ސްޕޯޓްސް އެވޯޑްސް 2022: ފަބްރީޒިއޯ ރޮމާނޯ ރާއްޖެއަށް
13 މާރިޗު 2022 | އާދީއްތަ 08:30ފަބްރީޒިއޯ މިހާރު މަސައްކަތް ކުރަމުން އަންނަނީ ސްކައި ސްޕޯޓްސްގައި
އިޓަލީގެ ސްޕޯޓްސް ޖާނަލިސްޓް ފަބްރީޒިއޯ ރޮމާނޯ
މިއަންނަ ބުރާސްފަތި ދުވަހު ރާއްޖޭގައި ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑްސް 2022 ގައި ބައިވެރިވުމަށް އިޓަލީގެ މަޝްހޫރު ސްޕޯޓްސް ޖާނަލިސްޓް ފަބްރީޒިއޯ ރޮމާނޯ ރާއްޖެ އައުމަށް ހަމަޖެހިއްޖެއެވެ.
ފަބްރީޒިއޯ އަކީ ބޭރުގެ ޓްރާންސްފަރ މާކެޓް ދިރާސާކުރުމުގައި އެންމެ ފާހަގަކުރެވޭ ކުޅިވަރު ނޫސްވެރިޔާއެވެ. ޓްރާންސްފާތަކުގެ ސައްހަކަން ކަށަވަރުކުރާނެ މަސްދަރެއްގެ ގޮތުގައިވެސް ބައެއް ނޫސްތަކުން ބަލަމުން އަންނަނީ އޭނާގެ ޓްވިޓަރ އެކައުންޓެވެ. ދުނިޔޭގެ ފުޓްބޯޅައިގައި އެންމެ އިތުބާރު ހިފޭ މަސްދަރުކަމަށް ގިނަ ބަޔަކު ބަލާ ފަބްރީޒިއޯ މިހާރު މަސައްކަތް ކުރަމުން އަންނަނީ ސްކައި ސްޕޯޓްސްގައެވެ. މީގެ އިތުރުން "ދަގާޑިއަން" އާއި "ބީބީސީ ސްޕޯޓްސް" ގައިވެސް އޭނާވަނީ ރިޕޯޓަރެއްގެ ގޮތުގައި މަސައްކަތް ކޮށްފައެވެ.
ރާއްޖޭގެ ކުޅިވަރު ދާއިރާގައި މަސައްކަތްކުރާ ފަރާތްތަކުގެ އަގު ވަޒަންކުރުމަށް މިހާތަނަށް ބާއްވާ އެންމެ ބޮޑު ހަފްލާ ތާވަލުކުރެވިފައިވަނީ މިއަންނަ ބުރާސްފަތި ދުވަހުގެ ރެއަށެވެ. މި ގާލާ ބޭއްވުމަށް ހަމަޖެހިފައިވަނީ މާލޭގެ ސިންތެޓިކް ޓްރެކުގައެވެ. ހަފްލާއަށް އެތަން ތައްޔާރުކުރުމުގެ މަސައްކަތް މިހާރުވެސް އަންނަނީ ކުރަމުންނެވެ.
ރާއްޖޭގައި ބޭއްވުމަށް ހަމަޖެހިފައިވާ މި ގާލާގައި ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވެއެވެ.
