މަންދީއަށް ހަމަލާދިން ޖަޒީލް 6 މަހާއި 6 ދުވަހަށް ޖަލަށް
7 މާރިޗު 2022 | ހޯމަ 10:08ކްރިމިނަލް ކޯޓުގައި މި މައްސަލަ ބެއްލެވީ ގާޒީ އަލީ ނަދީމް
އެމްޑީޕީ އޮފީހުގައި މާރާމާރީ ހިންގި އަޙުމަދު ޖަޒީލު
ސޯސަން މަގުގައި ހުންނަ އެމްޑީޕީ އޮފީހުގައި މާރާމާރީ ހިންގި އަޙުމަދު ޖަޒީލު 6 މަހާއި 6 ދުވަހަށް ޖަލަށް ލުމަށް ކްރިމިނަލް ކޯޓުން ޙުކުމް ކޮށްފިއެވެ.
މި މާރާމާރީގައި އެމްޑީޕީގެ ސެކެޓްރޭޓިއަޓްގައި މަސައްކަތްކުރާ މަރިޔަމް ޒުބައިރު (މަންދީ) ގެ ބޮލަށް ބޮޑެތި އަނިޔާތަކެއް ލިބިފައިވެއެވެ. މަންދީ އަކީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ ގޮނޑި ތަމްސީލުކުރައްވާ އެމްޑީޕީގެ މެމްބަރު މީކާއީލް އަހުމަދު ނަސީމުގެ މަންމައެވެ. ޖަޒީލް މަންދީއަށް ހަމަލާދީފައިވަނީ ޗޭނުގަނޑަކުންނެވެ. މިހަމަލާގައި މަންދީގެ އިތުރުން އެހެން މުވައްޒަފަކަށްވެސް އަނިޔާވެފައިވެއެވެ.
މި މައްސަލައާއި ގުޅިގެން ޖަޒީލްގެ މައްޗަށް މީހަކަށް އަނިޔާއެއް ދިނުމުގެ ކުށުގެ 2 ދައުވާއެއް އުފުލާފައިވެއެވެ.
މި މައްސަލައިގެ އިބްތިދާއީ މަރުޙަލާގައި ޖަޒީލް ވަނީ ދައުވާއަށް އިއުތިރާފު ވެފައެވެ. އެއާއެކު އަވަސްނިޔާގެ ޝަރީއަތުގެ އަޑުއެހުމެއް ބާއްވައި އޭނާގެ މައްޗަށް ކުށް ސާބިތުވާކަމަށް ވަނީ ކަނޑައަޅާފައެވެ. އަދި އަޙުމަދު ޖަޒީލު 6 މަހާއި 6 ދުވަހަށް ޖަލަށް ލުމަށް ކްރިމިނަލް ކޯޓުން ޙުކުމް ކޮށްފައިވަނީ ހޯމަ ދުވަހުއެވެ.
ކްރިމިނަލް ކޯޓުގައި މި މައްސަލަ ބެއްލެވީ ގާޒީ އަލީ ނަދީމެވެ.
ހަމަލާއަކީ ރާވައިގެން ޓާގެޓްކޮށްގެން ދީފައިވާ ސިޔާސީ ހަމަލާއެއް ނޫންކަމަށް މަންދީގެ އިތުރުން މީކާއީލްވެސް ވިދާޅުވެފައިވެއެވެ.
