ހޯމަ ދުވަހު ރާއްޖެ އައި ފަތުރުވެރިންގެ އަދަދު ބޮޑުތަނުން ދަށްވެފައިވާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.

ރާއްޖެ އަންނަ ފަތުރުވެރިންގެ އެންމެ ބޮޑު ހިއްސާއެއް ކުރަނީ ރަޝިޔާ މާކެޓުންނެވެ. އެހެންނަމަވެސް ރަޝިޔާއާއި ޔޫކްރެއިނާ ދެމެދު މިހާރު ކުރިއަށްދާ ހަނގުރާމައިގެ ސަބަބުން ރަޝިޔާއާ ދެމެދު ގައުމުތަކުން އަޅަމުންދާ ދަތިކުރުމުގެ ފިޔަވަޅުތަކުގެ ސަބަބުން ރަޝިޔާއިން ވަނީ ބައިނަލްއަގުވާމީ ދަތުރުތައް ކުރުން ހުއްޓާލާފައެވެ. މީގެ ތެރޭގައި ގިނަ އަދަދެއްގެ ފަތުރުވެރިންނާއެކު ރާއްޖެއަށް ދަތުރުކުރަމުން އައި އެއިރޯފްލޮޓް ހިމެނެއެވެ.

ރާއްޖެޓީވީގެ ފަށާއިރު ޕްރޮގްރާމަށް ދެއްވާފައިވާ އިންޓަރވިއުއެއްގައި ހޯމަ ދުވަހު ރާއްޖެ އައި ފަތުރުވެރިންގެ އަދަދުތައް ވަރަށް ބޮޑުތަނުން ދަށްވެފައިވާކަމަށް އެމްއޭސީއެލްގެ ޓަރމިނަލް އޮޕަރޭޝަން ޖެނެރަލް މެނޭޖަރު އިބްރާހިމް ހުސައިން ވަނީ ވިދާޅުވެފައެވެ. އިބްރާހިމް ވިދާޅުވީ ހޯމަ ދުވަހު ރާއްޖެ އައިސްފައިވަނީ 3،939 ފަތުރުވެރިން ކަމަށެވެ. ހޯމަ ދުވަހު ރާއްޖެ އައިސްފައިވަނީ ބައިނަލްއަގުވާމީ 70 އުޅަނދެއް ކަމަށްވެސް އޭނާ ވިދާޅުވިއެވެ.

އިބްރާހިމް ވިދާޅުވީ މިއަހަރުގެ ޖެނުއަރީން ފެށިގެން އާންމުގޮތެއްގައި ދުވާލަކު 5،000 ފަތުރުވެރިން ރާއްޖެ އައިސްފައިވާކަމަށެވެ. ރާއްޖެ އެތެރެވާ ފަތުރުވެރިންގެ އަދަދު 3،000 އަށް ވެއްޓިފައިވަނީ މަދު ދުވަހެއްގައި ކަމަށް އިބްރާހިމް ވިދާޅުވިއެވެ.

އިބްރާހިމް ވިދާޅުވީ ހޯމަ ދުވަހު އޮޕަރޭޓްކޮށްފައިވާ ޖެޓުތައްވެސް ވަރަށް ބޮޑަށް މަދުވެފައިވާކަމަށެވެ. ހޯމަ ދުވަހު އޮޕަރޭޓްކޮށްފައިވަނީ އެންމެ ދެ ޖެޓު ކަމަށާއި، އެއީ މާފަރުން އެއް ޖެޓު އަދި ސްޕެއިނުން އެއް ޖެޓު ކަމަށް އޭނާ ވިދާޅުވިއެވެ. އިބްރާހިމް ވިދާޅުވީ މީގެ ކުރިން ވަރޭޖްކޮށް 12 އާއި 15 އާއި ދެމެދުގެ އަދަދަކަށް ޖެޓުތައް އޮޕަރޭޓުކޮށްފައިވާކަމަށެވެ. މީގެ ތެރޭގައި ގިނައިން ހިމެނޭނީ ދުބާއީއާއި ރަޝިއާއިން ޖެޓުތައް ކަމަށާއި، މިހާރު ރަޝިޔާއިން ޖެޓުތައް އައުން އެއްކޮށް ހުއްޓިފައިވާއިރު، ދުބާއީއިންވެސް އެއްވެސް ޖެޓެއް އައިސްފައިނުވާކަމަށް އިބްރާހިމް ވިދާޅުވިއެވެ.

މިއަހަރުގެ މިހާތަނަށް 321،304 ފަތުރުވެރިން ރާއްޖެ އައިސްފައިވާއިރު މީގެ 15 އިންސައްތަ ހިއްސާކުރަނީ ރަޝިޔާގެ ފަތުރުވެރިންނެވެ. އެހެންނަމަވެސް ރަޝިޔާއިން ކުރާ ދަތުރުތައް ހުއްޓާލުމާއި ގުޅިގެން ކުރިއަށްއޮތްތަނުގައި ރާއްޖެ އަންނަ ފަތުރުވެރިންގެ އަދަދު ދަށްވެގެންދާނެ ކަމަށް ގިނަ ބަޔަކު ގަބޫލުކުރެއެވެ.