47 ނޫސް މަޖައްލާއެއް އުވާލައިފި
އުވާލާފައިވަނީ، 2019 ޑިސެންބަރު 31ގެ ނިޔަލަށް ގަވާއިދުން ޝާއިއު ނުކުރާ ނޫސް މަޖައްލާތައް
ހޯމް މިނިސްޓަރު އިމްރާން އަބްދުﷲ
ގަވާއިދުން ނެރެމުން ނުގެންދާ ގިނައަދަދެއްގެ ނޫސް މަޖައްލާތައް އުވާލާފައިވާ ކަމަށް ހޯމް މިނިސްޓްރީން ބުނެފިއެވެ.
އުވާލަން ނިންމި ނޫސް މަޖައްލާތަކުގެ ލިސްޓް ބުރާސްފަތި ދުވަހު ހޯމް މިނިސްޓްރީން ވަނީ, އާއްމުކޮށްފައެވެ. ލިސްޓުގައި 47 ނޫސް މަޖައްލާއެއް ހިމެނެއެވެ.
ހޯމް މިނިސްޓްރީން ބުނީ ނޫސް މަޖައްލާ ފަދަ ތަކެތީގެ ގާނޫނުގެ ދަށުން, 2019 ޑިސެންބަރު 31ގެ ނިޔަލަށް އެމިނިސްޓްރީގައި ރަޖިސްޓްރީކޮށްފައިވާ ނޫސް, މަޖައްލާ އަދި އޮންލައިން ނޫސްތަކުގެ ތެރެއިން ގަވާއިދުން ޝާއިއުނުކުރާ ނޫސް، މަޖައްލާ އަދި އޮންލައިން ނޫސްތައް އުވާލާފައިވާކަމަށެވެ.
47 ނޫސް މަޖައްލާއެއް އުވާލާފައިވާއިރު، 22 ޖެނުއަރީ 2022ގައި 52 ނޫސް މަޖައްލާއެއް އުވާލަން ނިންމައި, އެކަން އަންގާފައިވެއެވެ. އެފަހަރު މިނިސްޓްރީން ބުނެފައިވަނީ ނޫސްމަޖައްލާ ފަދަ ތަކެތި ޝާއިއުކުރުމާބެހޭ ގަވާއިދުގެ 29 ވަނަ މާއްދާގައިވާ ގޮތަށް ނޫސް، މަޖައްލާ، އަދި އޮންލައިން ނޫސްތައް ގަވާއިދުން ނުނެރޭނަމަ, 28 ފެބްރުއަރީ 2022ން ފެށިގެން ނޫސްމަޖައްލާގެ ދަފްތަރުން އުނިކުރާނެކަމަށެވެ.
