ރާއްޖޭގެ ކުޅިވަރުގެ ދާއިރާގައި މަސައްކަތްކުރާ ފަރާތްތަކުގެ އަގުވަޒަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް 2022 ދިގު މުއްދަތަކަށް ދިގުދެމިގެން ދާނެކަމަށް އުންމީދުކުރާކަމަށް ރާއްޖޭގެ ޤައުމީ ފުޓްބޯޅަ ޓީމުގެ ކެޕްޓަން އަކްރަމް އަބްދުލްޣަނީ ބުނެފިއެވެ.
ސްޕޯޓްސް އެވޯޑްސްއާއި ގުޅޭގޮތުން ރާއްޖެޓީވީއަށް އަކްރަމް ދިން އިންޓަވިއުއެއްގައި އޭނާ ބުނީ ކޮންމެ މަސައްކަތެއްގައިވެސް އެމީހަކު ކުރާ މަސައްކަތެއް ބަލައިގަތުމަކީ އެމީހަކު އެކަމެއްގައި ކުރިއަރާ ދިއުމަށް ލިބޭނެ އިތުރު ހިތްވަރަކަށް ވާނެ ކަމަށެވެ. އަދި މިކަހަލަ ބޮޑު އެވޯޑެއް ރާއްޖެއަށް ތައާރަފްކުރުމުގެ ސަބަބުން ކުރިއަށް އޮތް ތަނުގައި މި އެވޯޑު ހޯދުމަށް މަސައްކަތްކުރާ ފަރާތްތަކަށް އިތުރު ހިތްވަރެއް ލިބިގެންދާނެ ކަންވެސް އަކްރަމް ފާހަގަކުރިއެވެ.
މީގެ ކުރިން ހާވިރުންނާއި އެފްއޭއެމްއިން ވެސް ކުޅިވަރު އެވޯޑުތަކެއް ދިންކަން ފާހަގަކޮށް އަކްރަމް ބުނީ މިހާރު އެކަންވެސް ވަނީ ހުއްޓިފައިކަމަށެވެ. އެހެންކަމުން އުންމީދަކީ މި އެވޯޑު ދިގުމުއްދަތަކަށް ދެމިގެން ދިޔުންކަމަށެވެ. އަދި މިއެވޯޑާއެކު ކުޅިވަރުގެ ދާއިރާގައި މަސައްކަތްކުރާ ފަރާތަކަށް އިތުރު ހިތްވަރެއް ލިބިގެންދާނެކަމަށް އުންމީދުކުރާކަމަށް އަކްރަމް ބުންޏެވެ.
މޯލްޑިވްސް ސްޕޯޓްސް އެވޯޑްސް އޮންނާނީ މިއަންނަ ބުރާސްފަތި ދުވަހުގެ ރޭ މާލޭގެ ސިންތެޓިކް ޓްރެކުގައެވެ. މި ހަފްލާގައި ދުނިޔޭގެ ފެންވަރުގައި ފާހަގަކުރެވޭ އެކި ކުޅިވަރު ޝަހުސިއްޔަތުން ބައިވެރިވާނެއެވެ.
