ސްޕޯޓްސް އެވޯޑްސް 2022: ދުނިޔޭގެ އެންމެ މޮޅު ބިލިއާޑް ކުޅުންތެރިޔާ ބައިވެރިވާނެ
9 މާރިޗު 2022 | ބުދަ 04:46އަލްބިން ވަނީ ދުނިޔޭގެ ޗެމްޕިއަންކަން ދެފަހަރު ނަގާފައި
ދުނިޔޭގެ އެންމެ މޮޅު ޕޫލް އަދި ބިލިއާޑް ކުޅުންތެރިޔާ އަލްބިން އޮސްޗަން
މިމަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑްސްގައި ދުނިޔޭގެ އެންމެ މޮޅު ޕޫލް އަދި ބިލިއާޑް ކުޅުންތެރިޔާ އަލްބިން އޮސްޗަން ބައިވެރިވާނެކަމަށް ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.
މިނިސްޓަރ ކުރެއްވި ޓްވީޓެއްގައި ވިދާޅުވީ ދުނިޔޭގެ އެންމެ މޮޅު ޕޫލް އަދި ބިލިއާޑް ކުޅުންތެރިޔާ އަލްބިން އޮސްޗަންއަށް ދީފައިވައިވާ ދައުވަތު ގަބޫލުކޮށްފައިވާ ކަމަށެވެ. އަދި އެކަމަށްޓަކާ މިނިސްޓަރ ވަނީ އޭނާއަށް ޝުކުރު އަދާކޮށްފައެވެ.
މިހާރު ދުނިޔޭގެ އެންމެ މޮޅު ޕޫލް ބިލިއާޑް ކުޅުންތެރިޔާ އަލްބިން ވަނީ ދުނިޔޭގެ ޗެމްޕިއަންކަން ދެފަހަރު ނަގާފައެވެ. އެއީ 2016 އަދި 2021 ވަނަ އަހަރުއެވެ. ވޯލްޑްކަޕް އޮފް ޕޫލް ޗެމްޕިއަންކަންވެސް ދެފަހަރު ނަގާފައިވާ އަލްބިން ވަނީ ޗައިނާ އޯޕަން ޗެމްޕިއަންކަންވެސް ކާމިޔާބުކޮށްފައެވެ. 2021 ވަނަ އަހަރުގެ އެންމެ މޮޅު ކުޅުންތެރިއަކަށް ހޮވިފައިވަނީވެސް އޭނާއެވެ.
ރާއްޖޭގެ ކުޅިވަރުގެ ދާއިރާގައި މަސައްކަތްކުރާ އެކިފަރާތްތައް އަގުވަންކުރުމަށް ބާއްވާ މޯލްޑިވްސް ސްޕޯޓްސް އެވޯޑްސް 2022 އަކީ ދުނިޔޭގެ ސަމާލުކަން ލިބޭފަދަ އިވެންޓަކަށް ހެދުމަށް މިނިސްޓަރ މަހްލޫފް އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.
މި އިވެންޓުގައި ބައިވެރިވުމަށް ރާއްޖެ އަންނާނެކަން މިހާރު ޔަގީންވެފައިވަނީ އަލްބިން އާއި، ވީލްޗެއަރ ޓެނިސް ކުޅުންތެރިޔާ ލޫސީ ޝޫކާ އާއި، ބްރެޒިލްގެ ފުޓްބޯޅަ ލެޖެންޑު ރޮބާޓޯ ކާލޯސްގެ އިތުރުން ބްރެޒިލްގެ ކުރީގެ ވޮލީ ކެޕްޓަން ޖިލްބާޓޯ ގޮޑޯއީ އާއި، ވީލްޗެއަރ ޓެނިސް ކުޅުންތެރިޔާ ގޯޑަން ރެއިޑް އާއި، ފެތުމުގައި ފާހަގަ ކުރެވޭ އޮލިމްޕިކް ގޯލްޑް މެޑަލިސްޓް ސާރާ އަދި ފުޓްބޯޅަ ލެޖެންޑް މިޝެލް ސަލްގާޑޯއެވެ.
