މާޒިޔާއަށް އުނދަގޫ މޮޅެއް، އެއްވަނާގައި ލީޑެއް!

މިސީޒަންގެ ދިވެހި ޕްރިމިއަރ ލީގުގައި މާޒިޔާ ކޮޅަށް ވަން ފުރަތަމަ ގޯލާއެކު, އުނދަގޫ މޮޅަކުން އެއްވަނާގައި ތިން ޕޮއިންޓްގެ ލީޑެއް ނަގައިފިއެވެ. މާޒިޔާގެ ފަސްވަނަ މެޗުގައި މިއަދު ޔުނައިޓެޑް ވިކްޓްރީ އަތުން މޮޅުވާން މާޒިޔާއަށް އުނދަގޫތަކެއް ކުރިމަތިވިއެވެ.

މެޗުގައި ފުރަތަމަ ލަނޑު ޖަހާ ކުރިހޯދީ ބިދޭސީ ހަތަރު ކުޅުންތެރިންނާއެކު އެވްރެޖް ސްކޮޑެއް އޮތް ޔުނައިޓެޑް ވިކްޓްރީންނެވެ. 16 ވަނަ މިނިޓްގައި ޔޫވީގެ އެނަޓޯލީ ވްލާސިޗޭވް ޖެހި ލަނޑަކީ ލީގުގައި މާޒިޔާ ކޮޅަށް ވަން ފުރަތަމަ ލަނޑެވެ. ފުރަތަމަ ހަތަރު މެޗުން މާޒިޔާ ކޮޅަށް ގޯލެއް ނުވަދެއެވެ. ވަރުގަދަ ބޮޑު ސްކޮޑެއް އޮތް ޗެމްޕިއަން މާޒިޔާއަށް ނަތީޖާ ހަމަހަމަކުރެވުނީ ފުރަތަމަ ހާފް ނިމެން ތިން މިނިޓަށް ވެފައިވަނިކޮށެވެ. ނަތީޖާ ހަމަހަމަކޮށްދިނީ ކާޓާލްއެވެ. އަދި މާޒިޔާގެ މޮޅުވުމުގެ ސިލްސިލާ ދަމަހައްޓައިދިނީ 70 ވަނަ މިނިޓްގައި ޓަނާ ޖެހި ލަނޑުންނެވެ.

މިމޮޅާއެކު މާޒިޔާ ވަނީ ފަސް މެޗުންވެސް މޮޅުވެ, 15 ޕޮއިންޓް ހޯދާފައެވެ. ދެވަނާގައި އޮތީ 12 ޕޮއިންޓާއެކު ވެލެންސިޔާއެވެ. ޔޫވީ އޮތީ ފަސް މެޗުން 7 ޕޮއިންޓާއެކުއެވެ. މިހަފްތާގެ ފަހު މެޗުގައި މިރޭ ވާދަކުރާނީ އީގަލްސްއާއި ދަ ގްރާންޑޭއެވެ.