ޓްރެކުގައި ސްޕޯޓްސް އެވޯޑްސް ބާއްވަނީ އެހެން ސަރަހައްދުތައް ކުޑަވުމުން

ކުޅިވަރުގެ ވުޒާރާއިން މިމަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑްސް 2022، ސިންތެޓިކް ޓްރެކްގައި ބޭއްވުމަށް ނިންމާފައިވަނީ މި ހަފްލާ ބޭއްވުމަށް އެހެނިހެން ކުޅިވަރު ސަރަހައްދުތައް ކުޑަވުމުންކަމަށް ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.

މިނިސްޓަރ ވިދާޅުވީ 550 އަށްވުރެ ގިނަ ބޭފުޅުންނާއިއެކު ބާއްވާ މޯލްޑިވްސް ސްޕޯޓްސް އެވޯޑްސް ގާލާ ބޭއްވުމަށް ރީތި ސިންތެޓިކް ޓްރެކް ވަގުތީގޮތުން ބަންދުކުރަންޖެހޭތީ ޓްރެކް ބޭނުންކުރާ ފަރާތްތަކުގެ އަރިހުން މަޢާފަށް އެދޭ ކަމަށެވެ. ނަމަވެސް މިގޮތަށް ނިންމަންޖެހުނީ ހެންވޭރު ދަނޑު، ގަލޮޅު ދަނޑު އަދި ކާނިވާ ސަރަހައްދުވެސް މިހަފްލާއަށް ކުޑަވުމުން ކަމަށް މިނިސްޓަރު ވިދާޅުވިއެވެ.

މި ހަފްލާއަށް ޓްރެކް ތައްޔާރުކުރުމުގެ މަސައްކަތް މިހާރުވެސް އަންނަނީ ކުރަމުންނެވެ. ހަފްލާގެ ތައްޔާރީތަކަށް ކުރަންޖެހޭ ބައިވަރު އަދި ބުރަ މަސައްކަތަށް ތާށިވެ ދަތިވިނަމަވެސް ޓްރެކް އެއްކޮށް ބަންދު ކުރާނީ އެންމެ ކުރު މުއްދަތަށް ކަމަށާއި، އެމައުލޫމާތު ހިއްސާކުރަމުން ގެންދާނެކަމަށް މިނިސްޓަރު ވިދާޅުވިއެވެ.

ދުނިޔޭގެ ގިނަ ޤައުމުތަކުގައި ކުޅިވަރު އެވޯޑުތަކަކީ ވަރަށް ކުލަގަދަކޮށް ކުރާކަމެކެވެ. އެގޮތުން މިނިސްޓަރު ވިދާޅުވީ ރާއްޖެއިންވެސް މަސައްކަތް ކުރަމުން އަންނަނީ ވީހާވެސް ކުލަގަދަކޮށް، ބޭރުގެ ފަރާތްތަކުގެ ސަމާލުކަން ލިބޭނެ ފަދަ ގޮތަކަށް މަސައްކަތް ކުރުން ކަމަށެވެ.

މިހަފްލާގައި ބައިވެރިވާ ލެޖެންޑުން މެދުވެރިކޮށް އެތަށް މިލިއަން ބައެއްގެ މެދުގައި ރާއްޖެ ކުޅިވަރުގެ ޒަރިއްޔާއިން އިޝްތިހާރުވެގެންދާނެއެވެ. މިއީ ރާއްޖޭގެ ފަތުރުވެރިކަމަށްވެސް ލިބޭނެ ކުރިއެރުމަކަށް ވާއިރު، މިކަމަށް އެންމެހާ ބޭފުޅުންގެ ބައިވެރިވުމާއި އެއްބާރުލުން ދެއްވާވާނެކަމަށް ޔަޤީންކޮށް މިނިސްޓަރު ޝުކުރު އަދާކުރެއްވިއެވެ.

ރާއްޖޭގެ ކުޅިވަރުގެ ދާއިރާގައި މަސައްކަތްކުރާ އެކިފަރާތްތައް އަގުވަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް 2022 އަކީ ދުނިޔޭގެ ސަމާލުކަން ލިބޭފަދަ އިވެންޓަކަށް ހެދުމަށް މިނިސްޓަރު މަހްލޫފް އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނުވަތަ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.