ރާއްޖޭގައި މިހާތަނަށް ބޭއްވުމަށް ހަމަޖެހިފައިވާ އެންމެ ބޮޑު ކުޅިވަރު އެވޯޑުގައި އަވަށްޓެރި ސްރީލަންކާ އަދި ބަންގްލަދޭޝްގެ ކުޅިވަރާއި ބެހޭ ވަޒީރުން ބައިވެރިވާނެކަމަށް ރާއްޖޭގެ ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.
މިނިސްޓަރ މަހްލޫފް ބުދަ ދުވަހު ކުރެއްވި ޓްވީޓެއްގައި ވަނީ ސްރީލަންކާގެ ސްޕޯޓްސް މިނިސްޓަރ ރާޖަޕަކްސާ ނަމާލް އަދި ބަންގްލަދޭޝްގެ ސްޕޯޓްސް މިނިސްޓަރ ޒާހިދް އަހްސަން ރުސޭލް ބައިވެރިވާނެކަން އިއުލާނު ކުރައްވާފައެވެ. ރާއްޖެއަށް މުޅިން އަލަށް ތައާރަފްކުރާ މޯލްޑިވްސް ސްޕޯޓްސް އެވޯޑްސްއަކީ ދުނިޔޭގެ ސަމާލުކަން ލިބޭފަދަ އިވެންޓަކަށް ހެދުމަށް މިނިސްޓަރ މަހްލޫފް އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.
މި ދެ މިނިސްޓަރުންގެ އިތުރުން މި އިވެންޓުގައި ބައިވެރިވުމަށް ރާއްޖެ އަންނާނެކަން މިހާރު ޔަގީންވެފައިވަނީ އަލްބިން އާއި، ވީލްޗެއަރ ޓެނިސް ކުޅުންތެރިޔާ ލޫސީ ޝޫކާ އާއި، ބްރެޒިލްގެ ފުޓްބޯޅަ ލެޖެންޑު ރޮބާޓޯ ކާލޯސްގެ އިތުރުން ބްރެޒިލްގެ ކުރީގެ ވޮލީ ކެޕްޓަން ޖިލްބާޓޯ ގޮޑޯއީ އާއި، ވީލްޗެއަރ ޓެނިސް ކުޅުންތެރިޔާ ގޯޑަން ރެއިޑް އާއި، ފެތުމުގައި ފާހަގަ ކުރެވޭ އޮލިމްޕިކް ގޯލްޑް މެޑަލިސްޓް ސާރާ އަދި ފުޓްބޯޅަ ލެޖެންޑް މިޝެލް ސަލްގާޑޯއެވެ.
ރާއްޖޭގެ ކުޅިވަރުތައް ކުރިއެރުވުމުގެ އިތުރުން މި ހަފްލާގެ ސަބަބުން މި ފަރާތްތަކުގެ ސޯޝަލް މީޑިއާ މެދުވެރިކޮށް ރާއްޖެ އިޝްތިހާރތު ކުރެވިގެންދާނެކަމަށް މިނިސްޓަރ ވިދާޅުވިއެވެ. މިއީ އޭގެ ފައިދާ ރާއްޖޭގެ ފަތުރުވެރިކަމަށް ވަރަށް ބޮދަށް ކުރާނެ ކަމެކެވެ.
