ދުވަސްކޮޅެއްގެ ތެރޭގައި ބޮޑު ފައިދާއެއް ދޭނެ ކަމަށް ބުނެ އާންމުންގެ އަތުން ފައިސާ ހޯދުމަށް ސޯޝަލް މީޑިއާ މެދުވެރިކޮށް ހިންގާ ސްކީމްތަކުގައި ބައިވެރިނުވުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެދިއްޖެއެވެ.
އެމްއެމްއޭއިން ބުނީ ކުޑަ ދުވަސްކޮޅެއްގެ ތެރޭގައި ބޮޑު ފައިދާއެއް ދޭނެ ކަމަށް ބުނެ އާންމުންގެ އަތުން ފައިސާ ހޯދުމަށް، ފޭސްބުކާއި ޓެލެގްރާމް ފަދަ ސޯޝަލް މީޑިއާ ޕްލެޓްފޯމްތައް މެދުވެރިކޮށް ހިންގާ ސްކީމްއެއްގެ މައުލޫމާތު އެ އޮތޯރިޓީއަށް ލިބިފައިވާ ކަމަށެވެ.
މިފަދަ ސްކީމްތައް ހިންގާ ފަރާތްތަކުން އާންމުންގެ ކިބައިން ނަގާ ފައިސާއިން އެ ފަރާތްތަކަށް އިންވެސްޓްކޮށް ދިނުމުގެ ބަދަލުގައި، އެ ފައިސާ ބޭނުން ކުރަނީ އަމިއްލަ ބޭނުމަށެވެ. އަދި ކުރީކޮޅުގައި ބައިވެރިވާ ފަރާތްތަކަށް ފައިސާ ދެނީ އޭގެ ފަހުން ބައިވެރިވާ ފަރާތްތަކުގެ ފައިސާއިންނެވެ.
އެހެންކަމުން މިފަދަ ސްކީމްތަކަކީ ދެމެހެއްޓޭނެ ސްކީމްތަކެއް ނޫނެވެ. އަދި ސްކީމް ރޫޅިގެންދާ ހިސާބުން، އެ ސްކީމްގައި ބައިވެރިވެ، ފައިސާ ދިން ގިނަ ފަރާތްތަކަށް އެފަރާތްތަކުން ދިން ފައިސާ ވެސް ނުލިބި، ބޮޑެތި މާލީ ގެއްލުންތަކާ ކުރިމަތިލާން ޖެހެއެވެ. އަދި ސްކީމްއަށް ދޭ ފައިސާ އަކީ ސްކީމް ހިންގާ ފަރާތުން އަނބުރާ ނުދީފި ނަމަ، ފައިސާ ޖަމާވާ ބޭންކަށް ވެސް އަނބުރާ ދެވޭނެ އެއްޗެއް ނޫނެއެވެ.
އެހެންކަމުން މިފަދަ ސްކީމްތަކާ މެދު ސަމާލުވުމަށާއި، އޭގައި ބައިވެރި ނުވުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވަނީ އިލްތިމާސްކޮށްފައެވެ.
ރާއްޖެއެމްވީއަށް އިތުބާރުހުރި ފަރާތަކުން މައުލޫމާތު ދިން ގޮތުގައި އެ ސްކީމް ހިންގަމުންދަނީ މީގެ ކުރިން ސިޔާސީ މައިދާނުގައި މަސައްކަތް ކުރި ބައެއް މީހުން އަޑީގައި ތިބިގެންނެވެ. ޓެލެގްރާމްގައި ޚާއްސަ ގުރޫޕެއް ހަދައި ބައެއް މީހުންގެ އަތުން ފައިސާ ހޯދާފައިވާ ކަމަށް ބުނެފައިވެއެވެ. މި މަސައްކަތް ކުރަމުންދަނީ ވަރަށް ބޮޑަށް ފައިސާ ލިބޭނެ ކަމުގެ ޔަގީންކަން ދިނުމަށްފަހުއެވެ. ބައެއް ސްކީމްތައް ޕްރޮމޯޓް ކުރުމަށް އިޝްތިހާ ޕޯސްޓުތައް ދައުރުކުރަމުން ދެއެވެ. އެގޮތުން ދައުރުވަމުންދާ އެއް ޕޯސްޓުގައި ބުނެފައިވަނީ އެއްލައްކަ ރުފިޔާ އިންވެސްޓްކޮށްފިނަމަ ދެލައްކަފަންސާސްހާސް ރުފިޔާ ލިބޭނެ ކަމަށެވެ. އަދި ކޮންމެ މަހަކު 20،833.34 ރުފިޔާ ލިބޭނެ ކަމަށެވެ. އަދި ފުރަތަމަ އެއްލައްކަ ރުފިޔާ އިންވެސްޓްކުރި މީހުންނަށް ކޮންމެ މަހެއްގައި ލިބޭ ރުފިޔާ ބީއެމްއެލް އެކައުންޓަކުން ޓްރާންސްފަރ ކޮށްފައިވާ ކަމަށެވެ. އެގޮތަށް ރުފިޔާ ފޮނުވައި ބައެއް މީހުންގެ އިތުބާރު ހޯދާފައިވާ ކަމަށާއި، އެމީހުން މެދުވެރިކޮށް ސްކީމަށް އިތުރު މީހުން ވައްދާފައިވާ ކަމަށެވެ. ނަމަވެސް ދޭން ބުނެފައިވާ އަދަދަށް ފައިސާ ދީފައިނުވާ ކަމަށް އެ ފަރާތުން ބުނެފައި ވެއެވެ. އަދި ސްކީމްގައި ބައިވެރިވުމުގެ ފުރުސަތު 15 ފެބްރުއަރީ 2022ން 31 މާޗް 2022ގެ ނިޔަލަށް ހުޅުވާލާފައިވާއިރު، ބައެއް ވިޔަފާރިވެރިން ވެސް މި ސްކީމްގެ ދަށުން އިންވެސްޓް ކޮށްފައިވާ ކަމަށް މައުލޫމާތު ލިބެއެވެ.
ފަހަކަށް އައިސް ސޯޝަލް މީޑިއާ މެދުވެރިކޮށް މިފަދަ ސްކީމްތައް ހިންގާ މީހުންގެ އެކައުންޓްތަކުން ވަރަށް ގިނަ ރިކުއެސްޓްތައް އާދެއެވެ. ޓްރޭޑް ކުރުމާއި ގުޅޭ މައުލޫމާތުތައް ފޯރުކޮށްދީ، އެކަމަށް ޝައުގުވެރިކުރުވުމަށް ގިނަ މަސައްކަތްތައް ކުރެއެވެ.
މިފަދަ ސްކީމްތަކަށް ސަމާލުވުމަށް އެމްއެމްއޭއިން އިލްތިމާސްކޮށްފައިވާއިރު، ބުދަ ދުވަހު މޯލްޑިވްސް ޕޮލިސް ސަރވިސްއިން ވަނީ އައިބޭ މެދުވެރިކޮށް ނުވަތަ އެހެނިހެން ޕްލެޓްފޯމްތައް މެދުވެރިކޮށް އޮންލައިން ވިޔަފާރިކުރާ ފަރާތްތަކަށް އަމާޒުކޮށް މަކަރާއި ހީލަތުން މުދާ ނުވަތަ މޯބައިލް ފޯނު ފަދަ އިލެކްޓްރޯނިކް ޑިވައިސްތައް ހޯދަމުންދާ ގިނަ މައްސަލަތައް ހުށަހެޅެމުންދާ ކަމަށް ބުނެފައެވެ. އަދި އެގޮތަށް ގުޅާ މަކަރާއި ހީލަތުގެ ކޯލުތަކުގައި، މުދާ ގަތުމަށްފަހު މޯލްޑިވްސް އިސްލާމިކް ބެންކު މެދުވެރިކޮށް ފައިސާ ދައްކާފައިވާކަމަށް ބުނެ ސައްހަނޫން ސްލިޕެއް ފޮނުވައެވެ. އެ ފައިސާ, ތަކެތި ވިއްކާ ފަރާތުގެ އެކައުންޓަށް ޖަމާނުވާކަން އެނގެނީ މުދާ ޑެލިވަރީކުރާތާ 24 ގަޑިއިރު ފަހުން ކަމަށް ފުލުހުން ބުނެއެވެ.
އެހެންކަމުން އޮންލައިން ވިޔަފާރިކޮށް ފައިސާދެއްކިކަމުގެ ބޭންކް ސްލިޕް، މުދާ ގަންނަ ފަރާތުން ފޮނުވި ކަމުގައި ވިޔަސް ފައިސާ ލިބުމުން ނޫނީ މުދާ ޑެލިވަރީ ނުކުރުމަށް ފުލުހުން ވަނީ އިލްތިމާސްކޮށްފައެވެ.
