އިމާރާތްކުރުމުން އުފެދޭ ކުނި އަލުން ބޭނުންކުރާނެ ސްޓޭންޑަރޑް ކުރިޔަށް އޮތް ދެމަސް ދުވަސްތެރޭ ކަނޑައެޅޭނެ

މާލެ ސަރަހައްދުގަޔާއި މިސަރަހައްދުގެ އެހެން ރަށްރަށުގައި އިމާރާތްކުރާއިރު އުފެދޭ ކުނި އަލުން ބޭނުންކުރެވޭ ގޮތް ހެދުމުގެ މަސައްކަތްތަކެއް ކުރަމުންދާކަމަށް އެންވަޔަރަންމަންޓް މިނިސްޓްރީގެ ޑިރެކްޓަރ ޖެނެރަލް އަހުމަދު މުރުތަޟާ ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން މުރުތަޟާ ވިދާޅުވީ އެކަން ކުރުމަށް ބޭނުންވާ އިކުއިޕްމެންޓް ގެނައުމަށް މިހާރު ޓެންޑަރކޮށް ބިޑްތައް ލިބި އިވެލުއޭޓްވެސް ކޮށްފައިވާކަމަށެވެ. ވަރަށް އަވަހަށް އެމަސައްކަތް ފެށޭނެ ކަމަށް އުންމީދުކުރައްވާ މުރުތަޟާ ވިދާޅުވިއެވެ.

އިމާރާތްކުރާއިރު އުފެދޭ ކުނި އަލުން ބޭނުންކުރެވޭ ގޮތަށް ހެދުމަށް މެޝިނެއްގެ ތެރޭގައި ފަސް ސައިޒަކަށް އެކުނި މުގުރާނެކަމަށް މުރުތަޟާ ވިދާޅުވިއެވެ. އެކަން ކުރުމަށް ކޮންސްޓްރަކްޝަން މަސައްކަތްކުރާ ބައެއް ފަރާތްތަކާއި މަޝްވަރާކުރި ކަމަށާއި މަސީއާވެސް މަޝްވަރާކުރިކަމަށް މުރުތަޟާ ވިދާޅުވިއެވެ. އަދި މިކަމަކީ މިހާރުވެސް ދުނިޔޭގައި ކާމިޔާބުކަމާއެކު ކުރާކަމެއްކަމަށް މުރުތަޟާ ވިދާޅުވިއެވެ.

އަލުން ބޭނުންކުރާ ގޮތް ހަދާއިރު ކޮލިޓީއަކީ މުހިންމު އެއްޗެކަށްވާއިރު އެކަންކުރުމަށް ދިރާސާތަކެއް އިނގިރޭސިވިލާތުގެ ކުންފުންޏަކާއި ޔުނިވަރސިޓީ އެއް ގުޅިގެން މިހާރު ކުރިޔަށްދާކަމަށް މުރުތަޟާ ވިދާޅުވިއެވެ. މިހާރު އެ ތަންތަނުގެ ބޭފުޅުން ރާއްޖޭގައި ތިއްބަވައިގެން ދިރާސާތައް ކުރިޔަށް ގެންދަވާކަމަށާއި ކުރިޔަށް އޮތް ދެ މަސް ދުވަސްތެރޭގައި އެކަން ކުރާނެ ސްޓޭންޑަރޑްތައް ކަނޑައެޅިގެންދާނެކަމަށް މުރުތަޟާ ވިދާޅުވިއެވެ.

މުރުތަޟާ ވިދާޅުވީ ބަލަނީ އިމާރާތްކުރުމުގެ ދާއިރާގައި މިހާރުވެސް ބޭނުންކުރާ ކޮލިޓީގައި އެތަކެތި އަލުން ބޭނުން ކުރެވޭ ގޮތް ހެދުމަށްކަމަށެވެ.

މާލެ ސަރަަހައްދުގެ ކުނި މެނޭޖްކުރުމުގެ ބޮޑު ޕްރޮޖެކްޓެއް ތިލަފުށީގައި އަންނަނީ ހިންގަމުންނެވެ. މިޕްރޮޖެކްޓް ކުރިޔަށްދަނީ ދެ ފިޔަވައްސަކަށް ބަހާލައިގެންނެވެ. އޭގެ ފުރަތަމަ ފިޔަވަހީގެ މަސައްކަތް މިހާރު ކުރިޔަށްދާއިރު ފުރަތަމަ ފިޔަވަހީގައި ކުނި މެނޭޖްކުރުމުގެ ކަންކަން ކުރިޔަށްގެންދާނެއެވެ. ދެވަނަ ފިޔަވަހީގައި ވޭސްޓް މެނޭޖްމެންޓް ސިސްޓަމް ގާއިމުކުރާނެއެވެ. އެކަން ކުރުމަށް މިހާރު ވަނީ ސްޕެއިންގެ ކުންފުންޏަކާއި ހަވާލުކޮށްފައެވެ.