ސްޕޯޓްސް އެވޯޑްސް 2022: ލޫސީ ޝޫކާ ބައިވެރިވާނެ
8 މާރިޗު 2022 | އަންގާރަ 11:31އިވެންޓް އިތުރަށް ފުރިހަމަކުރުމައްޓަކައި ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވޭ
ވީލްޗެއަރ ޓެނިސް ކުޅުންތެރިޔާ ލޫސީ ޝޫކާ
މިމަހުގެ 17 ވަނަ ދުވަހު ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑްސްގައި ވީލްޗެއަރ ޓެނިސް ކުޅުންތެރިޔާ ލޫސީ ޝޫކާ ބައިވެރިވާނެކަމަށް ކުޅިވަރާއި ބެހޭ ވަޒީރު އަހްމަދު މަހްލޫފް ވިދާޅުވެއްޖެއެވެ.
އެތައް ފަހަރެއްގެ މަތިން ޕެރަލިމިކް މެޑަލް ހާސިލްކޮށްފައިވާ ލޫސީ ވަނީ 2020 ވަނަ އަހަރު ޓޯކިޔޯގައި އޮތް ޕެރަލިމިކް ގޭމްސްއިން ރިހި މެޑަލް ހޯދާފައެވެ. އަދި 2016 ވަނަ އަހަރު އޮތް ރިއޯ އާއި 2012 ވަނަ އަހަރު އޮތް ލަންޑަން ޕެރަލިމިކް ގޭމްސްގައިވެސް ލޫސީ ވަނީ ދެ ލޯމެޑަލް ކާމިޔާބުކޮށްފައެވެ.
އިގިރޭސިވިލާތުގެ އެންމެ މޮޅު އެއް ވީލްޗެއަރ ޓެނިސް ކުޅުންތެރިޔާގެ ގޮތުގައި ފާހަގަކުރެވިފައިވާ ލޫސީ ވަނީ 100 އަށްވުރެ ގިނަ އިންޓަނޭޝަލް ކެރިއަރ ޓައިޓަލް ކާމިޔާބުކޮށްފައެވެ. މީގެ އިތުރުން ސިންގަލްސްގެ ބައިން ދުނިޔޭގެ ފަސް ވަނައިގައި އަދި ޑަބަލްސްގެ ބައިން ދުނިޔޭގެ ތިންވަނައިގައި ލޫސީ ވަނީ ރެކޯޑު ކުރެވިފައެވެ.
ލޫސީގެ ކެރިއަރުގައި މިހާތަނަށް ހޯދާފައިވާ އިތުރު ކާމިޔާބީތަކުގެ ތެރޭގައި ޑަބަލް މާސްޓަރގެ ޗެމްޕިއަންކަން ނެގުމާއި، ވިމްބްލްޑަން ޑަބަލްސްގެ ފައިނަލުގައި ފަސް ފަހަރު ކުޅުމުގެ އިތުރުން، ވޯލްޑް ޓީމް ކަޕްގައި މެޑަލް ހޯދުމާއި ނޭޝަނަލް ޗެމްޕިއަންކަން ކާމިޔާބު ކުރުން ހިމެނެއެވެ.
މުޅިން އަލަށް ތައާރަފްކުރާ މޯލްޑިވްސް ސްޕޯޓްސް އެވޯޑްސް އަކީ ދުނިޔޭގެ ސަމާލުކަން ހުއްޓޭފަދަ ކާމިޔާބު އިވެންޓަކަށް ހެދުމަށް މިނިސްޓަރ މަހްލޫފް އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ދުނިޔޭގެ އެހާރާއި މިހާރުގެ މަޝްހޫރު 15 ކުޅުންތެރިން ނޫނީ ކުޅިވަރުގެ ޝަހުސިއްޔަތުން ރާއްޖެ އައުމަށް ހަމަޖެހިފައިވާ ކަމަށްވެސް ވިދާޅުވިއެވެ.
މި އިވެންޓުގައި ބައިވެރިވުމަށް ރާއްޖެ އަންނާނެކަން މިހާރު ޔަގީންވެފައިވަނީ ލޫސީ އާއި، ބްރެޒިލްގެ ފުޓްބޯޅަ ލެޖެންޑު ރޮބާޓޯ ކާލޯސްގެ އިތުރުން ބްރެޒިލްގެ ކުރީގެ ވޮލީ ކެޕްޓަން ޖިލްބާޓޯ ގޮޑޯއީ އާއި، ވީލްޗެއަރ ޓެނިސް ކުޅުންތެރިޔާ ގޯޑަން ރެއިޑް އާއި، ފެތުމުގައި ފާހަގަ ކުރެވޭ އޮލިމްޕިކް ގޯލްޑް މެޑަލިސްޓް ސާރާ އަދި ފުޓްބޯޅަ ލެޖެންޑް މިޝެލް ސަލްގާޑޯއެވެ.
މޯލްޑިވްސް ސްޕޯޓްސް އެވޯޑްގެ ބްރޯޑްކާސްޓިންގ މީޑިއާ ޕާޓްނަރަކަށް ހަމަޖައްސާފައިވަނީ ރާއްޖެ ޓީވީއެވެ. އެހެންކަމުން ރާއްޖެ ޓީވީ އިން މޯލްޑިވްސް ސްޕޯޓްސް އެވޯޑްގެ އެންމެ ފަހުގެ އަޕްޑޭޓްތައް އާންމުންނާއި ހަމަޔަށް ގެނެސްދޭ ގޮތަށް ވަނީ ހަމަޖެހިފައެވެ.
