ރަޝިޔާއިން ޔުކްރެއިންއަށް އަރާ ދެމުންދާ ހަމަލާތަކުގެ ނޭދެވޭ އަސަރު ޔޫރަޕްގެ ޗެމްޕިއަން ޗެލްސީއަށް ވަރަށް ބޮޑަށް ކޮށްފިއެވެ. ޗެލްސީއަށް އެކަމުގެ ނޭދެވޭ އަސަރު ކުރަނީ އިނގިރޭސި ސަރުކާރުން އަޅަމުންދާ ފިޔަވަޅުތަކުގެ ސަބަބުންނެވެ. މިއަދު އިނގިރޭސި ސަރުކާރުން އެޅި ފިޔަވަޅަކީ ރަޝިޔާއާ ގުޅުންއޮންނަ ވިޔަފާރިތަކަށް ދަތިކުރުމެވެ. މިފިޔަވަޅާއެކު އަބްރަމޮވިޗް އިގިރޭސި ވިލާތުގައި ކުރަމުން އަންނަ ވިޔަފާތައްވެސް ފްރިޒްކުރަން ވަނީ ނިންމާފައެވެ.
އަބްރަމޮވިޗްގެ އިތުރުން ބައެއް އެހެން ވިޔަފާރިވެރިންނަށްވެސް އިނގިރޭސި ސަރުކާރުގެ މިނިންމުމުގެ ސަބަބުން ފިޔަވަޅުތައް އަޅާނެއެވެ. މިފިޔަވަޅުތަކާއެކު އަބްރަމޮވިޗް ޗެލްސީ ވިއްކާލަން ކުރަމުން އަންނަ މަސައްކަތް ހުއްޓޭނެއެވެ. އޭނާ ކްލަބް ވިއްކާލާނެކަން އިއުލާންކުރީވެސް ރަޝިޔާއާއި, ޔުކްރެއިންއާ ދެމެދު ހިނގަމުންދާ ކަންތައްތަކުގެ އަސަރު އަބްރަމޮވިޗްއަށް ކުރަން ފެށުމުންނެވެ. އޭގެ ސަބަބުން އޭނާއަށް ފިއްތުންތަކާއި, ދަތިރުކުމުގެ ފިޔަވަޅުތައް އަމާޒުވާން ފެށުމުންނެވެ.
އިނގިރޭސި ސަރުކާރުގެ ނިންމުމާ ގުޅިގެން ޗެލްސީ ބޭނުންކޮށްގެން މާލީ މަންފާ ހޯދުމުގެ ދޮރު އަބްރަމޮވިޗްއަށް ވަނީ ބަންދުވެފައެވެ. އެހެންކަމުން ޗެލްސީ ވިއްކާލުމުގެ މަޝްވަރާތައްވެސް ހުއްޓާލަން ޖެހޭނެއެވެ. އަދި ޗެލްސީގެ މެޗުތަކަށް ޓިކެޓް ވިއްކުމާއި, ކުޅުންތެރިންގެ ކޮންޓްރެކްޓް އާކުރުމަށްވެސް މީގެ ސަބަބުން އަސަރުކޮށް އެކަންކަން ހުއްޓުމަކަށް އަންނާނެއެވެ.
އިނގިރޭސި ބޮޑުވަޒީރު ބޮރިސް ޖޯންޝަން ވިދާޅުވީ ޔުކްރެއިން ހަނގުރާމައަށް ތާއީދުކުކޮށް, މަދަދުދޭ ފަރާތްތަކަށް އެޤައުމުގައި ހިމާޔަތެއް ނެތްކަމަށެވެ. މިއީ އިނގިރޭސި ސަރުކާރުން ޔުކްރެއިންއަށް ތާއީދުކޮށް އެންމެ ފަހުން އެޅި ފިޔަވަޅެވެ. އަބްރަމޮވިޗަކީ ރަޝިޔާގެ ރައީސް ޕުޓިންގެ އަރިސް ބޭފުޅެކެވެ.
