ހިއްސާއަކަށް 2 ރުފިޔާ 70 ލާރި ބަހަން އުރީދޫއިން ފާސްކޮށްފި

އުރިދޫ މޯލްޑިވްސްއިން 2021 ވަނަ އަހަރުގެ ހިއްސާގެ ފައިދާގެ ގޮތުގައި ހިއްސާއަކަށް 2 ރުފިޔަަ 70 ލާރި ބަހަން ފާސްކޮށްފިއެވެ.

2021 ވަނަ އަހަރު އެކުންފުންޏަށް ލިބުނު ފައިދާއިން ހިއްސާއަކަށް 2.70 ރުފިޔާ ދޭން އެކުންފުނީގެ ބޯޑުން ނިންމާފައިވަނީ ފެބްރުއަރީ 3 ވަނަ ދުވަހު ބޭއްވި ބޯޑުގެ ބައްދަލުވުމުންނެވެ. ހިއްސާއަކަށް މި އަދަދު ދޭން ފާސްކޮށްފައިވަނީ ކްރޮސްރޯޑް މެރީނާގެ ޖަލްސާކުރާ މާލަމުގައި ހޯމަ ދުވަހުގެ ރޭ ބޭއްވި އެކުންފުނީގެ މިއަހަރުގެ އަހަރީ އާންމު ޖަލްސާއިންނެވެ.

މި ޖަލްސާގައި 1،202 ހިއްސާދާރުން ބައިވެރިވެފައިވާއިރު، އަމަލީގޮތުން ބައިވެރިވެފައިވަނީ 101 ހިއްސާދާރުންނެވެ. ހިއްސާދާރުން ތަމްސީލުކުރުމަށް ޕްރޮކްސީ ހޯލްޑަރުންގެ ގޮތުގައި 1101 ހިއްސާދާރުން ބައިވެރިވެފައިވެއެވެ. މި ހިއްސާދާރުން ރަމްޒުކޮށްފައިވަނީ 135.9 މިލިއަން ރުފިޔާއެވެ.

މިދިޔަ އަހަރުގެ ފައިދާއިން ހިއްސާއަކަށް 2.70 ރުފިޔާ ބަހަން ފާސްވީ ޖަލްސާގައި ބައިވެރިވި ހިއްސާދާރުންގެ 98.7 އިންސައްތަ ވޯޓާއެކުއެވެ. މިއަހަރު ހިއްސާއަކަށް ބަހަން ނިންމި އަދަދު ފާއިތުވި އަހަރު ހިއްސާއަކަށް ބަހަން ނިންމި އަދަދަށްވުރެ ބޮޑެވެ. ކުރީ އަހަރު ހިއްސާއަކަށް ބަހާފައިވަނީ 2.34 ރުފިޔާ އެވެ.

މީގެ އިތުރުން އުރީދޫގެ ބޯޑުގައި އާންމު ހިއްސާދާރުން ތަމްސީލުކުރާ ބޯޑު ޑިރެކްޓަރުގެ މަގާމަށް ބޭފުޅަކު އައްޔަންކުރުމަށް ހިއްސާދާރުންގެ މެދުގައި ނެގި ވޯޓުން މިއަހަރުވެސް އިންތިޚާބުކުރި މެމްބަރަކީ ފަރީހާ ޝަރީފެވެ. އޭނާ ހޮވުނީ 732 ވޯޓާއެކުއެވެ.

އުރީދޫގެ އޮޑިޓަރެއްގެ ގޮތުގައި މިއަހަރަށް އިންތިޚާބުކޮށްފައިވަނީ ޕްރައިޒް ވޯޓަރ ހައުސް ކޫޕާރސްއެވެ. އަދި އެފަރާތުގެ އުޖޫރައިގެ ގޮތުގައި 62,920 ޑޮލަރު ދިނުމަށް ވަނީ ފާސްކޮށްފައެވެ.